Дзеці не нараджаюцца дрэннымі ці сапсаванымі – гэта аксіёма. Ды і імгненнага маральнага падзення не бывае. “У бяду трапляюць як у бездань, раптам, у злачынства сходзяць па ступенях…” – пісаў у адным са сваіх пісьмаў расійскі асветнік-дэмакрат Аляксандр Бястужаў. Дык вось чаму патрэбна нам, дарослым, і ў першую чаргу – бацькам, своечасова задумацца: ці правільна выхоўваем? чаму вучым? як кантралюем? які прыклад паказваем? У рэшце рэшт, уся доля адказнасці за ўчынкі і паводзіны падлеткаў кладзецца на тых, хто па сваім маральным і службовым абавязку павінен утрымаць падрастаючае пакаленне над пагібельнай мяжой. Прычым станоўчы вынік гарантаваны толькі пры ўмове, калі сям’я, школа, усе зацікаўленыя структуры ў барацьбе з негатыўнымі з’явамі выступаюць партнёрамі, – лічаць члены камісіі па справах непаўналетніх.
Пытанні, вынесеныя на парадак дня першага ў гэтым годзе іх пасяджэння сумесна з прадстаўнікамі каардынацыйнага савета па выкананні Дэкрэта №18 “Аб дадатковых мерах па дзяржаўнай абароне дзяцей у нядобранадзейных сем’ях” на чале з Ганнай Бабрынёвай, сапраўды заслугоўвалі таго, каб абмеркаваць іх у шырокай аўдыторыі.
Вынікі работы па прафілактыцы падлеткавай злачыннасці за мінулы год падводзілі з аптымізмам: назіраецца станоўчая дынаміка. Колькасць злачынстваў, здзейсненых непаўналетнімі, снізілася з 17 (у 2009-м) да васьмі. Усе – крадзяжы. Стала менш і правапарушэнняў: да адміністрацыйнай адказнасці прыцягнута шэсць чалавек (у 2009 годзе – 11) за распіцце спіртных напояў, чатыры (12) – за дробнае хуліганства, з 23 да 17 знізілася колькасць разгледжаных матэрыялаў, што датычаць невыканання абавязкаў бацькамі па выхаванні сваіх дзяцей. Не зафіксавана выпадкаў кіравання транспартнымі сродкамі асобамі, якія не маюць на тое правоў, і ў стане алкагольнага ап’янення.
Што ж, лічбы сапраўды рэч упартая – могуць расказаць лепш слоў. Але на фоне іх, як падкрэсліла Ганна Мікалаеўна, нельга губляць чалавечнасць. “Дзеці павінны перш за ўсё нам давяраць, адчуваць, што іх гатовы выслухаць, зразумець і падтрымаць, ім хочуць дапамагчы”.
Удзельнікі пасяджэння ўносілі свае прапановы, як удасканаліць механізм прафілактычнай работы, над чым патрэбна працаваць яшчэ больш плённа. Спыніліся на такіх аспектах, як міжведамаснае ўзаемадзеянне, фарміраванне прававой культуры падлеткаў і іх бацькоў, індывідуальны падыход да кожнага. Зваротная сувязь, іншымі словамі, павінна прысутнічаць.
Разважалі таксама над пытаннем, як павялічыць працэнт спагнання з гора-бацькоў грашовых сродкаў, затрачаных дзяржавай на ўтрыманне іх дзяцей. За мінулы год давялося кампенсаваць толькі 39,4%, а гэта, на жаль, самы нізкі паказчык у вобласці. Таму пастаўлена задача выкарыстаць усе рэзервы, сродкі і магчымасці, каб даную планку ўзняць вышэй, дасягнуць жадаемага эфекту.
74 абавязаныя асобы, 24 дзіцяці, якія знаходзяцца на прафілактычным уліку ў інспекцыі па справах непаўналетніх, 81 (36 сем’яў) – у сацыяльна небяспечным становішчы. Праблемы падлеткавай занятасці, п’янства, сямейнага недабрабыту… Поле для дзейнасці шырокае. Прафілактыка патрабуе спалучэння адказнасці з сістэмнасцю, настойлівасцю і нераўнадушшам. Як вядома, хваробу, у тым ліку і духоўную, лягчэй папярэдзіць, чым лячыць.
Удзел у пасяджэнні прыняў пракурор раёна Сяргей Кулажанка.
Валянціна БЕЛЬЧАНКА