Купалле па традыцыі прайшло 6 ліпеня на беразе Дняпра ў Камарыне. Аб тым, што гэта адно з самых любімых жыхарамі Брагіншчыны святаў, сведчыў той факт, што сюды, на прыгожы бераг паўнаводнай ракі, з’ехаліся людзі амаль з усіх куточкаў раёна.
Адкрыў святочную тэатралізаваную праграму начальнік аддзела ідэалагічнай работы райвыканкама Ігар Самбук, які павіншаваў усіх са святам і пажадаў цудоўнага адпачынку. Вядучая аб’яўляе:
– Людзі! Глядзіце – Купала набліжаецца! Гэта азначае, што свята пачынаецца.
Выходзяць Купала, Купалінка, дзяўчаты. Потым да іх далучаюцца бабка Кілікея, ведзьма і чэрці. І завіхрылася тэтралізаваная пастаноўка з выступленнямі народнага калектыву “Камарынская весялуха”, Наталлі Цеслянок, фальклорнага калектыву Бярозкаўскага сельскага клуба, Вольгі Петрусевіч, прафесійных артыстаў з Мінска.
Побач са сцэнай і пляцоўкай, дзе праходзіла прадстаўленне, размясціліся крамы-палаткі Брагінскага раённага спажывецкага таварыства, дзіцячы атракцыён, латкі мясцовых ідывідуальных прадпрымальнікаў. Тут былі прадстаўлены ў шырокім асартыменце мясныя і кандытарскія вырабы, газіраваныя салодкія напоі і сокі. Дзеці раз-пораз падбягалі да прадаўцоў салодкай ваты.
Адметнай рысай сёлетняга святкавання была адсутнасць спіртных напояў, нават піва. Але гэта зусім не азмрочыла святочнага настрою людзей: цвярозы настрой – натуральны, а значыць вельмі карысны.
У канцы тэатралізаванага прадстаўлення спальваецца пудзіла ведзьмы.
– Каб ачысціцца ад усяго нядобрага, знішчыць зло, якое нам пакінулі нячысцікі, трэба спаліць пудзіла ведзьмы, як рабілі нашы продкі, – гаворыць вядучая.
Гарыць вогнішча – сімвал ачышчэння ад розных хваробаў і няшчасцяў. Вядучыя жадаюць “шчасця і долі, хлеба і волі”.
Закончылася свята дыскатэкай.
Разыходзіліся ўжо а першай гадзіне, задаволеныя, у цудоўным настроі.
Трэба адзначыць тых людзей, якія падаравалі ім гэты настрой: супрацоўнікаў аддзела культуры райвыканкама, Камарынскага і Брагінскага ДК, работнікаў гандлю, аддзела ўнутраных спраў райвыканкама, раённага адзела па надзвычайных сітуацыях, выратавальнікаў на вадзе, пагранічнікаў.
Летнія ночы вельмі кароткія, асабліва купальская, а раніцай – на працу. А так хочацца, каб свята працягвалася…
Мікалай ЧАРНАБАЙ
