Вывучаем попыт і набываем вопыт

У I Міжнароднай выставе “Гомельпрамэкспа”, якая была арганізавана ў рамках VII Гомельскага эканамічнага форуму, прыняла ўдзел і дзяржаўная лесагаспадарчая ўстанова “Камарынскі лясгас”. Што гэта дало прадпрыемству, якія вынікі прынесла, мы папрасілі расказаць галоўнага інжынера Л.С. Панцялеенку.

-Такая выстава праходзіла ў абласным цэнтры ўпершыню, — падзялілася ўражаннямі Любоў Сяргееўна, — таму  і  наведвальнікаў было няшмат. Нашай прадукцыяй, дарэчы, як і прадпрыемствам, цікавіліся. Людзі падыходзілі, пыталіся, ці вырабляем мы вагонку, ацыліндраваныя зрубы, ці можна набыць у нас піламатэрыялы, скажам, дошку для падлогі і інш. На жаль, попыту рынку мы не ведалі, прыехалі на мерапрыемства такога характару першы раз, таму маглі прапанаваць толькі кол гаспадарчы. Гэта было свайго роду знаёмства са сферай бізнэсу, якая была тут прадстаўлена, як кажуць ваенныя, разведка. Прыглядваліся мы,  прыглядваліся да нас, а ўсе разам вучыліся, каб у наступны раз быць на вышыні і прадствавіць сваю прадукцыю ў выгадным свеце і асартыменце.

Несумненна, удзел у эканамічным форуме аказаўся карысным. Па-першае, мы даведаліся, што цікавіць спажыўца і які тавар яму неабходны, па-другое, вызначылі напрамкі сваёй дзейнасці на бліжэйшую перспектыву. Нам тэрмінова патрэбен сушыльны комплекс, і ў хуткім часе ён з’явіцца, хаця і давядзецца браць крэдыт у суме 800 млн. Грошы акупяцца, бо попыт на прадукцыю з дрэва вялікі.

Мне давялося пабываць на аналагічным злёце дзелавых людзей у Літве. Там зацікаўленасць бізнэсменаў была вялікая. Прычына, мабыць, вядомая ўсім: у гэтай рэспубліцы больш шырока прадстаўлены прыватны бізнэс, капітал. І да нас падыходзілі прадпрымальнікі, уладальнікі  прадпрыемстваў і таварыстваў з жаданнем наладзіць кантакты і супрацоўніцтва. Адзінай перашкодай з’явілася адлегласць, на якой ДЛГУ “Камарынскі лясгас” знаходзіцца ад Літвы і іншых прыбалтыйскіх рэспублік. Былі б мы з прыгранічнай з імі вобласці ці рэгіёна, і гутаркі не вялося б. Падпісалі б дагаворы на ўзаемнае супрацоўніцтва, бо цікавасць да нас была вялікая.

Прадукцыю наша прадпрыемства за мяжу пастаўляе, толькі ўжо па лініі “Белэкспарт” і прыватных дагавораў. Так што ўсё ў   перспектыве, у тым ліку і новыя дамоўленасці, якія дапамогуць прадпрыемству не толькі заявіць пра сябе і заваяваць новыя рынкі збыту, але і палепшыць фінансавае становішча. Хаця самім даводзіцца прыбягаць да паслуг банкаў і крэдытавання, у нейкай ступені падтрымліваем у раёне тыя арганізацыі і ўстановы, якія датуюцца з бюджэту і не могуць своечасова разлічыцца з намі за прадукцыю. На сёння лесагаспадарчай установе яны задаўжалі больш 300 млн рублёў, трэцяя частка з гэтай сумы – КЖУП “Брагінскае”.

Падрыхтавала Н. СІНІЛАВА