Раскрыць злачынства супрацоўнікам РАУС дапамаглі вартаўнікі КСУП “Пераможнік”, за што атрымалі ад праваахоўных органаў падзяку і сертыфікаты на 200 тысяч рублёў кожны.
Іван Зінько і Сяргей Міхаленка ў той вечар, як і звычайна, знаходзіліся на працоўным месцы. Яны – вартаўнікі на МТФ “Малейкі”. Калі чарговы раз абыходзілі свае ўладанні, у адным з хлявоў заўважылі незнаёмцаў. Нечаканыя госці вялі сябе, як на ўласным падворку, адвязвалі бычка. Убачыўшы, што яны тут не адны, злодзеі кінуліся наўцёкі. Аднак вартаўнікі змаглі разгледзець аднаго з іх, запомнілі дзяржнумар аўтамабіля.
Званок па телефоне 102 і следча-аператыўная група выязджае на месца. Па прыкметах, якія паведамілі пільныя ахоўнікі дзяржмаёмасці, супрацоўнікі міліцыі хутка выявілі падазроных. Імі аказаліся жыхары Брагіна. Дарэчы, людзі, на якіх і не падумаў бы: настаўнік, вадзіцель кіраўніка адной з арганізацый раёна і індывідуальны прадпрымальнік. Дагэтуль яны не былі замешаны ў крымінальных справах, лічыліся прыстойнымі грамадзянамі.
Аднак у ходзе праверкі аператыўнікамі ўстаноўлена, што даныя асобы яшчэ раней здзейснілі некалькі крадзяжоў маладняку з сельгаспрадпрыемстваў. Высветлілася, куды дзеліся і двое цялят з МТФ “Юркавічы”, аб прапажы якіх КСУП “Малажынскі” заяўляў у верасні. Іншымі словамі, дзякуючы добрасумленнай працы і пільнасці Івана Пятровіча і Сяргея Мікалаевіча раскрыты шэраг злачынстваў, а магчыма, і прадухілены чарговыя крадзяжы, якія яшчэ магла здзейсніць затрыманая тройца.
Начальнік раённага аддзела ўнутраных спраў Валерый Чэкан выказаў словы падзякі вартаўнікам КСУП “Пераможнік” і ўручыў ім грашовыя сертыфікаты, якія можна абмяняць на тавар у магазінах райспажыўтаварыства.