Катанне на каньках – адна з любімых зімовых забаў многіх дзяцей. Менавіта таму ў гэтыя выхадныя лядовая пляцоўка, падрыхтаваная Брагінскай ДЮСШ, была проста запоўнена чырванашчокімі і задаволенымі юнымі аматарамі канькабежнага спорту.
Каток
Увечары — цукеркі й торт,
А зараз — канькабежны спорт.
Выходжу з мамай, мама — з татам,
А тата — з фотаапаратам.
Заходзім, а ўнутры — народу!
Відаць, не проста ім без лёду.
Бяруць білеты па чарзе —
І ўся чарга на лёд паўзе.
Сама выходжу, без падтрымкі.
(Хутчэй рабіце фотаздымкі!)
Мяне падзеннем не спалохаць:
У налакотніку мой локаць,
У накаленніку каленка —
Я выглядаю, як спартсменка.
Я правяла б жыццё на лёдзе.
Шкада, што тата кажа «годзе».