Пра іх гаворыцца мала, хаця роля галоўных спецыялістаў у паспяховым развіцці аграпрамысловага комплексу не апошняя. Іх калегі з перыферыі хвалююцца за справы на вытворчасці толькі ў сваёй гаспадарцы, у той час як яны – ва ўсім раёне. І адказнасць нясуць не меншую. Распра-цоўваюць новыя ідэі, укараняюць сучасныя тэхналогіі, абсталяванне, кантралююць, дапамагаюць, раяць, бывае, і спрачаюцца.
Пётр Пінчук закончыў Віцебскую дзяржаўную акадэмію ветэрынарнай медыцыны ў 1999-м годзе і прыехаў да нас у раён. Працаваў спачатку ў СВК “Агра-Лідар”, потым – у ветстанцыі, апошнія шэсць гадоў займае пасаду галоўнага заатэхніка ўпраўлення сельскай гаспадаркі і харчавання. Захапляецца спортам.
Наталля Купрыенка – галоўны спецыяліст па закупках і якасці сельгаспрадукцыі. Яна выпускніца Пінскага мяса-малочнага тэхнікума, сваім ведам знайшла прымяненне на Брагіншчыне. У свой час узначальвала малаказавод, зараз сочыць за тым, каб малако адпраўлялася на перапрацоўку належнай якасці.