Палата прадстаўнікоў – ніжняя палата парламента нашай краіны, у яе склад уваходзяць 110 дэпутатаў. Менавіта іх беларусы і будуць выбіраць 23 верасня. Вядома, што асноўная функцыя Нацыянальнага сходу (так называецца парламент) – законатворчая. Дэпутаты распрацоўваюць, абмяркоўваюць і прымаюць законы, накіраваныя на вырашэнне праблем, якія стаяць перад грамадствам.
Што думае наконт гэтага моладзь Брагіншчыны? Што ведаюць юнакі і дзяўчаты аб падзеі, якая чакае нас? Ці гатовы яны зрабіць сур’ёзны і асэнсаваны выбар?
Сяргей ШКУРКО, студэнт Гомельскага дзяржаўнага тэхнічнага ўніверсітэта імя Пятра Сухога:
– Нельга не заўважыць, як з часам змяняецца свет і як сваё месца ў гэтым новым свеце заваёўвае Беларусь, а мне неабыякавы яе лёс. Галасаваць за заканадаўчую ўладу – значыць галасаваць за будучае краіны, якое, перш за ўсё, залежыць ад нас, маладога пакалення. Упэўнены, што кандыдат у дэпутаты, які набярэ пераважную колькасць галасоў і пройдзе ў парламент, будзе варты гэтага. Таксама пайду на выбары з надзеяй, што новы склад Палаты прадстаўнікоў зверне большую увагу на законапраекты, якія датычаць менавіта маладзёжнай палітыкі.
Тамара ГЕЛЕТА, студэнтка Мазырскага педагагічнага ўніверсітэта:
– 23 верасня мне давядзецца галасаваць першы раз у жыцці, таму на выбары пайду абавязкова. Хачу зведаць пачуцці чалавека, які ставіць знак насупраць прозвішча кандыдата ў бюлетэні, кідае ў урну запоўнены лісток. Больш таго, хачу актыўна ўдзельнічаць у палітычным жыцці краіны і лічу, што для дабрабыту дзяржавы важна меркаванне кожнага. Калі малады чалавек жадае чаго-небудзь дасягнуць у жыцці, ён павінен праяўляць актыўнасць .
Марына ФЕДЧАНКА, будучы таваравед:
– Асабіста я на выбарчы ўчастак пайду з мэтай ажыццявіць сваё канстытуцыйнае права і прыняць удзел у фарміраванні парламента. Людзі, якіх мы выберам у Палату прадстаўнікоў Нацыянальнага сходу, наступныя чатыры гады будуць прымаць законы, па якіх нам давядзецца жыць. Таму да выбараў стаўлюся сур’ёзна, хоць і буду галасаваць упершыню. Я ведаю, што гэта вельмі важная для ўсёй краіны падзея, і не хачу, каб яна прайшла міма.
