РОСТ ЁСЦЬ, АЛЕ ПАТРЭБНА ДАБІВАЦЦА БОЛЬШАГА

Сельское хозяйство

На чарговым семінары, які прайшоў на базе КСУП  “Пераможнік”, былі падведзены вынікі работы жывёлаводаў за пяць месяцаў бягучага года.


РАБОТУ ўдзельнікі сенінара пачалі з наведвання жывёлагадоўчых памяшканняў. Дырэктар гаспадаркі В.І. Протчанка расказаў аб планах і задумах, якія неабходна рэалізаваць. Многа зроблена за апошні час, асабліва сёлета, у Год роднай зямлі. Наведзены парадак на тэрыторыі, разбіты клумбы, высаджаны  кветкі, каля фермаў зелянеюць газоны. Стала прыгожа і ўтульна. Створаны адпаведныя ўмовы для працы і адпачынку. Нядаўна адрамантавалі Дом механізатараў. Тут ёсць кабінеты па тэхніцы бяспекі, фельчара, дыспетчарская. У плане – абсталяванне працоўнага месца інжынера і многае іншае.


Калісьці на комплексе па вырошчванні і адкорме буйной рагатай жывёлы ўтрымлівалася 6 тысяч галоў. Цяпер – трэцяя частка ад гэтай колькасці. З цягам часу памяшканні прыйшлі ў непрыгоднасць. Павелічэнне пагалоўя, дойнага статка запатрабавала рэканструкцыі – аднаўляюцца старыя будынкі. На Зарачанскай малочнатаварнай ферме вядзецца рамонт  кароўніка, разлічанага на бяспрывязнае ўтрыманне. Для эканоміі электраэнергіі набываюць шыфер, які прапускае святло. Зусім хутка пяройдуць у адрамантаванае памяшканне, у якім будзе ўтрымлівацца дойны статак і жывёла лімузінскай пароды. Патрэбна адзначыць, што ў гаспадарцы адпрацавана тэхналогія вырошчвання і адкорму буйной рагатай жывёлы. Комплекс камплектуецца ў асноўным за кошт уласнага маладняку, атрыманага ад кароў і цялушак. Толькі на першым перыядзе 532 галавы. Частка з іх утрымліваецца ў летнім лагеры, а калі спякотнае надвор’е, знаходзіцца ў хляве. У  рацыёне — усё неабходнае.


Гаспадарка год ад году нарошчвае аб’ёмы рэалізацыі прадукцыі і павялічвае прадуктыўнасць дойнага статка дзякуючы сістэмнай рабоце па адбору цялушак ад высокаўдойных кароў. Тут добра наладжана работа асемянатара. У гэтыя дні аператары машыннага даення ад кожнай каровы атрымліваюць па 17,4 кілаграма малака, што на 1,5 кг больш, чым летась за адпаведны перыяд.


Наведалі прысутныя таксама пашу з наборам многакампанентных траў.  Арганізавана пасьба з дапамогай электраагароджы, жывёла забяспечана вадой, соллю. Ад кожнай каровы  за пяць месяцаў бягучага года атрымана па 2120 кілаграмаў малака.
Пасля азнаямлення з арганізацыяй вытворчага працэсу ўдзельнікі семінара сабраліся на плянарнае пасяджэнне, каб падвесці вынікі работы жывёлагадоўчай галіны за пяць месяцаў.


Як адзначыла начальнік планава-фінансавага аддзела райсельгасхарчу В.Р. Дзегцярэнка, прагнозны паказчык па вытворчасці сельгаспрадукцыі ўсімі катэгорыямі гаспадарак выкананы на 113%. Як і раней, асноўны цяжар нясе грамадскі сектар (117,8%). Менавіта ён забяспечыў прырост прадукцыі, у той час як насельніцтва справілася з ім на 92,4%.


Запланаванае заданне выканана ўсімі гаспадаркамі раёна. Найбольшы тэмп забяспечылі КСУП імя Жукава – 144,3%, “Дублінскі” – 130,5%, “Чамярыскі” – 128%, “Брагінка” – 121,6%, “Брагінскі” — 114,5%.


За чатыры месяцы атрымана чыстага прыбытку на суму 3053 млн рублёў пры рэнтабельнасці 33,7%, ад рэалізацыі сельгаспрадукцыі —  прыбытак у суме 188 млн рублёў (у 2008-м – страты ў суме 83 млн руб.).


Прададзена прадукцыі на 10318 млн рублёў, ці 146% да ўзроўню мінулага года. Найбольш — КСУП “Малажынскі” – на  2126 млн рублёў (141%), “Брагінскі” – на 2124 млн рублёў (144%). Найвышэйшы рост да ўзроўню мінулага года забяспечаны ў КСУП “Брагінка” – 178%.


У сярэднім на аднаго чалавека рэалізавана прадукцыі на суму 7,2 млн рублёў, а ў КСУП “Брагінскі” – на 15940  млн (у 2,2 раза вышэй сярэднераённага паказчыка). У КСУП імя Жукава — толькі на 3,8 млн, што ў два разы ніжэй раённага і ў 4,2 – чым у “Брагінскім”.


Аналізуючы паказчыкі прадукцыйнасці працы, Валянціна Рыгораўна адзначыла, што на кожнага чалавека за чатыры месяцы ў сярэднім атрымана прадукцыі на суму 9 млн рублёў, а ў КСУП “Брагінскі” – на 19 млн, “Пераможнік” – 12 млн, “Чамярыскі” – 10,5 млн. Менш усіх – у КСУП імя Жукава (5,2 млн), “Дублінскі” (5,8 млн), “Камарынскі” (6,6 млн).


Аб тым, як працавалі жывёлаводы на працягу пяці месяцаў, расказаў намеснік начальніка сельскай гаспадаркі і харчавання М.А. Раманюк. Нягледзячы на тое, што ў цэлым прагнозны паказчык выкананы, па вытворчасці малака з запланаваным заданнем справіліся толькі чатыры гаспадаркі : “Брагінка”, “Брагінскі”, “Чамярыскі” і “Пераможнік”.


Галоўны спецыяліст па закупках і якасці сельгаспрадукцыі Н.М. Купрыенка спынілася на рэалізацыі малака, стратах, якія панеслі некаторыя гаспадаркі з-за продажу няякаснай прадукцыі.


Начальнік упраўлення сельскай гаспадаркі і харчавання В.В. Хмелянок звярнуў увагу на такія пытанні, як падрыхтоўка тэхнікі, сушыльнай гаспадаркі, складоў да ўборкі зерневых, аховы пасеваў ад дзікіх кабаноў і іншае.


Т. ЦІШКЕВІЧ



Пакінуць адказ