Першая сустрэча з механізатарам КСУП “Брагінка” Русланам Нікалаевым у нас адбылася ў 2008 годзе. Не скажу, што ён быў рады мясцовым журналістам, якія прыехалі на поле ў час пасяўной кампаніі. Вясна, красавік, на ўліку – кожная гадзіна, і яму, відаць, не хацелася перапыняць работу. Рухавік трактара не заглушаў, выскачыў з кабіны на хвіліну, каб фотакарэспандэнт Вольга Паляшчук паспела зрабіць здымак для газеты. Аб гэтым прасіла дырэктар гаспадаркі Тамара Кудан, якая ведала яго здольнасці і адносіны да сваіх абавязкаў. Тая пасяўная была чацвёртая па ліку ў яго працоўнай біяграфіі, да ўсяго праводзіў яе на новай тэхніцы вытворчасці “Гомсельмаша” з камбінаваным агрэгатам, які за адзін праход выконваў тры аперацыі.
Лістапад 2012-га. Мы зноў у гаспадарцы з той жа мэтай: убачыцца з Русланам, цяпер ужо – пераможцам раённага спаборніцтва сярод трактарыстаў-машыністаў. За гэтыя чатыры гады ўзмужнеў, пасталеў, але застаўся такім жа адказным і ў нейкай ступені катэгарычным. На ўсё мае свой пункт гледжання, не разумее тых, хто едзе ў заробкі ў суседнюю рэспубліку і вяртаецца адтуль або без грошай, або з часткай той сумы, якую павінен быў атрымаць. Калі ты нечага варты, цябе ацэняць і тут. Так і атрымалася. У РДК, у час шанавання лепшых працаўнікоў аграпрамысловага комплексу, пад апладысменты прысутных намеснік старшыні райвыканкама Ганна Бабрынёва ўручыла Руслану грамату раённага выканаўчага камітэта і падарунак. Гэтай восенню ён адзін пасеяў азімыя культуры ў сваёй гаспадарцы. Да вясны, да чарговай адказнай кампаніі можна адпачываць.
У ліку ўзнагароджаных была інспектар аддзела кадраў з гэтай жа гаспадаркі Наталля Кірчук. На пасадзе – са снежня 1987 года. Закончыла Гомельскі сельскагаспадарчы тэхнікум, факультэт “Правазнаўства”, атрымала спецыяльнасць “Юрыст”. Свае абавязкі сумяшчае з сакратарскімі, хаця гэтым дзейнасць Наталлі Уладзіміраўны не абмяжоўваецца. У яе рознабаковыя веды, што заўсёды дарэчы, бо за кансультацыяй звяртаюцца калегі, члены калектыву. Асабліва, калі неабходна правільна аформіць адносіны з партнёрамі на атрыманне паслуг і тавараў, ды і сваю прадукцыю рэалізаваць. Кажуць, няведанне законаў ад адказнасці не вызваляе. На тое і юрысты, каб іх вывучаць і прымяняць на практыцы. Трэба быць застрахаванымі і ад непрыемнасцей, бо партнёры бываюць розныя, у тым ліку і нядобрасумленныя.
А вось што недаравальна інспектару па кадрах, дык гэта няправільнае звальненне або прыём на працу. Такіх выпадкаў у Наталлі Кірчук не было. Калектыў КСУП “Брагінка”невялікі: 104 чалавекі. У апошні час сюды прыходзяць жывёлаводы з суседніх гаспадарак, бо дырэкцыя забяспечвае іх жыллём. Першы чалавек, да якога звяртаюцца, – Наталля Уладзіміраўна. Мець зносіны з прафесіяналам, да таго ж тактоўнай і абаяльнай жанчынай, прыемна.
Ніна СІНІЛАВА
