На мінулым тыдні дзеці з нашага раёна наведалі Веткаўскі музей народнай творчасці імя Фёдара Шклярава і Свята-Пакроўскі храм у вёсцы Карме Добрушскага раёна.
Паездка атрымалася змястоўнай. Дзеці змаглі дакрануцца да гісторыі, пазнаёміцца з праваслаўнымі традыцыямі і асновамі веравучэння. З інтарэсам слухалі юныя прыхаджане манашку, якая праводзіла экскурсію па Свята-Пакроўскім храме. Пакланіліся Казанскаму абразу Божай Маці, прыклаліся да мошчаў Іаана Кармянскага.
А сфарміраваць уяўленне аб жыццёвых каштоўнасцях праваслаўнага чалавека дапамог дзецям айцец Расціслаў, настаяцель Казанскай царквы ў Малажыне, які разам з камісіяй па справах непаўналетніх райвыканкама арганізаваў гэтую экскурсію, гутарыў з хлопчыкамі і дзяўчынкамі аб духоўнасці і дабрадзейнасці.
– Эмоцыям дзяцей не было межаў, – гаворыць намеснік старшыні камісіі па справах непаўналетніх Вольга Ясінская. – Яны ажыўлена абмяркоўвалі паездку ў час вяртання дамоў, дзяліліся ўражаннямі ад убачанага.
Несумненна, экскурсіі па святых месцах патрэбны. Дзіцячыя сэрцы чуллівыя да дабра, і калі іх нешта трывожыць, ім неабходна вера ў тое, што ёсць Гасподзь, які слухае іх малітвы і прыходзіць на дапамогу.