На мінулым тыдні Гомельшчына адзначала 75-годдзе з дня ўтварэння. Да гэтай падзеі былі прымеркаваны многія знакавыя мерапрыемствы, у тым ліку і адкрыццё ў Камарыне аддзялення кругласутачнага знаходжання для грамадзян пажылога ўзросту Брагінскага тэрытарыяльнага цэнтра сацыяльнага абслугоў-вання насельніцтва. Сведкамі гэтага ўрачыстага моманту сталі намеснік старшыні аблвыканкама Віктар Трызна, старшыня райвыканкама Аляксандр Ятчанка і іншыя пасадавыя асобы.
Двухпавярховае памяшканне былога дзіцячага садка было пабудавана каля 40 гадоў назад. Пасля ў ім размяшчалася паліклініка. І вось зараз яно гатова прыняць людзей састарэлага ўзросту. Плануецца, што ў інтэрнаце будуць жыць адзінокія пажылыя людзі і грамадзяне, якія ў сілу свайго ўзросту і дрэннага здароўя маюць патрэбу ў спецыяльным доглядзе.
Установа адпавядае ўсім умовам камфортнага пражывання, з сучасным інтэр’ерам. Да паслуг пастаяльцаў – двух-, трох- і чатырохмесныя ўтульныя пакоі. Дарэчы, у кожным ёсць тэлевізар. Акрамя таго, глядзець любімыя тэлеперадачы яны змогуць і ў фае, дзе стаіць мяккая мэбля. Абедаць будуць у прасторнай сталовай. Пры гэтым на кожным паверсе ёсць халадзільнікі, дзе можна захоўваць асабістыя прадукты харчавання.
Персанал аддзялення – мясцовыя жыхары. Для іх створана 15 працоўных месцаў. Спектр паслуг установы: пражыванне, харчаванне і кругласутачны догляд. Медыцынскіх паслуг тут аказваць не плануюць, але неабходны медыцынскі мінімум састарэлым прадугледжаны – і ціск памераюць, і за прыёмам лекаў прасочаць.
Застаецца спадзявацца, што пастаяльцам у аддзяленні спадабаецца, што тут ім будзе ўтульна, камфортна і бяспечна. І што адчуюць сябе тут яны як дома, а некаторыя нават і лепш, бо тут яны не будуць адзінокія.
Дарэчы, на рэканструкцыю будынка абласныя і раённыя ўлады выдзелілі больш за 2,5 млрд рублёў.