У райцэнтры прайшоў парад Дзядоў Марозаў і Снягурак. Калона стартавала ад гасцініцы і прайшла па цэнтральнай вуліцы да плошчы, дзе яе з нецярпеннем чакалі самыя маленькія жыхары Брагіншчыны.
Не абышлося і без сюрпрызаў. Сёлета галоўныя Дзед Мароз і Снягурка прыбылі на квадрацыкле.
На плошчы яны разам з дзецьмі вадзілі карагоды, танцавалі, спявалі навагоднія песні і ўдзельнічалі ў вясёлых гульнях. Звонкі смех, яркія касцюмы і пераднавагодняя атмасфера стварылі свята для ўсіх жыхароў і гасцей Брагіна.
