На футбольных палях Гомельшчыны стартаваў новы сезон чэмпіянату вобласці па футболе сярод мужчынскіх каманд другой лігі. Гонар Брагінскага раёна сёлета адстойваюць мясцовыя футбалісты, і ўжо ў першым матчы, які адбыўся 26 красавіка, ім давялося сутыкнуцца з сур’ёзным выпрабаваннем – камандай Ельска.
Сустрэча паміж Брагінам і Ельскам абяцала быць захапляльнай: калі нашы футбалісты ў мінулым сезоне не змаглі прабіцца ў другі раўнд, заняўшы шостае месца ў сваёй групе «Цэнтр», то Ельск упэўнена ўвайшоў у шасцёрку лепшых, паказаўшы годны вынік. Сёлета ў чэмпіянаце заяўлены 22 каманды, падзеленыя на чатыры дывізіёны, і Брагін змагаецца ў групе Б3, дзе яго сапернікамі, акрамя Ельска, сталі Хойнікі, Лоеў і «Страла».
Настрой у брагінчан быў рашучы, яны выйшлі на поле з цвёрдым намерам стартаваць у сезоне з перамогі. Аднак матч пачаўся для гаспадароў не лепшым чынам. Лік быў адкрыты толькі на 22-й хвіліне, калі ельчане забілі ў нашы вароты. Усяго пяць хвілін спатрэбілася гасцям, каб падвоіць сваю перавагу. Здавалася, трыбуны затаілі дыханне, чакаючы адказу ад брагінчан. І вось ён – гол! Землякі вярнулі веру ў каманду, скараціўшы адставанне да 1:2. Трыбуны ажывіліся, і гульня стала больш дынамічнай. Першы тайм завяршыўся менавіта з такім лікам. Пры гэтым, як адзначалі балельшчыкі, абодва мячы, прапушчаныя гаспадарамі, аказаліся, мякка кажучы, «выпадковымі», намякаючы на памылкі ў абароне, якіх можна было б пазбегнуць.
Другі тайм абяцаў быць не менш захапляльным. Інтрыга захоўвалася, але ініцыятыва, як і ў першай палове сустрэчы, заставалася за Ельскам. Госці працягвалі нарошчваць перавагу, а брагінчане аказваліся ў ролі даганяючых. Нягледзячы на ўсе намаганні, адказаць на кожны гол саперніка давалася з цяжкасцю. Усяго праз пяць хвілін пасля пачатку другога тайма ельчане забілі яшчэ адзін гол, але брагінчане не здаваліся і здолелі адквітаць адзін мяч. Аднак як потым «нешта пайшло не так». Гульня каманды, на жаль, надламалася, і, нягледзячы на ўсе старанні, брагінчане прапусцілі яшчэ некалькі мячоў. Каманда білася да апошняй секунды, але паражэнне з лікам 3:7 стала горкім вынікам гэтага няпростага матчу.
Варта адзначыць, што матч не абышоўся без драматызму: было шмат барацьбы, момантаў і нават чырвоныя і жоўтыя карткі, а таксама пенальці. Усё гэта рабіла гульню яшчэ больш захапляльнай.
На жаль, у першым матчы сезона Брагін не змог набраць ачкоў. Але каманда паказала, што гатовая змагацца і не здавацца.
– Вынікам я засмучаны. Мы прайгралі саперніку, з якім, на мой погляд, цалкам маглі гуляць на роўных. Крыўдныя памылкі прыводзілі да прапушчаных галоў, а госці, відавочна, былі настроены толькі на перамогу. Ельск – дасведчаны сапернік, удзельнік фінальнага этапу мінулага рэгіянальнага чэмпіянату, і гэта, вядома, адыграла сваю ролю. Але я хачу падзякаваць усім балельшчыкам, якія прыйшлі на матч і падтрымлівалі нас на працягу ўсёй гульні! Гэта вельмі важна для каманды, – адзначыў старшы інспектар райвыканкама Юрый Крываручка.
Заўтра ў брагінчан гульня з Лоевам на стадыёне ДЮСШ Брагінскага раёна (пачатак у 12.30). Балельшчыкі спадзяюцца, што яны прадэманструюць больш упэўнены вынік, прынёсшы доўгачаканыя ачкі ў скарбонку раёна.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook, Youtube.
