Тэма тыдня: пасланне Прэзідэнта беларускаму народу і Нацыянальнаму сходу

Тема недели

tema

Прэзідэнт Беларусі Аляксандр Лукашэнка 21 красавіка прыняў удзел у сумесным пасяджэнні Палаты прадстаўнікоў і Савета Рэспублікі Нацыянальнага сходу Беларусі, на якім звярнуўся са штогадовым Пасланнем да беларускага народа і Нацыянальнага сходу. На мерапрыемства былі запрошаны вышэйшыя службовыя асобы краіны, члены ўрада, кіраўнікі органаў дзяржаўнага кіравання, буйнейшых прадпрыемстваў, прадстаўнікі дыпламатычнага корпуса, сродкаў масавай інфармацыі.

Пасланне складалася з некалькіх вялікіх тэматычных блокаў, цэнтральным і самым маштабным стаў эканамічны. Самыя актуальныя пытанні былі закрануты і ў частцы, якая датычыцца сацыяльнай палітыкі: удасканаленне пенсійнай сістэмы, аховы здароўя, адукацыі. Акрамя таго, размова ішла аб прыярытэтах знешняй палітыкі Беларусі, аб кадравай стратэгіі і іншых злабадзённых пытаннях.

 

Аб эканоміцы

Гэты год павінен стаць пераломным у пераадоленні негатыўных тэндэнцый у эканоміцы — Прэзідэнт

Прэзідэнт Беларусі Аляксандр Лукашэнка адзначыў, што штогадовае Пасланне не прэтэндуе на ролю доўгатэрміновай праграмы стратэгіі развіцця краіны. Размова аб гэтым пойдзе на маючым адбыцца пятым Усебеларускім народным сходзе. Сённяшняя размова, паводле слоў Прэзідэнта, будзе аб мэтах бліжэйшай перспектывы і канкрэтных задачах на гэты год.

«Я надаю яму, як і вы, асаблівае значэнне па многіх прычынах. Але ў першую чаргу з-за таго, што з яго пачынаецца новы пяцігадовы этап развіцця. Ён павінен стаць пераломным у пераадоленні негатыўных тэндэнцый у эканамічнай сферы», — падкрэсліў Аляксандр Лукашэнка.

Прэзідэнт звярнуў увагу, што ў апошнія 2-3 гады тэмпы развіцця ў эканоміцы запаволіліся. «І хоць асноўную ролю ў гэтым адыгралі знешнія фактары, тым не менш, трэба прызнаць і свае недапрацоўкі. Мы адстаём ад перадавых краін па ўзроўні прадукцыйнасці працы, затратах энергіі, матэрыялаў і ў канчатковым выніку па канкурэнтаздольнасці тавараў і паслуг. Пагрозам нашай эканамічнай бяспецы мы павінны проціпаставіць арганізаванасць і ініцыятыву, мабілізацыю ўсіх рэсурсаў і ўменне эфектыўна гаспадарыць. Аб гэтым мы гаварылі не раз», — нагадаў кіраўнік дзяржавы.

Аляксандр Лукашэнка дадаў, што 2016 год стане сур’ёзным экзаменам для ўсіх галін улады і кіраўніцкіх структур, ён пакажа, хто на што здольны ў пераадоленні цяжкасцей.

Сярод іншых асаблівасцей года Прэзідэнт назваў правядзенне важнага палітычнага мерапрыемства — парламенцкіх выбараў. «Важнасць гэтай палітычнай кампаніі для краіны несумненна. Яна будзе экзаменам палітычнай культуры нашага грамадства. І спадзявацца на тое, што ў нас людзі да гэтага гатовы, палітычна культурныя — нельга. Людзей і грамадства да гэтага трэба рыхтаваць», — сказаў Прэзідэнт.

Лукашэнка абазначыў прыярытэтныя напрамкі для зніжэння затрат на прадпрыемствах

«Усе рашэнні, якія датычацца эканомікі, у гэтым годзе канкрэтызаваны і прыняты. Іх проста трэба рэалізаваць. Прамым указаннем да дзеяння з’яўляецца ўказ ад 23 лютага 2016 года нумар 78. У ім вызначаны асноўныя напрамкі работы, вельмі дакладна распісана кожнаму, што і як рабіць. Спынюся на галоўным — на фактарах росту і рэзервах, якія могуць забяспечыць устойлівае развіццё», — сказаў кіраўнік дзяржавы.

Паводле слоў Аляксандра Лукашэнкі, першым з іх з’яўляецца зніжэнне ўсіх відаў затрат на вытворчасць і рэалізацыю прадукцыі.

«Гэта стратэгічны напрамак павышэння канкурэнтаздольнасці эканомікі. Ён датычыцца кожнага рабочага месца, тэхналагічнага ўчастка, завода, сельгаспрадпрыемства, рэгіёна і галіны. Хачу асабліва падкрэсліць, што перад дзяржаўнымі органамі пастаўлена задача забяспечыць зніжэнне сабекошту не менш як на 25 працэнтаў. І яна павінна быць выканана», — адзначыў ён.

Прэзідэнт растлумачыў, што ў першую чаргу стаўку трэба рабіць на ўкараненне эфектыўных метадаў кіравання, выкарыстанне сучасных стандартаў якасці і тэхналагічных рэгламентаў. «Тут прамое даручэнне міністрам — значную долю зніжэння затрат трэба забяспечыць менавіта за кошт гэтых фактараў. Яшчэ раз прапрацуйце пытанне аб скарачэнні невытворчых расходаў, адмоўцеся ад тых капітальных укладанняў, якія ў бліжэйшы час не дадуць аддачы», — канстатаваў Аляксандр Лукашэнка.

Істотным фактарам зніжэння сабекошту прадукцыі з’яўляецца адмова прадпрыемстваў і арганізацый ад нядобрасумленных пасрэднікаў, якія выкарыстоўваюць шэрыя схемы для накруткі цэн на сваю карысць пры пастаўках сыравіны, запчастак або камплектуючых дэталей, асабліва з-за межаў краіны. «І я папрасіў бы адказных асоб ва ўрадзе, міністэрствах, кіраўнікоў, калі я гавару аб пасрэдніках — не чакайце дадатковых указанняў і законапраектаў. Вы ведаеце, што такое пасрэдніцтва, дзе і як можна яго пазбегнуць», — заявіў ён.

«Апошнім часам нашы кампетэнтныя органы выявілі шэраг абуральных фактаў. Некаторыя кампаніі закуплялі за мяжой прадукцыю, потым праводзілі яе праз свае даччыныя фірмы і прадавалі беларускім прадпрыемствам у два-тры, а тое і ў пяць разоў даражэй, і зноў грошы выводзілі ў афшоры або на падкантрольныя за межамі краіны кампаніі», — сказаў Аляксандр Лукашэнка.

Прэзідэнт падкрэсліў, звяртаючыся да віцэ-прэм’ера Міхаіла Русага і міністра сельскай гаспадаркі і харчавання Леаніда Зайца, што больш за ўсё гэта датычыцца аграпрамысловага сектара. «З аднаго боку, у прадпрыемстваў з-за гэтага значна ўзрастае сабекошт прадукцыі і зніжаюцца даходы. А з другога, з-за ўхілення ад выплаты падаткаў і вываду капіталаў за мяжу церпяць дзяржаўны бюджэт і эканоміка ў цэлым», — канстатаваў ён.

Лукашэнка даручыў ураду падрыхтаваць да 1 ліпеня дзяржпраграму інавацыйнага развіцця

«Даручаю ўраду да 1 ліпеня 2016 года забяспечыць падрыхтоўку дзяржаўнай праграмы інавацыйнага развіцця, у якой вызначыць усе ключавыя падыходы, прыярытэтныя напрамкі, першачарговыя меры і інструменты для фарміравання эканомікі ведаў», — адзначыў Аляксандр Лукашэнка.

Паводле яго слоў, стратэгіяй развіцця Беларусі становіцца пераход на шлях інавацыйнага развіцця. «І прычына не ў абмежаванасці мінеральна-сыравінных рэсурсаў. Трэнд у эканоміцы сёння зусім іншы: галоўнае багацце — гэта мазгі, навука, інавацыі, а не тое, што Гасподзь паклаў у зямлю», — заявіў Прэзідэнт.

Аляксандр Лукашэнка лічыць, што ў рэалізацыі інавацыйнай стратэгіі першае месца адводзіцца Нацыянальнай акадэміі навук і Парку высокіх тэхналогій. «Мы даўно абмяркоўвалі новы фармат работы Нацыянальнай акадэміі навук, стварэнне навуковай інавацыйна-вытворчай карпарацыі, арыентаванай на фарміраванне высокатэхналагічнага сектара на ўласнай даследчай і тэхналагічнай базе. Думаю, што сёння акадэмія навук можа інтэнсіўна развіваць касмічную дзейнасць, нана- і біяіндустрыю, робататэхніку», — сказаў кіраўнік дзяржавы. Ён падкрэсліў, што сумесна з ДКНТ і ПВТ акадэмія навук павінна стаць рухаючай сілай тэхналагічнага развіцця нацыянальнай эканомікі.

Аляксандр Лукашэнка таксама адзначыў, што павышэнне эфектыўнасці інстытутаў інавацыйнага развіцця — НАН Беларусі, Парка высокіх тэхналогій, Кітайска-беларускага індустрыяльнага парка і тэхнапаркаў — павінна быць пастаянна ў полі зроку кіраўніцтва краіны, і перш за ўсё ўрада. «Ацэньваць іх дзейнасць трэба не па затратным прынцыпе, а па рэальнай аддачы ад капіталаўкладанняў у навуковую сферу, каб яна сапраўды працавала на ўздым краіны, а не на задавальненне асабістай цікаўнасці вучоных за дзяржаўны кошт», — заявіў Прэзідэнт.

Прэзідэнт Беларусі Аляксандр Лукашэнка адзначыў, што лічыць нездавальняючай работу па стварэнні Кітайска-беларускага індустрыяльнага парка «Вялікі камень». «Работа вядзецца вельмі дрэнна. У бліжэйшы час там будуць прыняты вельмі строгія меры, у тым ліку кадравыя», — адзначыў Аляксандр Лукашэнка.

Паводле яго слоў, на тэрыторыі парка павінны быць створаны прадпрыемствы паслязаўтрашняга дня. «Прадпрыемствам учарашняга і сённяшняга дня на гэтай пляцоўцы няма чаго рабіць. Ведаеце, па якіх прычынах? Перш за ўсё, прадукцыю мы не зможам рэалізаваць тут, у Еўрапейскім саюзе і свеце наогул», — растлумачыў Прэзідэнт.

Ён падкрэсліў, што цяпер Беларусь актыўна шукае новыя кропкі росту эканомікі, якія дадуць устойлівую дынаміку яе развіцця. Кітайска-беларускі індустрыяльны парк павінен стаць такой кропкай. «Тут ствараецца пляцоўка для прыцягнення высокатэхналагічных і канкурэнтаздольных праектаў», — сказаў Аляксандр Лукашэнка.

Лукашэнка: у праблемныя прадпрыемствы неабходна ўдыхнуць новае жыццё за кошт інвестыцый і тэхналогій

«Асноўнай стратэгіяй развіцця і асновай дзяржаўных прадпрыемстваў павінны стаць эфектыўнасць і прыбытковасць. Кожнае праблемнае прадпрыемства неабходна разгледзець зыходзячы з перспектыў яго дзейнасці. Але закрыццё прадпрыемстваў — гэта не перспектыва, размова ідзе аб ліквідацыі неэфектыўнай дзейнасці, а не прадпрыемстваў і калектываў. Гэта значыць аб тым, каб удыхнуць у іх новае жыццё за кошт інвестыцый, новых тэхналогій, новых сістэм кіравання, новых вытворчасцей», — адзначыў Аляксандр Лукашэнка.

Кіраўнік дзяржавы падкрэсліў, што калі нейкае прадпрыемства і будзе закрыта, то на яго месцы абавязкова павінна з’явіцца новае прадпрыемства. «Каб людзі кожную раніцу мелі магчымасць пайсці на работу, сумленна ўкласці сваю працу, атрымаць зарплату і пракарміць сваю сям’ю. Вось адзінае патрабаванне», — падкрэсліў Прэзідэнт.

Лукашэнка: на кожнае скарочанае месца павінна быць створана новае, больш прадукцыйнае

«Для зніжэння затрат на вытворчасць не абысціся без аптымізацыі колькасці работнікаў. Гэта азначае, што на кожнае скарочанае месца павінна быць створана новае, больш прадукцыйнае. Задача няпростая. Патрэбны высокатэхналагічныя інвестыцыі і падрыхтоўка высокакваліфікаваных кадраў», — адзначыў кіраўнік дзяржавы.

«Я ўжо гаварыў, калі раптам на МАЗе, БелАЗе, МТЗ або іншых прадпрыемствах адбываецца аптымізацыя і вызваляецца энная колькасць работнікаў, то гэтых людзей кіраўнікі разам з мясцовымі органамі ўлады павінны працаўладкаваць на новым рабочым месцы, а не выкідваць на вуліцу. Я гэта гавару не першы раз, але патрабаванне за гэта ў бягучым годзе будзе строгае. У гэтых пытаннях ураду, губернатарам, усёй вертыкалі ўлады неабходна працаваць на апярэджанне», — падкрэсліў Аляксандр Лукашэнка.

Прэзідэнт нагадаў, што задача штогод ствараць 50 тыс. новых рабочых месц з’яўляецца мінімальным патрабаваннем. «Падкрэсліваю, усяго толькі 50 тыс., нават не 100 тыс. і не мільён, як нам прапануюць. Каб стварыць мільён рабочых месц, трэба мець мільярды долараў. Гэта, па-першае. Па-другое, трэба мець высокакваліфікаваных работнікаў, па-трэцяе, рабочыя месцы не патрэбны ўчарашняга дня, патрэбны рабочыя месцы заўтрашняга дня. А гэта значыць, што нам трэба стварыць за год або пяць гадоў, як прапануецца, новую эканоміку Беларусі, каб на гэтыя прадпрыемствы працаўладкаваць мільён чалавек», — растлумачыў ён.

«Памятайце — рабочыя месцы ствараюцца не для справаздач, а для людзей. І яшчэ адзін аспект праблемы. Пакуль ствараюцца новыя рабочыя месцы, неабходна забяспечыць умовы і для самазанятасці людзей. Сёння сітуацыя на рынку працы даволі зменлівая, і нам трэба хутка на гэта рэагаваць», — рэзюмаваў кіраўнік дзяржавы.

Звяртаючыся да старшынь аблвыканкамаў, Аляксандр Лукашэнка падкрэсліў, што мясцовыя органы ўлады павінны сканцэнтраваць намаганні на стварэнні неабходнай інфраструктуры для новых рабочых месц у малым бізнесе і ўмоў для яго росту. «Вы, губернатары, адказваеце за тое, каб малы бізнес развіваўся ў сярэдні і буйны. Калі вам хто-небудзь або што-небудзь перашкаджае, уносьце канкрэтныя прапановы», — канстатаваў Прэзідэнт.

Лукашэнка прапануе сфарміраваць вакол БелАЭС кластар энергаёмістых вытворчасцей

«Мы павінны выкарыстоўваць перавагі ядзернай энергетыкі для фарміравання вакол АЭС кластара энергаёмістых вытворчасцей і павышэння канкурэнтаздольнасці ўсёй эканомікі. Пры гэтым публічна сёння адназначна хачу заявіць: у нас будзе «лішак» электраэнергіі пасля здачы атамнай станцыі. Я ўзяў у двукоссе: ніякага лішку не будзе і не павінна быць, калі мы правільна і своечасова да гэтага падрыхтуемся. Давайце перабудоўваць нашу эканоміку і нашых людзей на электрычнасць замест прыроднага газу, нафты», — адзначыў Аляксандр Лукашэнка.

У прыклад ён прывёў аўтамабільную вытворчасць, якая ўсё больш арыентуецца на электрамабілі. Тое ж самае датычыцца матацыклаў і веласіпедаў. «Чаму нам сёння гэтым не займацца? Чаму ў побыце не арыентаваць людзей на электрычнасць? Пры гэтым, калі ў нас будзе так званы лішак электраэнергіі, можна значна зменшыць цэны. Да гэтага трэба рыхтавацца сёння. Гэта задача дня», — падкрэсліў Прэзідэнт.

Лукашэнка даручыў забяспечыць рэалізацыю патэнцыялу мадэрнізаваных прадпрыемстваў базавых галін прамысловасці

Прэзідэнт канстатаваў, што найбольш істотнае зніжэнне тэмпаў развіцця сёння дэманструе беларускі прамысловы комплекс. «Задача ўраду — забяспечыць рэалізацыю патэнцыялу мадэрнізаваных прадпрыемстваў базавых галін прамысловасці і паскоранае развіццё новых высокатэхналагічных сектараў», — падкрэсліў Аляксандр Лукашэнка.

Беларускі лідар засяродзіў увагу на тым, што ў свеце актыўна ідзе пераход да новай прамысловай палітыкі. «Дынаміку развіцця вызначаюць новыя сектары эканомікі, заснаваныя на ІТ, бія-, нанатэхналогіях. Традыцыйныя для рынку тавары фактычна атрымліваюць новае жыццё за кошт сучасных спажывецкіх якасцей і інавацыйных рашэнняў. Гэтыя рэаліі і нам неабходна ўлічваць пры фарміраванні інвестыцыйных планаў», — адзначыў кіраўнік дзяржавы.

Ён падкрэсліў, што сельская гаспадарка — важнейшая сфера дзейнасці, якая вызначае не толькі харчовую бяспеку і сацыяльную стабільнасць у грамадстве, але і экспартны патэнцыял краіны. «Беларускія прадукты запатрабаваны. Гэта ў асноўным заслуга нашых перадавых гаспадарак. Аднак іх, на жаль, у нас недастаткова. Па выніках мінулага года амаль кожная чацвёртая сельгасарганізацыя стратная. Важнейшы элемент аздараўлення эканомікі вёскі — гэта выцягванне адсталых калектываў да ўзроўню сярэдніх, а тых у сваю чаргу — да перадавікоў. Мне ўрад у асобе Міхаіла Іванавіча Русага і Леаніда Канстанцінавіча Зайца гэта абяцаў пры назначэнні», — сказаў Прэзідэнт.

Ён нагадаў, што ўказам нумар 78 прадугледжана асаблівая персанальная адказнасць старшынь райвыканкамаў за паляпшэнне работы стратных сельскагаспадарчых арганізацый. «Яны перш за ўсё адказваюць за прадпрыемствы. Элементарнае навядзенне парадку, захаванне дысцыпліны і тэхналагічных патрабаванняў, зладжаная арганізацыя работ павінны даць сур’ёзны штуршок для пераадолення адставання», — падкрэсліў беларускі лідар.

Беларускія прадпрыемствы ўсе камерцыйныя пазыкі павінны браць самі, без дзяржгарантый

«Усе камерцыйныя пазыкі прадпрыемствы павінны браць самі, зыходзячы з існуючых бізнес-планаў, без дзяржаўных гарантый», — сказаў кіраўнік дзяржавы.

Аляксандр Лукашэнка нагадаў, што ў гэтым годзе падпісаны ўказ, які адкрывае шлях для беларускіх прадпрыемстваў на міжнародныя біржы. «Актыўней прапрацоўвайце гэтыя пытанні. Да канца года чакаю канкрэтных прапаноў», — заклікаў беларускі лідар.

Паводле яго слоў, сістэма крэдытавання інвестыцыйных праектаў у Беларусі павінна быць выбудавана максімальна эфектыўна.

Лукашэнка лічыць неабходным надаць імпартазамяшчэнню новы імпульс і сэнс

«Беларусь ужо не першы год займаецца імпартазамяшчэннем. Аднак цяпер гэтаму напрамку трэба надаць новы імпульс і сэнс. Сфер прымянення даволі шмат», — адзначыў Аляксандр Лукашэнка.

На яго думку, асноўным элементам дынамічнага імпартазамяшчэння з’яўляецца пашырэнне аб’ёмаў лакалізацыі вытворчасці на сумесных прадпрыемствах. «Маючы ў Беларусі вялікія зборачныя вытворчасці, мы да гэтага часу завозім камплектацыю з-за мяжы: крэслы, аддзелачныя матэрыялы, аўтамабільнае шкло, аўтакампаненты. А іх жа трэба рабіць у нас. Вось дзе ніша для нашых прадпрымальнікаў і напрамкі канкрэтнай работы эканамічнага штаба краіны», — сказаў Прэзідэнт.

Ён нагадаў, што ключавы параметр выніковасці работы ўрада ў гэтым напрамку вызначаны: прырост не менш як на $600 млн імпартазамяшчальнай прадукцыі штогод.

«Усе рычагі для падтрымкі бізнесу, які займаецца вытворчасцю, у губернатараў ёсць — продаж маёмасці, якая не выкарыстоўваецца, здача яе ў арэнду па даступных цэнах і іншыя», — канстатаваў кіраўнік дзяржавы.

«Дыктатура якасці» павінна стаць паказчыкам прафесіяналізму ў арганізацыі вытворчасці

«Якасць прадукцыі — гэта важнейшы складнік канкурэнтаздольнасці. На кожным прадпрыемстве «дыктатура якасці» павінна стаць паказчыкам прафесіяналізму ў арганізацыі вытворчасці», — адзначыў Аляксандр Лукашэнка.

Паводле яго слоў, сёння аслаблена патрабавальнасць да кіраўніцтва прадпрыемстваў па ўкараненні сістэм кіравання якасцю. Галіновыя стандарты ніжэйшыя за лепшыя сусветныя практыкі. «Работу па пашырэнні перадавых методык у краіне павінен узначаліць Дзяржстандарт», — лічыць Прэзідэнт.

Таксама кіраўнік дзяржавы падкрэсліў, што адной з новых кропак росту эканомікі, якія дадуць устойлівую дынаміку яе развіцця, павінна стаць «зялёная» індустрыя.

«Размова ідзе аб новых бяспечных стандартах якасці выпускаемай прадукцыі. Гэта аснова дыверсіфікацыі нашага экспарту для выхаду на рынкі развітых краін і інвестыцыі ў будучыню», — канстатаваў Аляксандр Лукашэнка.

Магутны антыманапольны орган неабходна стварыць на базе Мінгандлю — Прэзідэнт

«Мы дамовіліся ўзмацніць ролю Міністэрства гандлю як рэгулятара на ўнутраным рынку. Займіцеся развіццём канкурэнцыі, стымуляваннем прадпрымальніцкай актыўнасці для стварэння камфортнага спажывецкага асяроддзя. На базе Мінгандлю неабходна стварыць магутны антыманапольны орган, які аб’яднае ў сабе функцыі падтрымкі добрасумленнай канкурэнцыі і недапушчэння злоўжыванняў з боку манапалістаў. Гэта мэтавая задача, вырашэнне якой не дазволіць неабгрунтавана павышаць цэны», — сказаў Аляксандр Лукашэнка.

Яшчэ адзін напрамак, які, паводле слоў беларускага лідара, неабходна развіваць, — гэта самарэгуляванне ў гандлі, паляпшэнне прывабнасці гэтага віду дзейнасці ў малалікіх і аддаленых населеных пунктах. «Менавіта тут павінны больш актыўна працаваць не толькі арганізацыі Белкаапсаюза, але і прыватны бізнес, як буйныя гандлёвыя сеткі, так і індывідуальныя прадпрымальнікі. Неабходна пры гэтым прыняць меры па збліжэнні айчынных вытворцаў і спажыўцоў», — адзначыў кіраўнік дзяржавы.

Аляксандр Лукашэнка расказаў, што адзін з буйных прадпрымальнікаў паабяцаў арганізаваць у адным з раёнаў сучасную гандлёвую сетку як альтэрнатыву Белкаапсаюзу. «Калі Белкаапсаюз не дакажа сваю плацежаздольнасць, рыхтуйцеся да сур’ёзнай рэформы», — падкрэсліў беларускі лідар.

Лукашэнка гарантуе абарону правоў прадпрымальнікаў, якія сумленна вядуць сваю справу

«Дзяржава абараняе і будзе абараняць правы, уласнасць і годнасць усіх прадпрымальнікаў, якія сумленна вядуць сваю справу. Але мы маем права чакаць няўхільнага выканання законаў, «выхаду з ценю» і адмовы ад нявыплаты падаткаў», — заявіў Аляксандр Лукашэнка.

Прэзідэнт звярнуў увагу, што паляпшэнне дзелавога асяроддзя — гэта пастаянны працэс. Станоўчыя вынікі ёсць і пацвярджаюцца міжнароднымі экспертамі. «У апошняй справаздачы Сусветнага банка «Вядзенне бізнесу 2016» па паказчыку «Падаткаабкладанне» наша краіна заняла 63 месца сярод амаль 200 дзяржаў, рушыўшы наперад за пяць гадоў на 126 пазіцый. Але мы не спыняемся на дасягнутым. Мэта — увайсці ў першую трыццатку краін па ўмовах вядзення бізнесу», — падкрэсліў кіраўнік дзяржавы.

«Што ў краіне нашай перашкаджае займацца бізнесам? Усе крычалі, што дазвольны прынцып, дайце заяўны. Далі — калі ласка, ідзі, пішы заяву і займайся бізнесам. Але калі нехта хоча займацца бізнесам ва ўласных інтарэсах і так, як ён лічыць патрэбным, не ўлічваючы наша заканадаўства, тады вам не месца работы ў Беларусі. Трэба спыніць гэту спрэчку, нікому яна не патрэбна, таму што маса бізнесменаў ні на што не крыўдзіцца, яны сёння зарэгістраваліся і працуюць сумленна. Галоўнае — выплаці падаткі і можаш спакойна спаць, можаш не спаць, гэта тваё права. Але толькі аддай тое, што ты павінен аддаць дзяржаве, як і ва ўсім свеце», — заявіў Аляксандр Лукашэнка.

«Некаторыя гавораць — ах, некага там затрымалі, арыштавалі, заўтра нібы прыйдуць за іншымі. Ну, вядома, прыйдуць, калі вы будзеце так працаваць, калі вы будзеце абдзіраць дзяржаву і не плаціць падаткі. Пакажыце яшчэ адзін факт за выключэннем выплаты падаткаў, па прычыне якога затрыманы хоць адзін прадпрымальнік або бізнесмен. Пакладзіце на стол такія факты — іх няма. І маліце бога, што вы жывяце не ў Злучаных Штатах Амерыкі — я звяртаюся да тых бізнесменаў і прадпрымальнікаў, якія гэта заяўляюць», — сказаў кіраўнік дзяржавы.

Лукашэнка патрабуе ад урада і Нацбанка забяспечыць раўнавагу плацежнага балансу і бюджэту

Аляксандр Лукашэнка адзначыў, што макраэканамічная стабільнасць — гэта, перш за ўсё, нізкія цэны. «Каб іх захаваць, патрабую ад урада і Нацыянальнага банка забяспечыць раўнавагу плацежнага балансу і бюджэту. Плацежны баланс — гэта кашалёк нашай краіны. Ён фарміруецца за кошт устойлівага дадатнага сальда знешняга гандлю, росту экспарту, прыцягнення прамых замежных інвестыцый і дае магчымасць забяспечыць своечасовае пагашэнне знешніх абавязацельстваў», — сказаў беларускі лідар.

Асаблівая ўвага ў 2016 годзе павінна ўдзяляцца збалансаванаму выкананню бюджэту. «У гэтым годзе ўраду і мясцовым органам улады неабходна рэалізаваць кампенсуючыя меры падатковай палітыкі, накіраваныя як на аднаўленне даходаў бюджэту, так і на скарачэнне расходаў», — даручыў кіраўнік дзяржавы.

Урад і Нацбанк здольны пасля дэнамінацыі забяспечыць макраэканамічную стабільнасць у краіне

«Дэнамінацыя — гэта новы этап развіцця нацыянальнай грашовай сістэмы. Яна праводзіцца не толькі для зручнасці фінансавых разлікаў. Гэтым урад і Нацбанк падкрэсліваюць сваю рашучасць і здольнасць забяспечыць макраэканамічную стабільнасць у краіне. А значыць нізкую інфляцыю, нізкія працэнтныя стаўкі і аднаўленне эканамічнай актыўнасці», — адзначыў Аляксандр Лукашэнка.

«Скарыстайцеся гэтым этапам — этапам дэнамінацыі — і вырашыце пытанне і па стаўках, і па дэдаларызацыі краіны», — запатрабаваў кіраўнік дзяржавы.

Лукашэнка патрабуе актывізаваць дэдаларызацыю эканомікі

«Патрабуецца актывізаваць працэс дэдаларызацыі эканомікі, у гэтым плане нямала зроблена. Калі насельніцтва давярае сваёй валюце, захоўвае ў ёй зберажэнні, яно падтрымлівае нацыянальную эканоміку. Ужо многае зроблена для скарачэння выкарыстання замежнай валюты ў разліках на тэрыторыі краіны. Банкамі створаны прывабныя ўмовы, якія даюць магчымасць насельніцтву атрымліваць па сваіх укладах рэальны даход у рублях», — адзначыў Аляксандр Лукашэнка.

Пры гэтым кіраўнік дзяржавы акцэнтаваў увагу, што дэдаларызацыя немагчыма без змянення свядомасці, псіхалогіі людзей, якія прывыклі ўсё лічыць ва ўмоўных адзінках. «Трэба пачынаць у першую чаргу з дзяржаўных органаў. Варта ўжо ў бягучым годзе прыняць усе неабходныя рашэнні, каб максімальна адмовіцца ад прывязкі ставак падаткаў, пошлін, арэнднай платы, тарыфаў да замежнай валюты і ўстанавіць іх выключна ў беларускіх рублях», — падкрэсліў Прэзідэнт.

Ураду да 1 верасня даручана прааналізаваць заканадаўства на прадмет зразумеласці для інвестараў

«Галоўны стымул для інвестыцый — гэта выразныя і зразумелыя правілы і законы, якія выконваюць усе: як нашы айчынныя, так і замежныя інвестары. Але калі ў нас у эканоміцы ёсць такія законы, якія тармозяць працэс прыцягнення капіталаўкладанняў, то неабходна хутка рэагаваць і гібка адаптаваць да зменлівай рэальнай сітуацыі», — адзначыў беларускі лідар. У сувязі з гэтым ён даручыў ураду да 1 верасня прааналізаваць і сістэматызаваць інвестыцыйнае заканадаўства і ўнесці адпаведныя прапановы.

Аляксандр Лукашэнка пры гэтым назваў прынцыпы, якім павінна адпавядаць інвестыцыйная палітыка ў 2016 годзе. Гэта максімальнае прыцягненне прамых замежных інвестыцый, канцэнтрацыя ўкладанняў у актыўныя асноўныя сродкі (у перадавыя тэхналогіі, інфармацыйныя сістэмы, робататэхніку) і павышэнне аддачы ад укладзеных сродкаў за кошт эфектыўнасці кіравання праектамі.

Не менш як $1,5 млрд замежных інвестыцый трэба прыцягнуць за год у краіну для росту эканомікі

«У гэтым годзе для аднаўлення эканамічнага росту неабходна прыцягнуць не менш як $1,5 млрд прамых замежных інвестыцый на чыстай аснове, што дасць магчымасць замясціць адсутныя ўнутраныя рэсурсы знешнімі крыніцамі», — адзначыў кіраўнік дзяржавы.

Ён звярнуў увагу, што сёння ў свеце адным з найбуйнейшых інвестараў з’яўляецца Кітай. «Для Беларусі цяпер адкрыта крэдытная лінія на $8 млрд і абяцана пры асваенні мільярдаў долараў столькі, колькі трэба для краіны», — сказаў ён.

Пазіцыя ўрада па ініцыятыве спалучэння пояса Шаўковага шляху і ЕАЭС павінна быць актыўнай — Лукашэнка

«Актыўная пазіцыя ўрада павінна быць у рэалізацыі ініцыятывы спалучэння Эканамічнага пояса Шаўковага шляху і Еўразійскага эканамічнага саюза для ўстаранення бар’ераў і абмежаванняў у гандлі», — сказаў кіраўнік дзяржавы.

Аляксандр Лукашэнка падкрэсліў: «Найважнейшым прыярытэтам з прыярытэтаў быў і застаецца экспарт, яго рост і абавязкова дыверсіфікацыя». Сёння, канстатаваў Прэзідэнт, на традыцыйных рынках збыту айчыннай прадукцыі, у першую чаргу Расіі і Украіны, скараціўся плацежаздольны попыт. У сувязі з гэтым Беларусь не можа проста чакаць, калі ён узрасце. Таму, растлумачыў Аляксандр Лукашэнка, пастаўлена задача дыверсіфікацыі беларускага экспарту.

«Гэта задача пастаўлена нават не пазаўчора, мы яшчэ 5-7 гадоў таму загаварылі аб гэтым. Тады плацежаздольнасць нашых рынкаў была нармальнай, але мы разумелі, што залежаць так моцна ад аднаго рынку збыту нельга — гэта прывядзе да бяды. Такая тэндэнцыя сёння вырысоўваецца», — заўважыў беларускі лідар.

Пры гэтым ён прызнаў, што ў 2015 годзе для стварэння ўмоў доступу на новыя рынкі было зроблена нямала, у тым ліку на вышэйшым узроўні. Напрыклад, былі дасягнуты дамоўленасці аб пашырэнні гандлёва-эканамічнага супрацоўніцтва з Кітаем, Індыяй, Пакістанам, В’етнамам.

«Ключавым фактарам у пашырэнні экспарту з’яўляецца забеспячэнне пакетнага прынцыпу продажаў — у комплексе з пасляпрадажным абслугоўваннем, аператыўным рамонтам, дадатковым сэрвісам. Без гэтага сёння на знешнія рынкі няма чаго нос соваць», — рэзюмаваў кіраўнік дзяржавы.

Лукашэнка: $600 млн з партфеля праектаў Сусветнага банка для Беларусі да гэтага часу не задзейнічаны

«Партфель праектаў Сусветнага банка для Беларусі — амаль $1 млрд. Гэта сродкі, якія ўжо можна выкарыстоўваць. Але з іх $600 млн да гэтага часу не задзейнічаны з-за непаваротлівасці дзяржаўных органаў — цуд!», — адзначыў кіраўнік дзяржавы.

Аляксандр Лукашэнка звярнуў увагу, што да канца года гэтыя пытанні павінны быць вырашаны.

Лукашэнка: праграма з МВФ не панацэя, але індыкатар адкрытасці беларускай эканомікі

У супрацоўніцтве з міжнароднымі фінансавымі арганізацыямі закладзены вялікі інвестыцыйны патэнцыял. «Гэта адкрые дзверы для многіх буйных інвестараў. Асаблівай увагі патрабуе развіццё супрацоўніцтва з Міжнародным валютным фондам. Праграма з МВФ — гэта не панацэя, але індыкатар адкрытасці нашай эканомікі», — выказаў упэўненасць беларускі лідар.

Паводле слоў Аляксандра Лукашэнкі, размаўляць з МВФ беларускі бок павінен, абараняючы свае інтарэсы, «даказваючы, расказваючы, патрабуючы таго, каб нас разумелі на перагаворным працэсе».

Міжнародны валютны фонд — спецыялізаваная ўстанова ААН са штаб-кватэрай у Вашынгтоне (ЗША), створаны ў 1945 годзе. Беларусь з’яўляецца членам МВФ з 1992 года.

Лукашэнка запатрабаваў устараніць бюракратычныя бар’еры для прыцягнення ў эканоміку сродкаў МФА

«Патрабую ў самыя кароткія тэрміны ўстараніць усе так званыя заканадаўчыя перашкоды для прыцягнення ў эканоміку краіны сродкаў міжнародных фінансавых арганізацый. Гаворачы простай мовай, устараніць усялякія бюракратычныя бар’еры», — адзначыў кіраўнік дзяржавы.

Ён таксама даручыў ураду завяршыць у самыя кароткія тэрміны спрашчэнне парадку заключэння міжнародных дагавораў.

 

Аб сацыяльнай палітыцы

На прынцыпах сацыяльнай справядлівасці стаялі і стаяць будзем — Лукашэнка

«У цяперашніх умовах для дзяржавы вельмі няпроста прытрымлівацца сацыяльнай накіраванасці і прынцыпаў сацыяльнай справядлівасці. Але мы на гэтым стаім і будзем стаяць, нягледзячы на складанасці», — запэўніў Аляксандр Лукашэнка.

«У маёй перадвыбарнай праграме ў ліку важнейшых задач названа развіццё Беларусі як сацыяльнай дзяржавы, асноўны клопат якой — ствараць умовы для раскрыцця чалавечага патэнцыялу, — адзначыў беларускі лідар. — Я зыходжу з таго, што ўзровень цывілізаванасці і гуманнасці грамадства ў першую чаргу вызначаецца яго стаўленнем да дзяцей і старых».

Лукашэнка: у аснове дзяржпалітыкі ляжыць клопат аб чалавеку

«У аснове дзяржаўнай палітыкі ляжыць клопат аб чалавеку, аб павышэнні дабрабыту і якасці жыцця людзей. Гэта наш галоўны прынцып і магістральны шлях развіцця», — сказаў кіраўнік дзяржавы.

Ён адзначыў, што ўсе сістэмныя рашэнні кіраўніцтвам краіны прыняты. «Намечаныя меры павінны садзейнічаць пераадоленню негатыўных тэндэнцый і аднавіць дынаміку сацыяльна-эканамічнага развіцця. Для гэтага патрэбна ініцыятыўная і зладжаная работа на агульны вынік як у цэнтры, так і на месцах», — падкрэсліў Аляксандр Лукашэнка.

Прэзідэнт: галоўная задача ў дэмаграфічнай сферы — стварэнне ўмоў для росту насельніцтва

«Што датычыцца задач у дэмаграфічнай сферы, то галоўнае застаецца нязменным: стварэнне ўмоў для росту насельніцтва краіны, — адзначыў беларускі лідар. — За дзесяцігоддзе з таго часу, як была прынята першая дзяржаўная праграма вырашэння дэмаграфічных праблем, мы атрымалі вынік, да якога імкнуліся: практычна сціснуты дэмаграфічныя нажніцы! У 2015 годзе ўзровень нараджальнасці практычна зраўнаваўся з узроўнем смяротнасці, нарадзілася амаль 120 тыс. дзяцей. Такой нараджальнасці не было больш як 20 гадоў».

За 10 гадоў дзіцячая смяротнасць у рэспубліцы знізілася амаль у 3 разы. Па гэтым паказчыку Беларусь выйшла на перадавыя пазіцыі ў свеце.

«Гэта самы галоўны наш здабытак, калі жанчына нараджае і поўнасцю ўпэўнена ў тым, што дзіця будзе здаровае, — сказаў Прэзідэнт. — Радуе і тое, што павялічваецца памер беларускай сям’і, больш як 56 працэнтаў нованароджаных — гэта другія і наступныя дзеці. Гэта прарыў».

Паводле слоў кіраўніка дзяржавы, дэмаграфічныя праграмы даказалі сваю рэзультатыўнасць, прадоўжыцца іх рэалізацыя ў поўным аб’ёме. Ужо задзейнічаны такі механізм падтрымкі сям’і, як мацярынскі капітал, а таксама дапамога ў вырашэнні жыллёвых праблем. «Мы і ў далейшым будзем перш за ўсё ўдзяляць увагу шматдзетным сем’ям у плане жылля», — дадаў ён.

«Інвестыцыі ў сям’ю — гэта інвестыцыі ў будучае развіццё, — падкрэсліў Аляксандр Лукашэнка. — Але сёння неабходна зрушыць акцэнты з эканамічнага складніка, які дастаткова важкі, на палітыку сямейнага дабрабыту, псіхалагічнай устойлівасці і стабільнасці. Што граху таіць, некаторыя сем’і, нарадзіўшы траіх-чацвярых дзяцей, гавораць — гэта Лукашэнкі дзеці, няхай ён імі займаецца. Не, дарагія мае, я гатовы падставіць плячо, але клопат аб дзецях праходзіць перш за ўсё праз сям’ю».

Развіццё сямейнай інфраструктуры, стварэнне ўмоў для сямейнага адпачынку, культурна-масавых забаў, сумесных заняткаў спортам як у гарадской, так і ў сельскай мясцовасці — яшчэ адна немалаважная ўмова ў справе з’яднання сям’і, лічыць ён.

У павышэнні пенсійнага ўзросту няма ніякай надзвычайшчыны — Лукашэнка

«У гэтым годзе асаблівы грамадскі рэзананс атрымалі пытанні ўдасканалення нашай пенсійнай сістэмы, — сказаў Аляксандр Лукашэнка. — Прымаючы рашэнне аб павышэнні пенсійнага ўзросту і пенсійнай рэформе, давайце прызнаем, што мы цягнемся ў хвасце падзей. Гэта даўно ўжо трэба было вырашыць. Таму тут ніякай надзвычайшчыны. І людзі спакойна гэта прынялі».

Тым не менш, дадаў Прэзідэнт, абмяркоўваліся розныя варыянты вырашэння гэтай праблемы. Найбольш рацыянальным прызнана паступовае павелічэнне ўзросту выхаду на пенсію.

«Нас таксама крытыкавалі (асабліва расіяне гэтым грашаць): маўляў, Лукашэнка спужаўся, трэба было на 5 гадоў (павысіць пенсійны ўзрост. — Заўвага БЕЛТА), а ён падняў усяго на 3 гады. Адказваю на гэта пытанне: у дадзеным выпадку ўсё роўна — на 5 гадоў або на 3 гады, розніцы няма з пункту гледжання фінансавай напаўняльнасці бюджэту і з пункту гледжання ўзроставага ўзроўню нашага насельніцтва, — лічыць беларускі лідар. — Мы зрабілі гэты першы крок. Ён будзе доўжыцца 6-7 гадоў, а далей, як я гаварыў, мы разам з вамі вернемся да гэтага пытання, калі ў гэтым будзе неабходнасць».

У Беларусі не будуць змяншаць пенсіі, павялічваць выплаты прадпрыемстваў і работнікаў у пенсійны фонд

«Галоўны пасыл — мы не маем намеру змяншаць памеры пенсій, таксама як і павялічваць падаткі на прадпрыемствы і сацыяльныя выплаты саміх працуючых у пенсійны фонд», — адзначыў беларускі лідар.

Паводле яго слоў, удасканаленне пенсійнай сістэмы — гэта не толькі павышэнне пенсійнага ўзросту. Што датычыцца прынцыпаў развіцця пенсійнай сістэмы, Прэзідэнт адзначыў: «Захоўваючы яе цяперашнюю салідарную аснову, размеркавальную, у далейшым мы будзем больш актыўна развіваць і іншыя формы, уключаючы накапляльную. Дарэчы, яна сёння рэалізуецца. І мы, гледзячы на Расію, Украіну, пераканаліся, што мы зрабілі абсалютна правільна, не нагнятаючы накапляльную сістэму».

«Мы далі права людзям — выбірайце. Калі вы хочаце накапляльную сістэму, разам з прадпрыемствамі накоплівайце. Але мы захавалі аснову, каб людзі з голаду не паўміралі і кавалак хлеба мелі. Мы захавалі гэту дрэнную ў двукоссі салідарную сістэму», — падкрэсліў беларускі лідар.

Гаворачы аб тым, што будзе далей, Прэзідэнт растлумачыў: «Складуцца нармальныя ўмовы — мы будзем паводзіць сябе больш актыўна. Але людзі паступова прывыкнуць да гэтага. І тут ломка абсалютна недапушчальна чыста псіхалагічна».

«Будзем рухацца наперад з улікам рэальных працэсаў у эканоміцы і ў грамадскіх настроях, каб не дапусціць страт з-за інфляцыі або іншых негатыўных тэндэнцый», — рэзюмаваў Аляксандр Лукашэнка.

Лукашэнка: у другім паўгоддзі пастараемся павысіць пенсіі

Прэзідэнт Аляксандр Лукашэнка, адказваючы на пытанні дэпутатаў па выніках Паслання беларускаму народу і Нацыянальнаму сходу, заявіў, што ў другім паўгоддзі паспрабуе павысіць працоўныя пенсіі.

«Нядаўна мне назвалі адну лічбу: за пяцігодку рэальныя даходы насельніцтва больш як на трэць у нас выраслі — 35 працэнтаў», — адзначыў Аляксандр Лукашэнка.

Пры гэтым кіраўнік дзяржавы звярнуў увагу, што цэны ў Беларусі растуць і, адпаведна, рэальныя даходы пенсіянераў зніжаюцца. «Мы пастараемся ў другім паўгоддзі абавязкова павысіць пенсіі», — сказаў ён.

Рацыянальны і прагматычны падыход да фарміравання тарыфаў будзе забяспечаны ва ўсіх сферах — Лукашэнка

«Рацыянальны і прагматычны падыход да фарміравання тарыфаў будзе забяспечаны ва ўсіх сферах, якія аказваюць паслугі насельніцтву нашай краіны. Работа ў гэтым напрамку, як вы ведаеце, вядзецца», — адзначыў Аляксандр Лукашэнка.

Кіраўнік дзяржавы падкрэсліў, што ў гэтым годзе давядзецца «ўціснуцца» ўсім. «Так, як гэта мы зрабілі ў жыллёва-камунальнай сферы, забяспечыўшы баланс інтарэсаў насельніцтва і прадпрыемстваў», — канстатаваў ён.

У паліклініках не павінна быць чэргаў — Лукашэнка

«У паліклініках не павінна быць чэргаў, — адзначыў Аляксандр Лукашэнка. — Трэба завяршыць інфарматызацыю рабочых месц урачоў для ўкаранення тэхналогіі электроннага рэцэпта і пераходу на электронныя карткі пацыента».

У забеспячэнні дабрабыту ўсіх слаёў насельніцтва асаблівую ролю адыгрывае дынамічнае развіццё аховы здароўя. Гэта сфера з’яўляецца прыярытэтам беларускай дзяржавы, падкрэсліў Прэзідэнт.

У сусветным рэйтынгу па доступе да медыцынскіх паслуг Беларусь займае першае месца, а па спрыяльных умовах для мацярынства знаходзіцца на 25-м месцы сярод амаль 200 краін. За апошнія гады ў Беларусі мадэрнізаваны ўсе звёны сістэмы аховы здароўя — ад фельчарска-акушэрскіх пунктаў да абласных бальніц і сучасных медыцынскіх цэнтраў. Высокатэхналагічныя аперацыі праводзяцца ва ўсіх рэгіёнах краіны.

«Разам з тым у медыцынскай сферы трэба зрабіць яшчэ вельмі шмат, — лічыць беларускі лідар. — У 2016 годзе трэба ўзмацніць прафілактыку захворванняў, паколькі хваробу прасцей папярэдзіць, чым лячыць. У насельніцтва неабходна сфарміраваць навыкі культуры здароўя, пачынаючы з ладу жыцця, правільнага харчавання, адмовы ад курэння і алкаголю».

Работнікаў трэба маральна і матэрыяльна заахвочваць за здаровы лад жыцця

«Кіраўнікам арганізацый сумесна з прафсаюзамі трэба больш шырока прымяняць метады маральнага і матэрыяльнага стымулявання работнікаў, якія вядуць здаровы лад жыцця і займаюцца фізічнай культурай і спортам, — лічыць Прэзідэнт. — Паколькі здаровая нацыя — аснова квітнеючай і моцнай дзяржавы, любой дзяржавы».

«Здароўе чалавека залежыць ад многіх фактараў. Адзін з найважнейшых — фізічная культура і спорт», — упэўнены беларускі лідар.

Лукашэнка даручыў выпрацаваць у Беларусі новыя крытэрыі аплаты працы

«Трэба забяспечыць — і гэта самае галоўнае — гарантаванае дзяржавай прадастаўленне першага рабочага месца выпускнікам устаноў адукацыі. Малады спецыяліст — будучае любога прадпрыемства, — падкрэсліў Аляксандр Лукашэнка. — Пры гэтым вельмі правільна сёння ставяць пытанні ў настаўніцкім асяроддзі і навуковых арганізацыях. Гэта ж ненармальна: такая разбежка (у зарплаце. — Заўвага БЕЛТА) паміж маладым спецыялістам, які прыйшоў у аўдыторыю і выкладчыкам, які працуе 20 гадоў і атрымлівае за выслугу, стаж і яшчэ нейкія бонусы. А малады спецыяліст адстае ад яго ў заработнай плаце ў 5 разоў. Гэта нармальна? Не».

Кіраўнік дзяржавы лічыць, што зарплата павінна адпавядаць выкананай працы. «Вы хочаце сказаць, што моладзь сёння прыходзіць і працуе горш, чым тыя, хто па 20-30 гадоў стаіць ля станка? Маладыя людзі, прыходзячы на работу, выдаюць рэзультаты значна вышэйшыя, чым дарослыя кадры. Я не хачу сказаць, што яны дрэнныя. Мы няправільнымі карыстаемся крытэрыямі: малады — значыць, ты нічога не атрымліваеш; дарасцеш да старога — атрымаеш. Гэта няправільна. Трэба меркаваць па тым, як працуе чалавек, якая яго праца, што ён укладае ў сваю работу», — адзначыў Прэзідэнт.

Аляксандр Лукашэнка дадаў, што ўжо даручыў ураду неадкладна заняцца прапрацоўкай новых крытэрыяў аплаты працы ў гэтай сферы.

 

Аб культуры, адукацыі і спорце

Лукашэнка: культура павінна адыгрываць больш актыўную ролю ў з’яднанні народа

Аляксандр Лукашэнка нагадаў, што сярод асаблівасцей 2016 года тое, што ён аб’яўлены Годам культуры. «Выклікана гэта тым, што культура, у шырокім сэнсе слова, павінна адыгрываць больш актыўную ролю ў з’яднанні народа вакол стваральных мэт, высокіх маральных прынцыпаў і нашых добрых традыцый. У бесперапынным глыбокім працэсе фарміравання працавітай, адукаванай, духоўна багатай і здаровай нацыі!» — упэўнены Прэзідэнт.

Акцэнт будзе зроблены на мастацкай, творчай сферы. На думку кіраўніка дзяржавы, вялікую ўвагу трэба ўдзяляць і іншым напрамкам: культуры вытворчасці і земляробства, побыту і чалавечых адносін, добраўпарадкавання гарадоў і вёсак, беражлівага захавання гістарычнай спадчыны. «Усё гэта задачы Года культуры», — падкрэсліў Аляксандр Лукашэнка.

Кожны ўкладзены ў будаўніцтва аб’ектаў культуры рубель павінен прыносіць карысць

Прэзідэнт адзначыў, што на рэалізацыю дзяржаўнай праграмы «Культура Беларусі» на 2016-2020 гады закладзены значныя сродкі рэспубліканскага і мясцовых бюджэтаў. «Урад і мясцовая ўлада абавязаны помніць, што кожны рубель, укладзены ў будаўніцтва і рэканструкцыю аб’ектаў культуры, павінен прыносіць карысць. Нясвіж і Мір, музей Вялікай Айчыннай вайны — добрыя прыклады. Але што далей?» — сказаў беларускі лідар.

Аляксандр Лукашэнка звярнуў увагу на неабходнасць сістэмных падыходаў у сферы культуры. «Калі будзе ўкаранёны сістэмны падыход да мадэрнізацыі ўстаноў культуры, маючых важнае рэспубліканскае значэнне?» — спытаў Прэзідэнт.

Лукашэнка: трэба ўскалыхнуць настаўніцтва

«Веды многіх выпускнікоў навучальных устаноў прымушаюць, на жаль, жадаць лепшага. Нямала гучыць прэтэнзій і наконт падручнікаў. Але самая галоўная праблема… гэта праблема настаўнікаў. Таму трэба зрабіць усё, каб выхаваць, «нарадзіць» калі хочаце, новага настаўніка», — заявіў Аляксандр Лукашэнка.

«Трэба ўскалыхнуць наша настаўніцтва, трэба прымусіць настаўніка, як раней, працаваць з сям’ёй, з вучнямі, як гэта было ў наш час, калі настаўнік такі ж час, як у школе, быў у сям’і свайго вучня. Давайце паглядзім, ці так гэта сёння. І колькі вы сустракаліся з настаўнікамі сваіх дзяцей у сябе дома, ці цікавіліся яны гэтым, ці жыве настаўнік праблемамі вучня? Не. Таму гэта наша галоўная задача. Усе астатнія — вырашальныя», — сказаў беларускі лідар.

Прэзідэнт таксама падкрэсліў, што сістэма адукацыі сёння патрабуе якаснага ўдасканалення. «Я не гавару аб нейкай рэформе, ломцы, як у нас прывыклі гэта рабіць. Трэба рабіць наступны крок. Шчыра кажучы, я ўжо ўчора думаў аб тым, што мы сістэму адукацыі адрэфармавалі, удасканалілі і больш яе не трэба чапаць», — сказаў кіраўнік дзяржавы.

Паводле яго слоў, у апошнія гады адбыўся неверагодны касмічны скачок у развіцці грамадства. Новыя тэхналогіі, інтэрнэт проста запаланілі ўвесь свет. «Нам ад гэтага адстаць нельга, перш за ўсё ў адукацыі», — сказаў Аляксандр Лукашэнка.

Прэзідэнт таксама адзначыў, што стаіць задача падрыхтоўкі і выпуску для школ, ССНУ і ВНУ сучаснай вучэбнай літаратуры на самым высокім узроўні. Прычым такое выданне павінна быць і ў электроннай версіі.


Лукашэнка: выкладанне ў ВНУ не арыентавана на вырашэнне сённяшніх задач

«Нам трэба часцей — і парламентарыям, і мне, і ўраду — бываць у ВНУ, дзе рыхтуюць і перападрыхтоўваюць кадры. Няхай не крыўдзяцца на мяне кіраўнікі і выкладчыкі ВНУ, але выкладанне ў пераважнай большасці не арыентавана на вырашэнне тых задач, пра якія мы сёння гаворым. Як былі жоўтыя канспекты, закасцянелыя веды, так яны і засталіся. Нам патрэбны новыя людзі з новымі ведамі», — падкрэсліў Аляксандр Лукашэнка.

Кіраўнік дзяржавы адзначыў, што яшчэ адной важнай задачай застаецца падрыхтоўка і перападрыхтоўка спецыялістаў у адпаведнасці з патрэбнасцямі эканомікі.

«У сучасных умовах нельга дапусціць разрыву паміж навукова-тэхнічным узроўнем новай вытворчасці і кваліфікацыяй кадраў. І перападрыхтоўку кадраў трэба весці не ў інстытутах павышэння кваліфікацыі, а непасрэдна на вытворчасці, на тых участках, дзе будуць працаваць спецыялісты і кіраўнікі. Каб людзі бачылі новыя тэхналогіі, новыя ўзоры прадукцыі, новыя методыкі», — упэўнены Прэзідэнт.

Беларусі не трэба бяздумна капіраваць заходнюю сістэму адукацыі — Лукашэнка

«Выступаючы за паляпшэнне вышэйшай адукацыі, многія сёння з надзеяй глядзяць на нядаўняе ўступленне Беларусі ў Балонскі працэс. Зразумела, важна, што мы ўліваемся ў нейкую агульнаадукацыйную еўрапейскую «раку». Зможам рэалізаваць цесныя кантакты з замежнымі ВНУ, праводзіць студэнцкія абмены, удзельнічаць у сумесных навуковых праектах. Але пры гэтым не трэба бяздумна капіраваць заходнюю сістэму адукацыі», — заявіў Аляксандр Лукашэнка. У гэтай сістэме, паводле яго слоў, разам з плюсамі ёсць і мінусы, якія трэба адсейваць.

«Беларуская вышэйшая школа яшчэ з савецкіх часоў мае багаты вопыт арганізацыі вучэбнага працэсу, і мы не павінны страціць станоўчыя якасці, — сказаў кіраўнік дзяржавы. — Размова ідзе перш за ўсё аб сістэме патрыятычнага, маральна-этычнага і эстэтычнага выхавання, якая патрабуе ўсялякай падтрымкі і развіцця ў сучасных умовах».

«І тут мне бачыцца асаблівая роля нашай сістэмы адукацыі, якая павінна, па-першае, навучыць моладзь жыць у цяперашнім насычаным і вельмі інфармацыйным асяроддзі. Па-другое, выхоўваць духоўную асобу, прывіваць пачуццё грамадзянскай адказнасці чалавеку з маладых гадоў, каб кожны змог бачыць розніцу паміж дабром і злом і выбіраць менавіта той станоўчы бок любой з’явы», — дадаў Аляксандр Лукашэнка.

Беларускі лідар адзначыў, што персанальную адказнасць за выхаваўчую работу ў вучэбных калектывах нясуць кіраўнікі ўстаноў адукацыі. Але ў больш шырокім кантэксце гэтыя пытанні пастаянна павінны знаходзіцца ў зоне асаблівай увагі ідэалагічнага актыву краіны і такіх канструктыўных грамадскіх аб’яднанняў, як БРСМ, «Белая Русь», Саюз жанчын, ветэранскія аб’яднанні і, вядома ж, Федэрацыя прафсаюзаў, у якой яшчэ больш шырокія функцыі выхавання чалавека працы і абароны яго правоў.

«Аб задачах і перспектывах далейшага развіцця сістэмы адукацыі і выхавання моладзі мы больш падрабязна, як мною абяцана, і прадметна пагаворым на жнівеньскіх нарадах з педагогамі», — рэзюмаваў Аляксандр Лукашэнка.

Лукашэнка лічыць Беларусь узорам па мірным суіснаванні рэлігій

Наконт магчымасці ўвядзення ў беларускіх школах (па аналогіі з іншымі краінамі) асобных рэлігійных прадметаў кіраўнік дзяржавы адзначыў: «Я гэтага рабіць не буду, як бы гэта ні крыўдна было камусьці пачуць, па многіх прычынах. Дай бог іншым краінам, у тым ліку Расіі, мець такую талерантнасць, такія ўзаемаадносіны рэлігій, як у Беларусі». Аляксандр Лукашэнка перакананы, што Беларусь з’яўляецца ўзорам у гэтым плане.

Кіраўнік дзяржавы лічыць, што не трэба рабіць нейкія захады, каб актуалізаваць далікатнае пытанне міжрэлігійных узаемаадносін, асабліва сярод школьнікаў. «Нам не трэба без асаблівай патрэбы лезці ў гэтыя далікатныя пытанні. Давайце тут праплывём па цячэнні, вобразна кажучы, каб не ўзбаламуціць грамадства і не сутыкнуць на гэтай праблеме нашы асноўныя рэлігіі», — дадаў Аляксандр Лукашэнка.

Народ Беларусі мае права чакаць ад алімпійцаў дастойнага выступлення

«Мы многага дабіліся ў развіцці спорту вышэйшых дасягненняў. У нас наперадзе галоўны экзамен чатырохгоддзя — Алімпіяда 2016 года. Для спартсменаў і трэнераў у цяперашніх няпростых умовах зроблена ўсё магчымае, каб яны змаглі паказаць у Рыа-дэ-Жанэйра высокія вынікі, — адзначыў Аляксандр Лукашэнка. — І народ Беларусі мае права чакаць ад іх дастойнага выступлення, якім можна будзе ганарыцца».

 

Аб кадравай палітыцы

Лукашэнка: кіраўнікі павінны ўмела арганізаваць справу і весці за сабой людзей, а не плысці па цячэнні

«На працягу станаўлення суверэнітэту краіны ў нас сфарміравана кадравая палітыка як стратэгічная дзейнасць дзяржавы і яе органаў кіравання. Але цяпер трэба ісці далей, сувымяраючы кожны крок з новымі патрабаваннямі і задачамі. Змяненні ў эканоміцы вядуць да карэкціроўкі ў рабоце з кадрамі», — падкрэсліў Аляксандр Лукашэнка.

Прэзідэнт адзначыў, што асаблівую актуальнасць набывае падрыхтоўка кіраўнікоў новай фармацыі, здольных адаптавацца да складанай абстаноўкі. «У цяперашняй сітуацыі неабходна вырашаць наступныя задачы. Дзяржаўная кадравая палітыка павінна быць накіравана на рэалізацыю прыярытэтаў сацыяльна-эканамічнага развіцця і забяспечыць падрыхтоўку і расстаноўку кадраў, здольных ажыццявіць эфектыўнае кіраванне галінамі эканомікі. Кіруючы склад павінен умела арганізаваць справу і весці за сабой людзей, а не плысці па цячэнні», — упэўнены кіраўнік дзяржавы.

Пры гэтым беларускі лідар звярнуў увагу, што задача органаў улады — падтрымаць прафесійных і ініцыятыўных работнікаў, заахвочваць іх самастойнасць і высокую рэзультатыўнасць.

Неабходна аптымізаваць і фарміраваць кампактны кіраўніцкі апарат на аснове навуковага падыходу, інавацыйных кадравых тэхналогій. «Закасцянелая сістэма кіравання тармозіць развіццё краіны, зніжае эфектыўнасць работы не толькі дзяржаўных органаў, але і рэальнага сектара эканомікі, — адзначыў Аляксандр Лукашэнка. — Ураду сумесна з Адміністрацыяй Прэзідэнта неабходна забяспечыць павышэнне эфектыўнасці работы кадравай вертыкалі, прэстыжу дзяржаўнай службы, безумоўнае і якаснае выкананне мерапрыемстваў па скарачэнні залішніх і дубліруючых функцый органаў дзяржкіравання, кантралюючых і праваахоўных органаў. Гэта найважнейшая прыярытэтная задача. Ёю мы займаемся недапушчальна доўга».

У Беларусі прадоўжыцца курс на амаладжэнне кадраў

«Трэба прадоўжыць курс на амаладжэнне, стварэнне эфектыўнага рэзерву, нарошчванне патэнцыялу кадраў. Важна іх максімальна хуткае прафесіянальнае станаўленне ў якасці сучасных антыкрызісных кіраўнікоў, здольных надаць новы імпульс у развіцці той ці іншай сферы дзейнасці», — звярнуў увагу Аляксандр Лукашэнка.

Пры гэтым, паводле слоў Прэзідэнта, на падрыхтоўку кадраў неабходна мабілізаваць усе існуючыя рэсурсы: адукацыйны, навуковы, адміністрацыйны. І асабліва — інтэлектуальны.

Зарплата дзяржслужачага ў Беларусі можа павялічыцца пасля аптымізацыі апарату кіравання

Кіраўнік дзяржавы лічыць неабходным істотна аптымізаваць дзяржапарат, пры гэтым павялічыўшы зарплату. «Трэба значна павышаць статус дзяржслужачых, у тым ліку і зарплату», — адзначыў Прэзідэнт. Размова ідзе аб тым, каб дзяржструктуры эфектыўна функцыянавалі, выконвалі пастаўленыя задачы. «Таму трэба значна аптымізаваць апараты кіравання, пакінуць толькі тое, што будзе працаваць і прыносіць карысць», — перакананы Аляксандр Лукашэнка. На яго думку, гэта такія спецыялісты, чые рашэнні будуць бездакорна выконвацца і каму адпаведна можна будзе заплаціць за добра выкананую работу.

 

Аб рабоце парламента

Лукашэнка: парламенту важна забяспечыць пераемнасць

«Каля 30 працэнтаў, няхай крыху менш, але блізка да 30 працэнтаў парламента (хацелася б бачыць у новым скліканні. — Заўвага БЕЛТА)… Палатам парламента вельмі важна забяспечыць пераемнасць, захаваўшы стабільнасць і працаздольнасць вышэйшага заканадаўчага органа», — сказаў Аляксандр Лукашэнка.

«У гэтым годзе дэпутацкаму корпусу, я ўжо сказаў, трэба будзе трымаць сур’ёзную справаздачу перад выбаршчыкамі, асабліва тым з вас, хто прыме рашэнне ўдзельнічаць у парламенцкіх выбарах. Не ўтаю, што асобныя дэпутаты мяне просяць ужо аб падтрымцы на новы тэрмін. Гэта нармальна. І вы гэтага не саромейцеся, але помніце адно: вы ў гэтай зале, зыходзячы з нашага крытэрыю пераемнасці парламента, павінны вызначыцца, хто з вас хоча і можа працаваць у новым парламенце», — заявіў кіраўнік дзяржавы.

Ён падкрэсліў, што дэпутаты, выбраныя яшчэ раз у 2016 годзе, павінны навучыць парламенцкай рабоце навічкоў. «На практыцы навучыць, як быць дэпутатам, — растлумачыў Прэзідэнт Беларусі. — Гэта (заканатворчасць. — Заўвага БЕЛТА) цяжкая работа, самая цяжкая, нараўне з навуковай дзейнасцю… Гэта накшталт навуковай работы. А адказнасць несувымерна большая. Таму давайце дамовімся: 30 працэнтаў прыкладна мы павінны выкрышталізаваць з нашага парламента і прасіць народ, каб ён падтрымаў нашу прапанову».

Акрамя таго, кіраўнік дзяржавы адзначыў: «Мы пойдзем да людзей з новымі кандыдатурамі, але гэта не павінны быць нейкія кішэнныя, губернатарскія або чые-небудзь дэпутаты. Гэта павінны быць лепшыя людзі нашай краіны, таму што адразу ж — у першы перыяд дзейнасці парламента — мы ўбачым, наколькі якасны яго склад. І за гэта будуць несці адказнасць і тыя грамадскія арганізацыі, якія вылучаюць дэпутатаў, і перш за ўсё дзяржаўная ўлада».

«Спадзяюся, наш новы дэпутацкі корпус будзе мець высокую палітычную культуру, умець весці пастаянны дыялог з іншымі галінамі ўлады, грамадзянскім грамадствам, рэгіёнамі, жыхарамі, міжнароднай супольнасцю», — сказаў Прэзідэнт.

«Цяперашні склад парламента заслугоўвае добрай ацэнкі за дзелавы стыль, плённую заканадаўчую і міжнародную дзейнасць», — канстатаваў Аляксандр Лукашэнка. Ён акцэнтаваў увагу на тым, што, хоць перыяд работы цяперашняга склікання набліжаецца да фіналу, гэта не падстава для зніжэння актыўнасці ў прыняцці важных законапраектаў і вырашэнні пытанняў, якія знаходзяцца ў кампетэнцыі парламентарыяў. «І не толькі таму, што вам яшчэ трэба працаваць, вам трэба прыняць бюджэт на наступны год, як у нас ужо традыцыяй стала… А яшчэ і таму, што ўсе вы на пенсію не ідзяце. Усе, хто хоча і здольны працаваць, будуць працаўладкаваны», — падкрэсліў Прэзідэнт Беларусі.

Лукашэнка заклікаў парламент умацаваць пазіцыі на міжнароднай арэне

Кіраўнік дзяржавы адзначыў, што трэба захоўваць сувязі з Расійскай Федэрацыяй, яе рэгіёнамі, пашыраць супрацоўніцтва з парламентарыямі краін Еўропы, Паўднёва-Усходняй Азіі, Амерыкі і Афрыкі. «Тым больш што яны вельмі актыўна пайшлі на супрацоўніцтва з нашымі дэпутатамі, з нашым парламентам… Вынік гэтых мерапрыемстваў павінен праявіцца як у павышэнні палітычнага іміджу Беларусі, так і ў актыўным пашырэнні эканамічных інтарэсаў нашай краіны», — сказаў Аляксандр Лукашэнка.

Прэзідэнт таксама падкрэсліў, што для дэпутата Палаты прадстаўнікоў або члена Савета Рэспублікі не павінна быць неістотных праблем выбаршчыкаў. «З кожным пытаннем, узнятым у звароце жыхароў адпаведнай тэрыторыі, неабходна дайсці да сутнасці праблемы, прадметна разабрацца і аказаць садзейнічанне ў яе вырашэнні. Менавіта такім шляхам заваёўваюцца аўтарытэт і павага грамадзян. Але гэта зусім не значыць, што вы павінны вырашаць тыя праблемы, якія павінна вырашаць вертыкаль улады выканаўчая. Але вы людзі самыя актыўныя, людзі, якія бачаць гэтыя праблемы… Вы павінны іх паставіць перад адпаведнымі органамі для вырашэння, калі гэта не ваша кампетэнцыя», — сказаў кіраўнік дзяржавы.

 

Аб знешняй палітыцы

Лукашэнка: няма больш высокай каштоўнасці, чым мір і бяспека

«Няма больш высокай каштоўнасці (гэта Украіна паказала і іншыя дзяржавы, цяпер асабліва — Сірыя), чым мір і бяспека», — сказаў Прэзідэнт.

«Калі на галаву сыплюцца бомбы, калі ў грамадстве разлад, калі адзін на аднаго пайшлі з кулямётамі і гранатамі, калі чалавек не можа жыць на сваёй зямлі, — аб чым можа ісці размова? Аб дэмаграфічных нажніцах? Хто будзе ў гэты час нараджаць?» — адзначыў Аляксандр Лукашэнка. Менавіта па гэтай прычыне, як лічыць кіраўнік дзяржавы, неабходна заўсёды падкрэсліваць, што мір, бяспека, абараназдольнасць — гэта вельмі важна. Прэзідэнт заклікаў гаварыць аб гэтым, не саромеючыся крытыкаў.

«Усё астатняе мы знойдзем, купім. Гэта другараднае», — падкрэсліў кіраўнік дзяржавы. Ён дадаў, што ні ў якое параўнанне з «бяспекай і мірам на гэтым кавалку зямлі, дзе жывуць беларусы», гэта не ідзе.

«Ад таго, наколькі эфектыўна мы зможам адстаяць свой суверэнітэт, не дапусціць пранікнення да нас хаосу і насілля звонку, пазбегнуць памылак суседзяў, залежыць будучыня нашай Беларусі. Мы проста абавязаны зберагчы галоўны здабытак — мір, стабільнасць, міжнацыянальную, міжканфесійную згоду, адкрытасць да супрацоўніцтва», — рэзюмаваў Аляксандр Лукашэнка.

Лукашэнка: Беларусь павінна быць гатова процістаяць міжнароднаму тэрарызму

«Беларусь павінна быць гатова процістаяць міжнароднаму тэрарызму, жорстка і прынцыпова спыняць любыя яго праяўленні, узаемадзейнічаючы з іншымі дзяржавамі і ствараючы ўласную сістэму забеспячэння бяспекі, — заявіў Аляксандр Лукашэнка. — У апошнія гады сур’ёзна змянілася абстаноўка ў свеце. Імкліва множыцца колькасць рэгіянальных канфліктаў, якія правакуюць маштабныя міграцыйныя крызісы. Узнікаюць цэлыя тэрарыстычныя квазідзяржавы, якія нясуць пагрозу для ўсёй сусветнай супольнасці. Нават паспяховая Еўропа сёння не можа адчуваць сябе ў бяспецы. Хваля тэрарызму літаральна захліснула многія краіны. Крывавыя падзеі ў Паражы, Бруселі ўзрушылі ўвесь свет. Пагроза захоўваецца для іншых дзяржаў, аб чым нельга забываць», — таксама сказаў кіраўнік дзяржавы.

«Канструктыўны ўдзел у забеспячэнні бяспекі прымае ўсё беларускае грамадства, дэманструючы з’яднанасць перад тварам новых пагроз і разуменне прымаемых сілавымі структурамі мер», — таксама адзначыў Прэзідэнт.

Лукашэнка звяртае ўвагу на сусветную тэндэнцыю халоднай вайны

«Выклікае трывогу і такая негатыўная сусветная тэндэнцыя, як новы этап халоднай вайны, які набірае абароты. Паказаўся прывід новых блокавых процістаянняў, якія падрываюць фундаментальныя асновы глабальнай і рэгіянальнай бяспекі. І гэта асабліва сумна ўсведамляць у год 75-годдзя пачатку Вялікай Айчыннай вайны», — адзначыў Аляксандр Лукашэнка.

Беларусь можа і павінна адыгрываць больш актыўную і значную ролю ў сусветнай палітыцы

Прэзідэнт падкрэсліў, што не Беларусь ірвецца да таго, каб адыгрываць больш актыўную і значную ролю ў сусветнай палітыцы. «Ад нас гэтага патрабуюць ужо сусветныя дзяржавы, а па нейкіх пытаннях і просяць», — адзначыў Аляксандр Лукашэнка.

«Сёння Беларусь — гэта апора бяспекі ў рэгіёне. У нас няма канфліктаў ні па рэлігійнай, ні па нацыянальнай прыкметах. Мы ніколі не стваралі і не ствараем праблем суседзям. І ніколі не будзем іх ствараць», — гарантаваў кіраўнік дзяржавы, дадаўшы, што шматвектарнасць знешняй палітыкі як была, так і застаецца асноўным прынцыпам Беларусі.

Лукашэнка: Беларусь зацікаўлена ў стварэнні ўсёабдымнай сістэмы бяспекі Еўразійскага рэгіёна

«Наша краіна асабліва зацікаўлена ў стварэнні ўсёабдымнай і справядлівай сістэмы забеспячэння бяспекі шырокага і, на жаль, выбухованебяспечнага Еўразійскага рэгіёна», — сказаў кіраўнік дзяржавы. У сувязі з гэтым, паводле яго слоў, Беларусь прымае меры і на ўзроўні міждзяржаўнага ўзаемадзеяння, і ва ўмацаванні абароннага патэнцыялу сваёй краіны. «Мы не бразгаем нейкай зброяй. Не. Мы сур’ёзна і адкрыта гаворым аб тым, што ствараем сучасны, абаронны комплекс нашай краіны. Дарэчы, частка рэгіянальнай абароннай сістэмы Беларусі і Расіі на заходнім напрамку, у аснове якога беларуская армія», — дадаў ён.

У глабальным маштабе гэтай мэце служыць Арганізацыя Дагавора аб калектыўнай бяспецы, адзначыў Прэзідэнт. Павышэнне боегатоўнасці Калектыўных сіл аператыўнага рэагавання дае магчымасць процістаяць такім выклікам, як міжнародны тэрарызм, наркатрафік, незаконная міграцыя і арганізаваная злачыннасць.

Аляксандр Лукашэнка канстатаваў, што Беларусь з улікам абвастрэння сітуацыі ў далёкім і блізкім замежжы вымушана нарошчваць свой абаронны патэнцыял, каб не аказацца безабаронным аб’ектам лакальнага ваеннага канфлікту. Значнай вяхой у павышэнні абараназдольнасці ён назваў прыняцце ў гэтым годзе новай рэдакцыі Ваеннай дактрыны беларускай дзяржавы. «У ёй дакладна вызначаны міралюбівы характар нашай знешняй палітыкі. Разам з тым у дакуменце падкрэслена, што для абароны сваёй краіны ў выпадку вычарпання мер неваеннага характару мы гатовы да прымянення ваеннай сілы як супраць знешняй агрэсіі, так і для нейтралізацыі ўнутранага ўзброенага канфлікту», — заўважыў Прэзідэнт. Для процідзеяння пагрозам гібрыдных войнаў і «каляровых рэвалюцый» створаны Сілы спецыяльных аперацый і распрацавана сістэма тэрытарыяльнай абароны. Пры гэтым ён дадаў, што ўнутраны канфлікт, асабліва ў Беларусі, магчымы толькі пры падтрымцы знешніх сіл. «Таму мы арыентуем узброеныя сілы на процідзеянне такім «унутраным канфліктам», — сказаў Аляксандр Лукашэнка.

Кіраўнік дзяржавы звярнуў увагу, што ў Ваеннай дактрыне ўпор зроблены і на развіццё абароннай прамысловасці як высокатэхналагічнага сектара эканомікі, прызначанага не толькі задавольваць патрэбнасці сілавых структур краіны ў сучасных відах узбраення і спецыяльнай тэхнікі, але і пастаўляць на экспарт сваю прадукцыю.

«Галоўная задача ўсіх сілавых структур — забяспечваць недатыкальнасць нашай Радзімы, яе тэрытарыяльную цэласнасць і канстытуцыйны парадак, пастаянна падтрымліваць спакойную абстаноўку, неабходную для ўстойлівага развіцця краіны і мірнага жыцця людзей», — рэзюмаваў Аляксандр Лукашэнка.

Лукашэнка заклікае не захапляцца «гаварыльняй» пры нармалізацыі адносін з Захадам

Кіраўнік дзяржавы з задавальненнем адзначыў сур’ёзны пералом у адносінах Беларусі з Захадам. «Не «загаварыць» бы гэты нармальны працэс. І Захад павінен гэта разумець, і мы, што калі страцім тэмпы нашых адносін, то станем не цікавымі адзін аднаму», — перасцерагае Аляксандр Лукашэнка.

Прэзідэнт перакананы, што асновай павінна служыць развіццё адносін у гандлёва-эканамічнай сферы, гэта заўсёды садзейнічала збліжэнню дзяржаў і народаў. Канструктыўнае разнапланавае супрацоўніцтва з Еўрапейскім саюзам поўнасцю адпавядае нацыянальным інтарэсам Беларусі. Гэта ж датычыцца і развіцця гандлёва-эканамічных сувязей і актывізацыі дыялогу са Злучанымі Штатамі Амерыкі.

Асобным сілам у Расіі трэба спыніць размовы аб развароце Беларусі

Аляксандр Лукашэнка падкрэсліў, што Расійская Федэрацыя — гэта саюзніца і стратэгічны партнёр Беларусі. «Таму нам трэба дынамічна развіваць усебаковае супрацоўніцтва на міждзяржаўным і рэгіянальным узроўнях», — упэўнены Прэзідэнт.

«Прыкра слухаць з некаторых ангажыраваных рупараў з Расіі, што ў нас ледзь ці не мяккая беларусізацыя, яшчэ штосьці тут адбываецца — ледзь ці не разварот. Не ведаю толькі, куды мы можам развярнуцца?» — задаўся рытарычным пытаннем кіраўнік беларускай дзяржавы. Ён лічыць, што «асобным сілам, структурам у Расіі трэба ўжо спыніць гэту цягамоціну». «Куды нам разварочвацца? Мы былі і ёсць браты, — прадоўжыў Аляксандр Лукашэнка. — Гэта гістарычна, стагоддзямі прадвызначана».

У той жа час кіраўнік дзяржавы падкрэсліў, што ў Расіі павінны разумець, што беларусы не будуць хлопчыкамі на пабягушках. Беларусь — самастойная суверэнная дзяржава, вобразна кажучы, якая жыве з Расіяй у адным доме, але мае сваю кватэру. Аляксандр Лукашэнка нагадаў, што гэта і словы цяперашняга Прэзідэнта Расіі, які гатовы на гэтым будаваць адносіны з Беларуссю. У сувязі з гэтым беларускі лідар зноў выказаў недаўменне наконт таго, што некаторыя, у тым ліку праўладныя рупары, зацыкліваюцца на іншым, даходзячы да паклёпу. «Трэба гэта завяршаць, гэта да дабра не прыводзіць», — перасцярог кіраўнік беларускай дзяржавы.

Беларусь і Расія поплеч развіваюць Саюзную дзяржаву, а цяпер і ЕАЭС. Аляксандр Лукашэнка заклікаў расійскіх партнёраў прытрымлівацца выпрацаваных прынцыпаў. Напрыклад, дамоўленасці аб тым, што на тэрыторыі дзвюх краін не будуць стварацца альтэрнатыўныя вытворчасці. Прэзідэнт нагадаў аб прэтэнзіях расійскага боку наконт таго, што Беларусь нібыта адмовілася прадаваць МЗКЦ, і аб прапановах наладзіць аналагічную вытворчасць на КамАЗе. Кіраўнік дзяржавы расказаў, што на апошніх перагаворах з кіраўніцтвам Расіі адзначаў: «Хочаце купіць — купляйце, калі ваш інтарэс». Але звяртаў увагу, што і ў Беларусі ёсць свой інтарэс у Расіі — у здабычы на яе тэрыторыі нафты. Аднак дамоўленасці па гэтым пытанні так пакуль і не дасягнуты, канстатаваў Прэзідэнт.

СНД трэба мадэрнізаваць і захаваць як міжнародную арганізацыю

Прэзідэнт згадаў аб негатыўных тэндэнцыях у Садружнасці Незалежных Дзяржаў: колькасць яе членаў скарачаецца, адносіны паміж некаторымі краінамі абвастраюцца, аб чым сведчыць нядаўні канфлікт паміж Азербайджанам і Арменіяй. Гучаць прапановы нават скасаваць СНД.

«Падзяляючы меркаванне аб безумоўнай неабходнасці мадэрнізацыі Садружнасці, Беларусь лічыць патрэбным захаваць яе як міжнародную арганізацыю», — падкрэсліў Аляксандр Лукашэнка. Прэзідэнт растлумачыў, што Беларусь бачыць задачу мадэрнізацыі ў тым, каб зрабіць СНД больш моцнай і прывабнай для дзяржаў-удзельніц, адаптаваць яе да сучасных рэалій.

Беларусь адзначае важную ролю партнёрства з Кітаем і разлічвае на раўнапраўны дыялог з Захадам

У рэалізацыі курсу на шматвектарнасць знешняй палітыкі важную ролю адыгрывае ўсебаковае стратэгічнае партнёрства Беларусі з Вялікім Кітаем. Цяпер на парадку дня выкананне шэрага ўзаемавыгадных дамоўленасцей і канкрэтных праектаў, нагадаў Прэзідэнт.

Закранаючы адносіны і дыялог з Захадам, Аляксандр Лукашэнка падкрэсліў, што яны павінны быць раўнапраўнымі. «У супрацоўніцтве з Захадам нас цікавяць перш за ўсё інвестыцыі, трансфер тэхналогій, стварэнне перадавых сумесных вытворчасцей, удзел беларускіх кампаній у міжнародных вытворчых ланцужках», — сказаў Прэзідэнт.

Прынцыпова важна не дапусціць з’яўлення новых раздзяляльных ліній у Еўрапейскім рэгіёне, каб узаемаадносіны ЕС і ЕАЭС мелі не ўзаемавыключальны, а ўзаемадапаўняльны характар, падкрэсліў Аляксандр Лукашэнка. Прэзідэнт нагадаў, што ў гісторыі Беларусі нямала негатыўных прыкладаў, калі яна была ў эпіцэнтры такога падзелу. Таму для краіны, якая, калі што здарыцца, можа зноў стаць такой раздзяляльнай лініяй, гэта не проста палітычная траскатня, рэзюмаваў кіраўнік дзяржавы.

Лукашэнка: Беларусь гатова працаваць над уступленнем у СГА, але абараняючы свае інтарэсы

Аляксандр Лукашэнка звярнуў увагу, што ў Беларусі адкрытая эканоміка, краіна не можа быць ізалявана ад усяго свету, яна зацікаўлена ў рабоце на знешніх рынках. «Для нас вельмі важна быць часткай гэтага сусветнага эканамічнага арганізма, імя якому СГА», — сказаў ён. Між тым беларускі лідар адзначыў, што кожная з краін, з’яўляючыся членам гэтага маштабнага аб’яднання, адстойвае ўласныя інтарэсы. «Мы гатовы ў гэтым напрамку працаваць, але, як і ўсе, абараняючы свае інтарэсы», — падкрэсліў Аляксандр Лукашэнка.

Паводле слоў Прэзідэнта, перагаворны працэс прадугледжвае, перш за ўсё, кампраміс паміж краінамі-партнёрамі. «Калі мы ўбачым, што не страчваем у ходзе перагаворнага працэсу, мы на гэта пойдзем. Калі не, то і хацець не трэба», — лічыць ён.

У Беларусі на сёння няма перашкод для ўступлення ў Сусветную гандлёвую арганізацыю, у тым ліку падтрымку і дапамогу ў гэтым пытанні прапануюць ЗША і ЕС. «Мы ім за гэта ўдзячны, але будзем весці перагавары, каб захаваць інтарэсы па ўсіх напрамках — і прамысловасці, і сельскай гаспадаркі. Усе сектары для нас важны і маюць патрэбу ў абароне», — заўважыў Аляксандр Лукашэнка.

Ён таксама лічыць важным прааналізаваць вопыт партнёраў па Еўразійскім эканамічным саюзе, якія ўжо сталі паўнапраўнымі членамі гандлёвай арганізацыі.

БелТА

 



Добавить комментарий

Ваш e-mail не будет опубликован. Обязательные поля помечены *