Аператар машыннага даення КСУП “Пераможнік” Ларыса Іванаўна Назаранка неаднаразова прадстаўляла сваю гаспадарку на раённых спаборніцтвах, была ўдзельніцай абласных. У 2005 годзе стала пераможцай рэспубліканскага спаборніцтва. Хаця змагацца за ганаровае першынство складана: у нас многа даярак вопытных і адказных, з багатым практычным вопытам і высокімі вытворчымі паказчыкамі.
Пасля Малейкаўскай сярэдняй школы паступіла ў Рэчыцкі зааветэрынарны тэхнікум, які паспяхова закончыла. Пасля вучобы займала пасаду заатэхніка. Так што спецыяльныя веды ў рабоце вельмі дапамагаюць. А пасля дакрэтнага водпуску са снежня 1989 года працуе аператарам машыннага даення на МТФ “Зарэчча”.
Гэтая прафесія ў іх сям’і ў пашане. Ларыса Іванаўна пайшла па слядах сваёй маці, якая таксама даіла кароў і была ў ліку перадавых.
—Каб дабівацца высокіх надояў, патрэбна ўводзіць у статак першацёлак, — лічыць жанчына. – Раздойваць іх – справа нялёгкая, але калі дабіваешся адпаведных вынікаў, атрымліваеш задавальненне. Я працую не дзеля славы, проста люблю сваю прафесію.
У мінулым годзе Ларыса Іванаўна ад кожнай каровы надаіла па 5 тысяч кілаграмаў малака. І сёлета няма роўных ёй у гаспадарцы. За пяць месяцаў ад каровы атрымала 2437 кілаграмаў.
Чвэрць веку на ферме праляцела як адзін дзень. Ёсць послех, прызнанне, дастатак, якія для Ларысы Іванаўны як узнагарода за нялёгкую сумленную працу.
