«Наперадзе – яшчэ адзін навучальны год. І задачы перад педагогамі раёна стаяць складаныя, але вырашальныя», – адзначыла, звяртаючыся да ўдзельнікаў жнівеньскай нарады настаўнікаў, намеснік старшыні райвыканкама Ганна Бабрынёва. «Самае страшнае ў гэтай прафесіі – абыякавасць, – працягвала яна. – І таму маладыя спецыялісты, якія накіраваны на працу ў раён, павінны памятаць, што ў дзяцей, а яны ў нас цудоўныя, патрэбна ўкладваць не толькі веды, але і душу.» Ганна Мікалаеўна выказала надзею на тое, што былыя студэнты, а сярод іх палова – ураджэнцы раёна, стануць сапраўднымі патрыётамі Брагіншчыны. І, вядома, шчырыя словы падзякі прагучалі ў адрас кіраўнікоў і калектываў устаноў адукацыі, прадпрыемстваў, бацькоў, якія ўнеслі ўклад у падрыхтоўку памяшканняў да новага навучальнага года. На такой жа ўзнёслай ноце працягвала і старшыня райкама прафсаюза работнікаў адукацыі і навукі Ніна Пінчук. Яна знайшла цёплыя словы пра кожную з тых жанчын, што ў гэтым годзе маюць права на заслужаны адпачынак.
Усебакова асвятліў дзейнасць галіны начальнік аддзела адукацыі Аляксандр Калясан. Установам раёна ёсць чым ганарыцца. Але гэта не з’яўляецца падставай для самазаспакаення і самазадаволенасці. Выкарыстоўваючы ўсе рэзервы, імкнуцца да новых дасягненняў – такі дэвіз павінены быць на ўзбраенні кожнага педагога.
Тамара Пашкевіч, загадчыца Малейкаўскага дзіцячага сада, падзялілася вопытам арганізацыі адукацыйнага працэсу ў дашкольнай установе. Як сведчаць апытанні бацькоў, 80% з іх задаволены якасцю дадатковых адукацыйных паслуг. Надзея Махнач, намеснік дырэктара Хракавіцкай САШ па вучэбна-выхаваўчай рабоце, паведаміла аб набытках педагагічнага калектыву ў адукацыі падрастаючага пакалення.
Арыгінальна была прадстаўлена Іялчанская САШ. З цеплынёй выпускнікі ўстановы Яніна Вашчанка і Аляксандр Сачава расказвалі аб сваіх настаўніках, якія правялі іх па школьным жыцці і далі пуцёўку ў свет дарослых. На сёння былыя выпускнікі ўжо студэнты ВНУ рэспублікі. І непрыкрыты і апраўданы гонар за сваю школу, яе педагагічны калектыў адчуваўся ў кожным слове былых вучняў.
Галіна Кавалец, дырэктар цэнтра карэкцыйна-развіваючага навучання, гаварыла аб рабоце з дзецьмі, якія маюць праблемы са здароўем. Ім асабліва патрэбны любоў, пяшчота і спагада дарослых. І калектыў цэнтра робіць усё, каб даць гэтым дзеткам адчуванне таго свету, у якім ім жыць.
Сваімі думкамі пра летнюю занятасць, як фактар зніжэння падлеткавай злачыннасці падзяліўся галоўны спецыяліст аддзела адукацыі Ігар Пятрэня.
Педагогі змаглі пазнаёміцца з выставай вырабаў гурткоўцаў Дома дзіцячай творчасці Брагіна, паслухаць музычныя нумары ў выкананні педагогаў і выхаванцаў гэтай установы.
Штодня аддаваць частку душы, пазіраць у радасныя твары, ведаць, што будучыня залежыць і ад тваёй сённяшняй працы, – лёс педагога. Таго, хто абраў прафесію, дзе працаваць можна толькі па закліку сэрца. І няхай на гэтым шляху будзе як мага больш удзячных вучняў і спагадлівых бацькоў.
Галіна ШАЎЧЭНКА
