Для кожнага з нас вялікае шчасце быць здаровымі і бачыць такімі ж сваіх родных і блізкіх. Але любы боль ці нават непрыемныя сімптомы прастуды імгненна нагадваюць, як моцна мы маем патрэбу ў людзях, якія прысвяцілі сябе самай гуманнай і высакароднай прафесіі.
Урачы і медыцынскія сёстры, акушэры і фельчары, санітары і лабаранты – усе яны, як анёлы-ахоўнікі, ідуць побач з намі па дарозе жыцця, засцерагаючы ад хвароб, усяляючы ўпэўненасць і надзею. Прыкладаюць максімум намаганняў, каб пазбавіць ад болю, дапамагчы палегчыць душэўныя пакуты, захаваць толькі што зароджанае жыццё і не даюць яму згаснуць на працягу ўсяго часу, адведзенага чалавеку. Іх веды, самаадданасць, чысціня думак, высакародная праца – у нашым распараджэнні.
Значнасць працы гэтых людзей падкрэслівала і сённяшяе мерапрыемства, што прайшло ў раённым доме культуры: набліжаецца Дзень медыцынскіх работнікаў.
Шчырую ўдзячнасць ім за вернасць выбару і дапамогу тым, каму яна так патрэбна ў цяжкую хвіліну, выказаў старшыня райвыканкама Сяргей Карпенка, які падкрэсліў:
– Сёння ў нас ёсць асаблівы нагода для гонару, які надае гэтаму святу гістарычнае гучанне. Ваша самаадданая праца і бескарыслівая адданасць справе ўдастоены галоўнай узнагароды краіны – занясення на рэспубліканскую Дошку гонару. І гэта не проста радок у летапісе аховы здароўя Брагіншчыны. Гэта прэстыж і гонар усяго нашага раёна.
Сяргей Вячаслававіч пажадаў медработнікам павагі калег і пацыентаў, доўгіх і шчаслівых гадоў жыцця, моцнага здароўя і душэўнага цяпла, узаемаразумення і дабрабыту ў сем’ях.
Да віншаванняў далучылася таксама старшыня раённага Савета дэпутатаў Іна Міхаленка:
– Ваша карпатлівая, добрасумленная праца, вернасць абавязку, высокі прафесіяналізм і кампетэнтнасць дазволілі вам супрацьстаяць многім выклікам і дасягнуць самых высокіх вынікаў. А прэстыж і важнасць прафесіі медработніка ніколі не пакідалі сумненняў. Упэўненасці вам у заўтрашнім дні, моцнага здароўя, даўгалецця і шчасця!
Падзякаваў свайму калектыву за дасягнутыя поспехі галоўны ўрач Брагінскай ЦРБ Ігар Кірэня. Цёплыя словы калегам адрасавала таксама старшыня пярвічнай прафсаюзнай арганізацыі ўстановы аховы здароўя Ірына Дрэмез.
І, вядома ж, не абышлося без узнагарод. Першую з іх – Ганаровую грамату раённага выканаўчага камітэта за шматгадовую і добрасумленную працу, высокі прафесіяналізм, значны ўклад у развіццё галіны аховы здароўя атрымаў з рук кіраўніка раёна Ігар Кірэня.
Ганаровай граматы галоўнага ўпраўлення аховы здароўя аблвыканкама ўдастоена памочнік урача агульнай практыкі Новаіёлчанскай амбулаторыі Таццяна Катлабай, падзякі – участковы ўрач-педыятр Ігар Шэпілаў.
Галоўнай медыцынскай сястры Брагінскай ЦРБ Людміле Бурак уручана Ганаровая грамата райвыканкама, а медыцынскай сястры агульнай практыкі Камарынскай участковай бальніцы – раённага Савета дэпутатаў.
Імёны васьмі лепшых медыцынскіх работнікаў занесены на Дошку гонару Брагінскай ЦРБ. І яшчэ 12 перспектыўных, адданых сваёй справе супрацоўнікаў атрымалі граматы і падзякі ад адміністрацыі ўстановы.
Са сцэны гучалі не толькі шчырыя, добрыя словы ў адрас людзей у белых халатах, але і бадзёрыя, душэўныя песні. Асабліва кранальным атрымаўся музычны нумар іх калегі: урач Іна Хрушч выступіла са сваёй маленькай дачкой Таісіяй.
Усім, хто ў трэцюю нядзелю чэрвеня сустрэне сваё прафесійнае свята, – моцнага здароўя, аптымізму, дабрабыту, сілы і цярпення! Няхай святло вашай душы, што нясе цяпло, клопат і надзею на аздараўленне, ніколі не згасне!
Валянціна БЕЛЬЧАНКА
Фота Цімафея МІХАЛЕНКІ
