Музычная камедыя Івана Пыр’ева “Свінарка і пастух” надоўга запомнілася гледачам. Прызнаюся, і сама з задавальненнем гляджу гэтую кінастужку, дзе гераіня Марыны Ладынінай з такім замілаваннем даглядае парасят, дабіваецца значных поспехаў і становіцца ўдзельніцай ВДНГ, што не парадавацца за яе нельга. Прафесія свінаркі, якая ў наш час лічыцца непрэстыжнай, апаэтызавана, узведзена ў ранг. Лепшай рэкламы і не трэба. Калі б у наш час ствараліся такія фільмы, прафарыентацыя давала б свой плён і праходзіла з большым поспехам. Магчыма, і кадраў у сельскай гаспадарцы хапала б.
Работнікі Малажынскай свінафермы таксама паказваюць прыклад сумленных адносінаў да работы. Кожны год сярод пераможцаў у рэспубліканскім спаборніцтве ў жывёлагадоўчай галіне (іх прозвішчы друкавала “Беларуская ніва”), мы знаходзілі прадстаўнікоў нашага раёна. Менавіта Іван Давыдоўскі і Рыгор Вінічэнка з КСУП “Малажынскі” траплялі ў іх лік і атрымлівалі грашовую прэмію – па 750 тысяч рублёў. Даглядаюць яны немалое пагалоўе – парасят ад двух да чатырох месяцаў, рамонтны маладняк, адкормкаў. Размешчана яно ў двух хлявах. Летась у адным з іх правялі рэканструкцыю.
На ферме працуе і Валянціна Краўчанка, у яе групе – парасяты на падсосе, захаванасць якіх неабходна забяспечыць. А ўзначальвае калектыў Марыя Новік. У мінулым годзе ва ўрачыстых абставінах Марыю Пятроўну адзначылі граматай і каштоўным падарункам. Мерапрыемства было прымеркавана да Дня работнікаў сельскай гаспадаркі і перапрацоўчай прамысловасці і праходзіла ў раённым Доме культуры. Сама яна з Петрыкаўскага раёна, на Брагіншчыну прыехала пасля заканчэння Рэчыцкага тэхнікума ў 1975 годзе ў калгас “Першамайск” (ранейшая назва КСУП “Малажынскі”). Спачатку працавала загадчыцай малочнатаварнай фермы, а з 1984-га – свінафермы.
Каб падначаленыя атрымлівалі добрыя паказчыкі, а з імі – адпаведныя заробкі і прэміі, кіраўніку сярэдняга звяна неабходна правільна арганізаваць іх работу. Без спецыяльных ведаў і вопыту гэта зрабіць было б цяжка. У мінулым годзе калектыў свінафермы атрымаў 1378 парасят, сярэднясутачныя прывагі свіней склалі 296 грамаў. Ведаюць, што вынікі могуць і павінны быць лепшымі, да гэтага імкнуцца.
Дарогу на Малажынскую ферму ведаюць не толькі жыхары нашага раёна, але і суседніх. Едуць сюды купляць парасят. Як расказала Марыя Пятроўна, у 2010-м яны рэалізавалі насельніцтву 991 галаву. Так што і з гэтага пункту гледжання іх праца важная і карысная. Дзяржава ўсяляк заахвочвае вяскоўцаў у развіцці асабістых падсобных гаспадарак. Няхай набываюць маладняк, адкормліваюць яго на падворку, папаўняюць харчовыя запасы. Свініну па-ранейшаму беларусы любяць.
Ніна СІНІЛАВА
На здымку: загадчыца Малажынскай свінафермы Марыя Новік.