Фестываль дзіцячай эстраднай песні і танца “Зорная карусель” у шосты раз сабраў на брагінскай зямлі юных зорачак з пяці раёнаў Гомельшчыны. Сёлета перад яго ўдзельнікамі гасцінна расчыніў дзверы Буркоўскі цэнтр культуры і вольнага часу.
Фестываль праходзіў пад назвай “У гасцях у казкі”. І на сцэне разгарнулася сапраўднае касцюміраванае прадстаўленне, дзе кожная песня была па-свойму абыграная, кожны танцавальны нумар пастаўлены з фантазіяй і выдумкай. Юныя таленты, якія сталі казачнымі героямі, са ўсёй аддачай ператварылі свае выступленні ў яскравае шоу, якое працягвалася амаль чатыры гадзіны. Шмат часу спатрэбілася і журы, каб вызначыць пераможцаў.
Лепшыя творчыя калектывы і выканаўцы ўзнагароджаныя дыпломамі фестывалю і каштоўнымі падарункамі, якія ўручыла галоўны спецыяліст раённага аддзела культуры Таццяна Высоцкая. Прыемна, што атрымалі іх і нашы землякі. Так, першае месца ў выкананні сольнага эстраднага танца заняла Крысціна Зуеўская (Брагінская дзіцячая школа мастацтваў). На трэцім месцы ў гэтай жа намінацыі – Алена Харошка, таксама з Брагінскай ДШМ. “Бронзу” заваявала танцавальная група “Джаз-Хэнд”. Дыпломы ІІІ ступені атрымалі прадстаўнікі Камарыншчыны Яна Грышаненка (вакальнае сола), дуэт Дзіяны Хмелянок і Віялеты Міроненкі (канферансье).
Каралём і каралевай эстрады былі прызнаны юныя артысты з Хойніцкага раёна. А вось “Залаты ключык” – галоўны прыз “Зорнай каруселі” – зноў накіраваўся ў Ветку, трэці год запар.
Ідэя правядзення фестывалю дзіцячай эстраднай песні і танца зарадзілася ў 2007 годзе. Спачатку ў ім прымалі ўдзел толькі маленькія зорачкі Брагіншчыны. Але з цягам часу межы музычнага конкурсу пашырыліся, прыцягнуўшы ўвагу прадстаўнікоў суседніх раёнаў, якія сталі моцнымі канкурэнтамі нашым хлопчыкам і дзяўчынкам у вобласці вакалу і танцаў. Таму сёння пачынаючым арыстам брагінскай сцэны трэба шмат працаваць, каб назад “адваяваць” асноўную ўзнагароду – “Залаты ключык”. Магчыма, гэта здарыцца ў наступным годзе. Таму жадаем ім поспехаў на шляху да гэтай мэты.
Як адзначаюць арганізатары “Зорнай каруселі” – раённы аддзел культуры і райвыканкам, асноўная задума фестывалю – развіццё дзіцячай творчасці, пошук і падтрымка юных талентаў, выхаванне ў іх любові да музыкі. І менавіта такія спаборніцтвы на сцэне спрыяюць гэтаму. Няхай сёлетняе выступленне для многіх маленькіх зорачак было хвалюючым, але наступныя крокі ў мастацтва яны будуць рабіць больш упэўнена.
