ЗАСЛУЖЫЎ ПАВАГУ І АЎТАРЫТЭТ

Общество

На  календары –  снежань. Ужо завяршылі асноўныя палявыя сельскагаспадарчыя работы працаўнікі сяла. Тая тэхніка, якая цяпер не задзейнічана, пастаўлена на захоўванне. Большая частка механізатараў  у зімовыя месяцы мае магчымасць адпачыць, каб з новымі сіламі прыступіць да  веснавой кампаніі. Толькі ў такіх, як Сяргей Пархамец з КСУП “Саўгас “Камарынскі”, працы хапае круглы год.


Сяргей Паўлавіч  – механізатар з дваццацігадовым стажам. Каму, як не яму, ведаць, як ажывае пасля зімовага сну зямля, сагрэтая сонечнай пяшчотай, аб чым шэпча калоссе на зыходзе дня і як зіхаціць раса на світанні…


Нарадзіўся ў вёсцы Асарэвічы, што на беразе  паўнаводнага Дняпра, і не памяняў сельскія краявіды на гарадскія. Пасля службы ў марфлоце вярнуўся дадому, пайшоў працаваць механізатарам у калгас імя Фрунзе. З таго часу мінула два дзесяткі гадоў. Набытае майстэрства, добрасумленныя адносіны да справы дапамаглі Сяргею Паўлавічу заслужыць павагу і аўтарытэт у калектыве, сярод вяскоўцаў. Не цураецца ніякай работы. З ранняй вясны і да позняй восені шчыруе на трактары. Яго ўмелыя рукі выводзяць у поле розную тэхніку: і трактар “МТЗ-1221”, і зернеўборачны камбайн КЗС-10, і кормаўборачны “Ягуар-870”.  Культывацыя, уздым зябліва, уборка зерневых, корманарыхтоўка… За што ні возьмецца старанны працаўнік, выканае ў тэрмін і якасна.


Прозвішча Сяргея Пархамца добра вядома ў раёне. Не раз выходзіў пераможцам раённага спаборніцтва. І сёлета механізатар на “Ягуары” нарыхтаваў 34 677 тон зялёнай масы і сярод трактарыстаў-машыністаў заняў другое месца. Атрымаў Ганаровую грамату і каштоўны падарунак. А колькі мае ўсіх узнагарод, ужо і не злічыць.


Яшчэ з дзяцінства цікавіліся тэхнікай і яго сыны. У час жніва былі ў бацькі памочнікамі. Сёлета вярнуўся з арміі старэйшы, Сяргей, і на КЗС-10 дапамагаў убіраць зерневыя. А раней, яшчэ ў былым КСУП “Саўгас “Краснае”,  у памочніках быў Павел, які цяпер праходзіць вайсковую службу. Добрасумленнымі, адказнымі выхавалі сыноў бацькі, навучылі не баяцца цяжкасцяў.


Таццяна ЦІШКЕВІЧ



Пакінуць адказ

Ваш адрас электроннай пошты не будзе апублікаваны. Неабходныя палі пазначаны як *