Быць пагранічнікам – не проста праца, а справа гонару і служэнне Радзіме. У гэтым перакананы курсант інстытута пагранічнай службы Рэспублікі Беларусь Дзяніс Маісееў, ураджэнец Брагіна, чыя гісторыя даказвае: мары здзяйсняюцца, калі ісці да іх упэўнена і мэтанакіравана.
Цікавасць да воінскай службы з’явілася ў Дзяніса яшчэ ў дзяцінстве. Уражвалі фільмы, у якіх мужныя воіны ў зялёных фуражках з гонарам ахоўвалі рубяжы.
– Гэтыя людзі ўяўляліся мне асабліва адважнымі і адданымі свайму абавязку, – успамінае зямляк.
Пасля заканчэння школы лёс прывёў Дзяніса ў Полацкі дзяржаўны лясны каледж, а затым ён быў прызваны на тэрміновую воінскую службу. Праходзіў яе ў манеўранай групе вайсковай часці 2147 Брэста.
Абавязак перад Радзімай, адчуванне важнасці сваёй справы і магчымасць стаяць на варце дзяржаўных рубяжоў – усё гэта знайшло водгук. Менавіта тады вырашыў прысвяціць сябе абароне краіны. Прапанова паступіць у інстытут пагранічнай службы Рэспублікі Беларусь стала лагічным працягам яго шляху.
Цяпер Дзяніс – другакурснік.
– Афіцэры і выкладчыкі даюць нам максімум ведаў, вучаць вытрымцы, уменню прымаць рашэнні ў складаных сітуацыях. Усё гэта спатрэбіцца для аховы дзяржаўнай граніцы, – дзеліцца курсант.
Вучоба – гэта важна, але яна не адзіная частка жыцця земляка. Дзяніс з дзяцінства захапляецца лёгкай атлетыкай. У інстытуце ён мае магчымасць працягваць трэніроўкі і ўдзельнічаць у спаборніцтвах.
– Для высокіх вынікаў патрэбна планамерная, карпатлівая праца, – упэўнены курсант.
Зараз ён праходзіць практыку ў Гродна. Як будучы афіцэр павінен не толькі ведаць тэорыю, але і ўмець кіраваць асабовым складам.
– Толькі дзякуючы якаснай падрыхтоўцы можна дасягнуць жаданых вынікаў, – адзначае Дзяніс.
Ён упэўнены: пагранічная служба заўсёды будзе важнай і запатрабаванай.
– Гэта справа гонару, школа мужнасці і самаадданасці, – лічыць зямляк, падкрэсліваючы непахіснасць традыцый і важнасць абароны дзяржаўных рубяжоў.
