Як расказаў старшыня Чамярыскага сельскага Савета Адам Царанок, сёлета да іх прыехала 15 маладых спецыялістаў. Працаваць яны будуць ва ўсіх сферах народнай гаспадаркі. Найбольшая колькасць – у адкрытым акцыянерным таварыстве. З некаторымі з іх мы пазнаёміліся бліжэй.
Анастасія Краўчанка родам з Чамярыс, вярнулася на малую радзіму пасля заканчэння Гомельскага аграрнага каледжа. Зараз яна – бухгалтар. Вікторыя Гайваранюк займае пасаду інжынера па ахове працы. Вучылася ў Мазырскім універсітэце на інжынерна-педагагічным факультэце.
Пра Анастасію Сізову як пра маладога і перспектыўнага эканаміста я пачула крыху раней ад яе калег, якія ацанілі і цягу да вучобы, і мэтанакіраванасць выпускніцы Беларускай дзяржаўнай сельскагаспадарчай акадэміі.
На маё пытанне, як сустрэлі ў гаспадарцы, ці задаволены бытавымі ўмовамі, адказалі, што ўсё нармальна. Жывуць у інтэрнаце, не сумуюць.
Скажу шчыра: калі ўбачылі адразу такую колькасць прыгожых дзяўчат, былі прыемна ўражаны. Ад іх шчырых і адкрытых усмешак, здаецца, пасвятлела навокал. Столькі пазітыву, энергіі выпраменьвалі іх вочы, што міжволі парадаваліся за калектыў “Чамярыскага”, які дачакаўся такой змены. Не горшыя прыехалі на працу і юнакі (пра кожнага з іх раскажам на старонках мясцовага выдання).
Хочацца пажадаць ім усім асабістага шчасця, прафесійнага майстэрства і ўдачы. Каб збываліся мары і надзеі, а галоўнае – удалымі і ўпэўненымі былі першыя крокі на вялікім працоўным шляху. І, вядома, спадзяемся, што ў нашым раёне маладыя спецыялісты застануцца.
Ніна СІНІЛАВА
