Сёння – дзень шанавання ветэранаў органаў унутраных спраў Рэспублікі Беларусь. І сёння спаўняецца 95 год з дня заснавання савецкай міліцыі. Словазлучэнне даўно адышло ў гісторыю, але засталося ў памяці тых, хто пачынаў свой працоўны шлях менавіта ў яе радах.
Стварэнне савецкай міліцыі, у тым ліку і на Брагіншчыне, пачалося з прыняцця пастановы Саўнаркама ад 28 кастрычніка (па новым стылі – 10 лістапада) 1917 года “Аб працоўнай мілі-цыі”. У хуткім часе на тэрыторыі Брагінскай воласці была ўсталявана Савецкая ўлада і створаны рэвалюцыйны камітэт, які ажыццяўляў тады функцыі міліцыі.
Праз год на тэрыторыі сённяшняга раёна былі сфарміраваны чатыры валасныя міліцыі: Брагінская, Мікуліцкая, Савіцкая і Камарынская. Акрамя гэтага, тут дзейнічаў конны міліцэйскі атрад, які прымаў удзел у баях супраць бандытаў і белапалякаў. Сёння імем яго камандзіра Фёдара Скарахода названа адна з вуліц райцэнтра.
У 1926 годзе ствараецца Брагінскі раён і дзве валасныя міліцыі – Брагінская і Мікуліцкая, аб’яднаўшыся, склалі аснову раённага аддзялення.
У гады Вялікай Айчыннай вайны асноўная частка міліцыянераў пайшлі на фронт. Тыя, хто застаўся, вялі барацьбу з нямецка-фашысцкімі захопнікамі ў тыле. Напрыклад, Іван Валасенка быў адным з арганізатараў партызанскага руху.
Чарговым суровым выпрабаваннем для супрацоўнікаў міліцыі, як і для ўсіх жыхароў Брагіншчыны, стала аварыя на Чарнобыльскай АЭС і ліквідацыя яе наступстваў. Асабовы састаў штодня быў задзейнічаны ў арганізацыі патрулявання ў зоне адчужэння і эвакуацыі насельніцтва, нёс вахту на кантрольна-прапускных пунктах “Глухавічы”, “Піркі”, “Астрагляды”. Пры гэтым трэба было не толькі сачыць за парадкам, але і растлумачваць людзям сітуацыю, якая складвалася тады ў раёне.
Усе, каму давялося служыць у гады СССР, працягваюць лічыць сваім асноўным прафесійным святам дзень 10 лістапада. Тым не менш, сёння – гэта дзень шанавання ветэранаў органаў унутраных спраў Беларусі.
Ветэранская арганізацыя РАУС налічвае 32 чалавекі, некаторыя з іх дагэтуль працуюць у аддзеле. Трэба адзначыць, што многія з ветэранаў службы з’яўляюцца нашымі частымі гасцямі, ніколі не адмаўляюць у просьбе сустрэцца з моладдзю, падзяліцца вопытам.
Калектыў Брагінскага РАУС віншуе ветэранаў органаў унутраных спраў са святам, жадае ўсім моцнага здароўя, дабрабыту, узаемаразумення і душэўнай цеплыні.
Вячаслаў ЛЫСЯНОК,
намеснік начальніка РАУС
па ідэалагічнай рабоце і кадравым забеспячэнні
