УСЁ СВАЁ НАШУ З САБОЙ
Усё, што нажыў непасільнай працай, страціў жыхар вёскі Чырвоная Ніва з-за сваёй легкадумнаці. Пяць гадоў збіраў ён грошы на машыну. Але захоўваў іх не ў банку і нават не ў шафе для бялізны (як гэта робяць некаторыя). Ён іх насіў з сабой у кішэні… Сумма немаленькая – дзве з паловай тысячы еўра, 400 долараў і 500 тысяч беларускіх рублёў. Аднак грамадзянін лічыў, што спосаб захоўвання грошай “пад сэрцам” больш надзейны. Ды толькі аднойчы і ён падкачаў…
Адправіўся неяк мужчына ў суседнюю вёску Крыўча ў магазін. Купіў таго-сяго з прадуктаў, ну і, канечне ж, віна. Як жа без яго?..
А вось што было далей — не памятае. Нават пра тое, колькі купляў віна, дзе і з кім піў. Прачнуўся ў полі сярод жыта. Азірнуўся – няма сумкі з ежай. Ды што там сумка. Куртка з грашамі ў кішэні знікла!
– Родненькія, знайдзіце грошы! – кінуўся бедалага за дапамогай да міліцыянераў.
Чатыры дні спатрэбілася старшаму ўчастковаму інспектару РАУС С.У. Сінілу для таго, каб адшукаць злодзеяў. За гэты час яны паспелі патраціць 100 еўра і 300 тысяч беларускіх рублёў. Цяпер чухаюць галаву, дзе іх знайсці, каб аддаць гаспадару.
ПРЫГОДЫ ХАТНЯГАЗЛОДЗЕЯ
На крымінальную сцежку Аляксей стаў яшчэ ў 16 гадоў, і сёння ў пэўных кругах яго ведаюць многія. У 2008-м юнак здзейсніў 8 крадзяжоў гульнявых прыставак і камп’ютэраў з кватэр жыхароў Брагіна, куды трапляў праз вокны. За гэта ён быў адпраўлены ў месцы аддаленыя, дзе правёў амаль два гады.
Дамоў Лёша вярнуўся гэтай вясной. Зведаўшы жыццё ў калоніі, ён упэўнена абяцаў, што болей туды не вернецца. Малады чалавек заканчваў 11 классаў сярэдняй агульнаадукацыйнай школы, і патрэбна было думаць аб працягу вучобы і набыцці прафесіі. Тым больш, што адзнакі ў атэстате дазвалялі гэта зрабіць. Аднак, як кажуць: “ад турмы і ад сумы не заракайся”.
Новыя прыгоды юнака пачаліся, як толькі ў школе празвінеў апошні званок. Спачатку ён выкраў мапед у аднаго жыхара Брагіна, потым запчасткі да гэтага транспартнага сродка – у другога. Калі міліцыянеры затрымалі злодзея, ён слёзна прасіў яго адпусціць, абяцаў, што гэта было ў апошні раз. Паверылі. Як аказалася, дарма.
Праз некалькі дзён Аляксей зноў здзяйсняе крадзёж. На гэты раз – банкаўскай пластыкавай карткі. У чужы дом ён трапіў звыклым спосабам – праз акно. І на табе – на стале ляжыць картка і пін-код да яе. Перасілець спакусу юнак не змог, схапіў картку і хутчэй у банкамат, дзе зняў 100 тысяч беларускіх рублёў. Не ведаў Лёша, што ў той момант яго здымала відэакамера. Яна і дамагла супрацоўнікам міліцыі выйсці на след зладзюгі.
Сёння Аляксей знаходзіцца ў ізалятары часовага ўтрымання.
ПАЛЯВАННЕ ПРЫВЯЛО ДА ТРАГЕДЫІ
Аднойчы трое жыхароў вёскі Іванкі адправіліся на паляванне. Яны адразу ж разбрыліся па лесе, вырашыўшы, што так будзе больш шанцаў сустрэць дзіка. Жаданне вярнуцца дамоў з трафеем было такім моцным, што адзін з паляўнічых пачаў страляць, толькі пачуўшы шорахі ў зараслях. Аднак лёгкай мішэнню стаў напарнік.
Каб пазбегнуць пакарання, віноўны папрасіў яго сказаць, што няшчасны выпадак адбыўся з-за ўзарваўшагася ў руках патрона. Пацярпеўшы згадзіўся. Ён так і памёр у бальніцы, стоячы на сваім і выгароджваючы сябра, – стрэл карцеччу быў смяротным.
Аднак у ходзе аператыўна-вышуковых мерапрыемстваў супрацоўнікам міліцыі ўдалося дакапацца да праўды. Пры гэтым, у час вобыску ў падазраванага было знойдзена тры незарэгістраваныя паляўнічыя стрэльбы і чатыры патроны калібра 7,65 мл (да аўтамата Калашнікава).
У хуткім часе гора-паляўнічы сядзе на лаву падсудных.
ВІНАВАТА ГАРЭЛКА
Чашу цярпення аднаго з жыхароў вёскі Малейкі перапоўніў чарговы “запой” жонкі. Яе зноў позна ўвечары не было дома. Муж адправіўся шукаць суджаную і сустрэў яе недалёка ад хаты. Як і трэба было чакаць, тая была “навесяле”.
Прыступіўшы да фізічнага выхоўвання з дапамогай драўлянай палкі, мужчына забыўся пра ўсякую меру. Спагнаўшы такім спосабам назапашаную злосць, ён за ногі пацягнуў жонку дадому і ў адным з пакояў пакінуў яе ляжаць на падлозе. Раніцай жанчына памерла.
Зараз грамадзянін чакае пакарання. Чацвёра дзяцей у адзін момант засталіся без бацькоў.
В. ЧЭКАН,
начальнік аддзела ўнутраных спраў Брагінскага райвыканкама
