НА МЯСЦОВАЙ СЫРАВІНЕ

Сельское хозяйство

Цэх па перапрацоўцы насення рапсу на базе ААТ “Брагінаграсэрвіс” быў адкрыты ў лістападзе 2010 года. Падзея гэта прайшла без лішняй мітусні, спакойна і нават неяк будзённа. Так захацелі нямецкія партнёры, якія манціравалі абсталяванне і навучалі нашых спецыялістаў. Дарэчы, немцы прыязджаюць сюды і зараз, праводзяць гарантыйнае абслугоўванне вузлоў і агрэгатаў.


І вось мы зноў у цаху, дзе даводзілася бываць часта  за два гады. Няма ўжо той разгубленасці ад убачаных складаных механізмаў, як у першы раз. Прывычныя рабочыя абставіны, два прасоўшчыкі-аджымшчыкі Аляксандр Калівошка і Уладзімір Паўленка сочаць за працэсам перапрацоўкі рапсу. Насенне алейнай культуры з дапамогай спецыяльнага прыёмніка трапляе ў млын, дзе ачышчаецца, прасейваецца. Потым ідзе ў бункер, адтуль падаецца ў агрэгат, які размяркоўвае яго. На выхадзе атрымліваюць алей і грануляваны жмых. Потым алей фільтруецца, ачышчаецца і выліваецца ў бочку ўмяшчальнасцю 60 тон. Які ён па якасці: тэхнічны ці харчовы, пакажа аналіз.


Як растлумачылі нам у адкрытым акцыянерным таварыстве, гэта залежыць ад сыравіны, якая сюды паступае. Калі яна доўга ляжала пад адкрытым небам, харчовага алею з яе не атрымаеш. Лінія разлічана на шэсць тысяч тон. Сёлета аграрыі раёна вырасцілі нядрэнны ўраджай рапсу, ААТ “Брагінаграсэрвіс” згодна з заключанымі дагаворамі паставілі 3200 тон. Не выканалі пакуль дагаворныя ўмовы дзве гаспадаркі. Паколькі забяспечанасць сыравінай складае 50%, разлічваюць на сланечнік, якога пасеялі больш за тысячу гектараў.  Суседнія раёны – Лоеўскі і Хойніцкі – таксама ўнеслі свой уклад, але іх доля мізэрная: 25 і 60 тон (узаемаразлік за прыгатаваныя ім камбікармы млынам на колах). Яго “Брагінаграсэрвіс” набыў нядаўна, і не прагадаў. Працуе бесперабойна, а заявы прыняў да 1 верасня. Вадзіцель Сяргей Гаўрыленка не змог выкарыстаць усе дні адпачынку, настолькі запатрабаваны паслугі млына ў аграрыяў.


У касу прадпрыемства ён прыносіць кожны месяц 70-80 млн рублёў, не пакрыўджаны   заробкам  і вадзіцель.   Ён  гэтага  заслужыў. Майстры-наладчыкі фірмы, якая  выпускае млыны, адзначаюць, што па дагледжанасці, тэхнічным стане  машына ў руках Сяргея Гаўрыленкі – найлепшая з усіх, якія працуюць у рэспубліцы.


У новых эканамічных умовах дырэктару Сяргею Набоку і яго спецыялістам   даводзіцца   няпроста. Часам падводзяць партнёры: не разлічваюцца своечасова за атрыманую прадукцыю. На  23 жніўня доўг спажыўцоў складае 1 млрд 200 млн рублёў. А заработная плата калектыву пакуль не выплачана… Такія няўвязкі не лепшым чынам адбіваюцца на дзейнасці прадпрыемства.  Не пашанцавала і ў тым плане, што мінулагодняя інфляцыя, скачкі курсу валют прынеслі дадатковыя страты. Крэдыт у еўра (600 тысяч) бралі па адным, больш нізкім, а аддаваць прыходзіцца па сённяшнім, даволі высокім. Але ж аптымізму і надзеі не страчваюць, калектыў працуе стабільна і плённа. Ад перапрацоўкі рапсу атрымліваюць кожны месяц 50 млн рублёў, аказваюць аграрыям і іншыя паслугі, шукаюць дадатковыя крыніцы заробку. Рэалізацыя новага праекта “Пашырэнне цэха па перапрацоўцы рапсу”, на які разлічваюць, павінна вырашыць усе фінансавыя праблемы.


Ніна СІНІЛАВА



Пакінуць адказ

Ваш адрас электроннай пошты не будзе апублікаваны. Неабходныя палі пазначаны як *