Большасцю з нас блакітны агеньчык на газавай пліце ўспрымаецца як само сабой зразумелае. А калісьці людзі нават уявіць сабе не маглі, што будуць карыстацца такой выгодай цывілізацыі.
Блакітнае паліва «прапісалася» і ў шматлікіх кватэрах брагінчан. Газіфікацыя раёна, распачатая ў 1997 годзе, працягваецца.
Сваю гісторыю Брагінскі цэх газавай гаспадаркі пачаў у 1975 годзе. Тады працаўнікі толькі што створанага прадпрыемства займаліся забеспячэнем абанентаў звадкаваным газам, а таму нараўне з абслугоўваннем няхітрага на той час абсталявання ў іх асноўныя функцыі ўваходзілі прывоз і ўстаноўка газавых балонаў. Прыродны ж газ у кватэры брагінчан прыйшоў у канцы 1997 года. Першым на яго выкарыстанне быў пераведзены мікрараён №2 райцэнтра.
Усяго ў раёне газіфікавана 5840 кватэр, з іх у 3101-й карыстаюцца прыродным газам. У 2763-х пакуль стаяць балоны (99% з іх – у сельскай мясцовасці). У верасні-кастрычніку нарэшце завершыцца падключэнне да блакітнага паліва дамоў Камарына. Таксама сёлета адпадзе патрэбнасць у дастаўцы балонаў са звадкаваным газам у Краснае, Чамярысы, Малейкі і Дублін.
У працоўнай біяграфіі прадпрыемства за гады яго існавання здаралася ўсякае. Але яго асноўная функцыя – забеспячэнне безаварыйнай і бесперабойнай работы газавай сістэмы раёна – заўсёды была і застаецца нязменнай. Пры гэтым з кожным годам укараняюцца больш сучасныя тэхналогіі, мадэрнізіруецца абсталяванне, павышаецца яго надзейнасць і бяспека.
За ўсімі дасягненнямі прадпрыемства стаіць, вядома ж, напружаная праца людзей. Два гады Брагінскі цэх газавай гаспадаркі ўзначальвае Рыгор Шупан. Менавіта пад яго кіраўніцтвам супрацоўнікі прадпрыемства граматна і кваліфікавана ажыццяўляюць тэхнічнае абслугоўванне сістэм газазабеспячэння. І сёння, расказваючы аб калегах, Рыгор Леанідавіч адзначае, што калектыў малады, але, нягледзечы на гэта, яму пад сілу любыя задачы.
Зладжанасць і аператыўнасць у дзеяннях вызначаюць аварыйную службу, якая нясе вахту ў кругласутачным рэжыме і без выхадных. У падначаленні майстра Пятра Смальцара знаходзіцца 15 чалавек (дыспетчары, слесары і вадзіцелі). Спецыялісты добра ведаюць сваю работу і заўсёды памятаюць, што ад іх хуткіх рашэнняў у экстрэмальных умовах залежыць прадухіленне або своечасовая ліквідацыя аварыі.
Кожны год перад пачаткам ацяпляльнага сезона ўнутрыдамавая газавая служба, якую ўзначальвае майстар Сяргей Барысенка, праводзіць тэхнічнае абслугоўванне газавага абсталяваня ў жылым сектары. Асаблівая ўвага пры гэтым надаецца не толькі стану катлоў і калонак, але і дымавентыляцыйным каналам. Калі выявіцца, што ў дымаходзе няма цягі, служба мае права забараніць выкарыстанне прыбораў. І робіцца гэта, перш за ўсё, дзеля бяспекі спажыўцоў.
За своечасовай дастаўкай балонаў да абанентаў, а таксама за абслугоўваннем газаразмеркавальных пунктаў, ад якіх блакітнае паліва ідзе ў кватэры, назірае намеснік начальніка Генадзь Пазняк. Патрабавальны да сабе і падначаленых, ён заўсёды адказна падыходзіць да выканання пастаўленых задач.
Некалькі год назад на прадпрыемстве адкрылася газавая аўтазаправачная станцыя. Яе аператар Аляксандр Быстрык лічыць, што за такімі АЗС – будучыня. Сёння на выкарыстанне прапан-бутана замест бензіна перайшлі многія арганізацыі раёна і не прагадалі. Безумоўна, галоўная перавага ўстаноўкі на аўтамабілі газавага абсталявання ў кошце паліва. Але ёсць і іншыя плюсы, напрыклад, такая тэхніка менш небяспечная для навакольнага асяроддзя і здароўя чалавека.
Напярэдадні прафесійнага свята начальнік цэха Рыгор Леанідавіч выказаў супрацоўнікам газавай гаспадаркі глыбокую ўдзячнасць за добрасумленную працу, пажадаўшы ім і іх сем’ям здароўя і аптымізму, светлых надзей і новых дасягненняў.