Больш за палавіну ўдзельнікаў даследавання вакцыны супраць каранавіруса для падлеткаў «Спадарожнік М» ужо атрымалі першы кампанент. Аб гэтым паведамляецца на сайце мэра Масквы са спасылкай на галоўнага педыятра Дэпартамента аховы здароўя Масквы, галоўнага ўрача дзіцячай гарадской клінічнай бальніцы імя З.А. Башляевай Ісмаіла Асманава.
«Палавіна запланаванай работы праведзена — больш як 1,5 тыс. падлеткаў зрабілі прышчэпку першым кампанентам, больш як 1,2 тыс. з іх — і першым, і другім. Увесь гэты час дзеці вядуць дзённік самаадчування ў мабільным дадатку, а ўрачы назіраюць за іх станам. Ні ў аднаго вакцынаванага не было зафіксавана сур’ёзных неспрыяльных пабочных рэакцый на вакцыну. Толькі ў адзінкавых выпадках назіраліся нязначныя рэакцыі на прэпарат: невялікае павышэнне тэмпературы, стамляльнасць, боль у месцы ін’екцыі. Але ўсе яны прадаўжаюцца непрацяглы час, да сутак. Папярэднія вынікі даюць магчымасць зрабіць выснову аб бяспецы прышчэпкі», — адзначыў ён.
Усяго ў даследаванні прымуць удзел 3 тыс. добраахвотнікаў. З іх 2,4 тыс. атрымаюць вакцыну, а 600 — плацэба. Размеркаванне ўдзельнікаў у тую ці іншую групу адбудзецца выпадкова. Ні падлеткі, ні бацькі, ні ўрач не будуць ведаць, у якую менавіта групу трапіць удзельнік.
Пасля кожнага кампанента з удзельнікамі на працягу некалькіх дзён звязваюцца медыцынскія супрацоўнікі для ўдакладнення самаадчування. На 28-ы дзень пасля ўвядзення першага кампанента ўсім добраахвотнікам робяць электракардыяграму, аналіз згусальнасці крыві, клінічны і біяхімічны аналіз крыві. Акрамя таго, 500 удзельнікаў дадаткова здадуць аналіз крыві на імунагеннасць (здольнасць выпрацоўкі антыцел супраць віруса).
Вакцына для падлеткаў «Спадарожнік М» — гэта тая ж двухкампанентная вакцына «Спадарожнік V» для асоб старэйшых за 18 гадоў, але ў меншай дазіроўцы: адна пятая частка ад дарослай.
