Раённы камітэт ГА “БРСМ” адгукнуўся на кліч дапамагчы ў навядзенні парадку на могілках вёскі Бераснёўкі. За высечку хмызняку і падграбанне сухога лісця дружна ўзяліся 18 юнакоў і дзяўчат.
Актыўны ўдзел у суботніку прынялі пярвічныя арганізацыі КСУП “Малажынскі”, раённага вузла паштовай сувязі, райспажыўтаварыства, ветстанцыі, тэрытарыяльнага цэнтра сацыяльнага абслугоўвання насельніцтва, ПМК №91, Крыўчанскай БАШ і Малажынскай САШ. Разам з моладдзю працаваў і старшыня Малажынскага сельскага выканаўчага камітэта Уладзімір Прусянок. Некалькі гадзін напружанай работы – і значная частка могілак была ачышчана ад зарасніку, сухога галля і смецця.
Першы сакратар РК ГА “БРСМ” Наталля Фурс выказвае падзяку ўсім, хто выйшаў на суботнік. Лідар аб’яднання падкрэсліла, што яе вельмі парадавала стаўленне моладзі да работы і тое, з якім ірвенем яны ўзяліся за справу. Падтрыманне парадку на тэрыторыі могілак – гэта свайго рода даніна павагі пахаваным тут людзям. Нельга дапускаць, каб яна знаходзілася ў недагледжаным, запушчаным стане.