XXV Міжнародны фестываль мастацтваў «Славянскі базар у Віцебску» праходзіць з 14 па 18 ліпеня 2016 года. У бягучым годзе музычны форум прымае гасцей з 45 краін свету. Фестывальнымі тэмамі сталі Год культуры, тэма Перамогі ў Вялікай Айчыннай вайне і асноўная — 25-годдзе фестывалю. На форум акрэдытаваны звыш 500 журналістаў з 10 краін свету, уключаючы Беларусь.

Асноўнымі фестывальнымі падзеямі, вакол якіх сфарміравана праграма, традыцыйна стануць вакальныя конкурсы. Маладыя артысты, якія прайшлі адборачныя туры ў сваіх краінах, выступяць на XXV Міжнародным конкурсе выканаўцаў эстраднай песні «Віцебск-2016». Канкурсанты з 28 краін свету будуць змагацца ў паўфінале. У юбілейным 25-м прадстаўлена геаграфія ад Лацінскай Амерыкі да Еўразіі. На спаборніцкую фестывальную сцежку разам з дарослымі выйдуць і юныя вакалісты. Маленькія таленты ва ўзросце ад 8 да 12 гадоў прымуць удзел у XIV Міжнародным дзіцячым музычным конкурсе «Віцебск-2016».

На сцэне Летняга амфітэатра пройдуць цырымоніі адкрыцця і закрыцця, музычныя праграмы «Саюзная дзяржава запрашае» і «Віцебск збірае сяброў». Праграма фестывалю насычана самымі рознымі падзеямі.

14 ліпеня адразу пасля маляўнічага святочнага шэсця ўдзельнікаў форуму і ўзняцця сцяга фестывалю была адкрыта пліта новага лаўрэата спецыяльнай узнагароды Прэзідэнта Рэспублікі Беларусь «Праз мастацтва — да міру і ўзаемаразумення». У юбілей форуму на Плошчы лаўрэатаў «зорную» прапіску атрымаў Нацыянальны акадэмічны канцэртны аркестр пад кіраўніцтвам народнага артыста Беларусі Міхаіла Фінберга.

Прэзідэнт Беларусі Аляксандр Лукашэнка прыняў удзел у адкрыцці XXV Міжнароднага фестывалю мастацтваў «Славянскі базар у Віцебску». Кіраўнік дзяржавы выступіў на адкрыцці форуму, уручыў узнагароды дзеячам мастацтва Беларусі, Расіі і Украіны, якія ўнеслі значны ўклад у развіццё фестывалю, прэміі Саюзнай дзяржавы ў галіне літаратуры і мастацтва за 2015-2016 гады, спецыяльную ўзнагароду Прэзідэнта Беларусі «Праз мастацтва — да міру і ўзаемаразумення».

 «Славянскі базар» з’яўляецца пляцоўкай міру і дабра

Аб гэтым Прэзідэнт Беларусі Аляксандр Лукашэнка заявіў на ўрачыстым адкрыцці XXV Міжнароднага фестывалю мастацтваў «Славянскі базар у Віцебску».

Кіраўнік дзяржавы падкрэсліў, што гэты юбілейны форум стаў цэнтральнай падзеяй аб’яўленага ў Беларусі Года культуры. «Гэта свята ўвасабляе наша духоўнае багацце. Адкрытасць і цікавасць да культуры розных народаў. Нездарма мы аб’ядналіся калісьці — тры брацкія краіны — Беларусь, Расія і Украіна. Мы сталі ядром фестывалю і на працягу гэтых гадоў з розным поспехам, шчыра кажучы, дэманструем гэта культурнае адзінства», — сказаў Аляксандр Лукашэнка.

Ён адзначыў, што віцебскі фестываль параўноўваюць з Алімпійскімі гульнямі. «Калі перафразаваць П’ера дэ Кубертэна, мы гаворым: «О фестываль, ты — мір!» Гэта сапраўды пляцоўка міру і дабра. Думаю, яна яшчэ будзе запатрабавана», — сказаў беларускі лідар.

«У нашых дзяржавах асаблівае значэнне надаецца развіццю нацыянальнага мастацтва, беражліва захоўваюцца традыцыі і творчыя дасягненні папярэднікаў. Таму мы па праву можам заявіць, што гэтыя тры краіны — Беларусь, Расія і Украіна — цытадэль традыцыйнай культуры», — падкрэсліў Прэзідэнт.

Паводле яго слоў, гэта асабліва важна ў наш час, калі ў свеце страчваюцца арыенціры, якія раней аб’ядноўвалі людзей розных поглядаў, пакаленняў і культур. «Многія краіны сёння церпяць ад міжнацыянальнай, рэлігійнай варожасці, упадку маралі, вострых супярэчлівых канфліктаў, — сказаў Аляксандр Лукашэнка. — Думаю, справа ў тым, што плённае развіццё мастацтва патрабуе ўзаемаразумення, а не процістаяння, умацавання гуманістычных традыцый, а не варварскага разбурэння помнікаў культуры і адмаўлення ўсіх устояў грамадства».

«Менавіта на канструктыўных прынцыпах грунтуецца наш фестываль. У гэтым яго сіла і прывабнасць», — дадаў беларускі лідар.

Дзякуючы «Славянскаму базару» свет пазнаёміўся з Беларуссю

«Самае галоўнае, што кожны год фестываль дорыць мільёнам людзей сапраўднае, шчырае, душэўнае свята — свята дружбы, радасці, весялосці, творчасці, якое доўга жыве ў нашых сэрцах. Яно спалучае ў сабе класіку і сучаснасць, павагу да традыцый і свабоду мастацкага пошуку», — сказаў Прэзідэнт.

Гаворачы аб тым, што за чвэрць стагоддзя даў фестываль Віцебску, Беларусі і ўсяму свету, Аляксандр Лукашэнка адзначыў стварэнне ўнікальнага амфітэатра, у якім былі ўвасоблены самыя смелыя сцэнічныя навацыі. Таксама фестываль адкрыў сотні талентаў, даў пуцёўку ў жыццё масцітым артыстам, маладым выканаўцам і зусім юным дараванням, ператварыў горад Віцебск не толькі ў сучасную культурную сталіцу Беларусі, але і ў фестывальную сталіцу свету са штаб-кватэрай Сусветнай асацыяцыі фестываляў.

Заслуга «Славянскага базару» і ў прыцягненні ў Беларусь тысяч турыстаў, умацаванні яе станоўчага іміджу, ажыўленні эканомікі.

Прэзідэнт адзначыў, што колькасць удзельнікаў фестывалю расце з году ў год, на гэты раз ён стаў пляцоўкай для самавыяўлення таленавітых людзей з 45 краін свету.

Аляксандр Лукашэнка лічыць, што горад на Дзвіне — Віцебск не выпадкова стаў домам для «Славянскага базару». «Віцебшчына — адзін з унікальных цэнтраў славянскай духоўнасці, дзе існуе доўгая бесперапынная традыцыя культурнага будаўніцтва, творчага стварэння. Яна ідзе каранямі ў часы Ефрасінні Полацкай, Францыска Скарыны і прадаўжаецца па гэты дзень, — сказаў кіраўнік дзяржавы. — Тут нараджаліся новыя мастацкія напрамкі і фарміраваліся вядомыя школы майстэрства. Нямала знакамітых дзеячаў культуры родам з Прыдзвінскага краю».

Прэзідэнт, у прыватнасці, упамянуў такіх дзеячаў культуры і мастацтва, як кампазітар Анатоль Багатыроў, пісьменнікі Міхась Лынькоў, Уладзімір Караткевіч, Васіль Быкаў, Пятрусь Броўка, драматург Аляксей Дудараў, мастакі і скульптары Юдаль Пэн, Марк Шагал, Міхаіл Савіцкі, Андрэй Бембель, Заір Азгур. «Гэта вытокі нашага мастацтва, якім мы ганарымся», — падкрэсліў беларускі лідар.

На заканчэнне свайго выступлення Аляксандр Лукашэнка пажадаў «Славянскаму базару» доўгага і паспяховага творчага лёсу і аб’явіў XXV Міжнародны фестываль мастацтваў адкрытым.

 «Славянскаму базару» ўдаецца захоўваць сумленнасць і непрадузятасць

«Цяпер, калі нават самыя прэстыжныя міжнародныя конкурсы аказваюцца несвабоднымі ад закулісных палітычных інтрыг, нам удаецца захоўваць сумленнасць і непрадузятасць нашага «Славянскага базару». Менавіта таму ён знайшоў шлях да сэрцаў мноства гледачоў на пяці кантынентах планеты», — заявіў кіраўнік дзяржавы.

Аляксандр Лукашэнка адзначыў, што фестываль — равеснік суверэннай Беларусі, паколькі зрабіў свае першыя крокі ў год атрымання рэспублікай незалежнасці. «Ён развіваецца разам з краінай, і ў ім, як у люстэрку, адлюстроўваецца кожны этап станаўлення маладой дзяржавы», — сказаў Прэзідэнт.

З году ў год віцебскі форум збірае многіх праслаўленых выканаўцаў. У гэтым годзе сярод гасцей «Славянскага базару» такія знакамітасці, як Ала Пугачова, Валерый Лявонцьеў, Марыля Радовіч, Надзея Бабкіна, Палад Бюльбюль аглы, Томас Андэрс, Майкл Болтан і многія іншыя, адзначыў Прэзідэнт.

Лукашэнка ўручыў Міхаілу Фінбергу спецузнагароду «Праз мастацтва — да міру і ўзаемаразумення»

Прэзідэнт Беларусі Аляксандр Лукашэнка на ўрачыстым адкрыцці XXV Міжнароднага фестывалю мастацтваў «Славянскі базар у Віцебску» ўручыў спецыяльную ўзнагароду «Праз мастацтва — да міру і ўзаемаразумення», якая ў гэтым годзе прысуджана народнаму артысту Беларусі Міхаілу Фінбергу і Нацыянальнаму акадэмічнаму канцэртнаму аркестру Беларусі.

Спецыяльную ўзнагароду ад кіраўніка дзяржавы прыняў дырэктар і мастацкі кіраўнік аркестра Міхаіл Фінберг.

У сваім выступленні на адкрыцці фестывалю Аляксандр Лукашэнка адзначыў, што адной з памятных падзей гэтага фестывалю стала адкрыццё Плошчы зорак, якую ўпрыгожыла зорка Нацыянальнага акадэмічнага канцэртнага аркестра Беларусі.

Міхаіл Фінберг у сваю чаргу выказаў словы ўдзячнасці і адзначыў, што з моманту першага фестывалю ў Віцебску прайшло 28 гадоў (у Віцебску некалькі гадоў праводзіўся фестываль польскай песні, які ў далейшым ператварыўся ў «Славянскі базар». — Заўвага БЕЛТА). «Мы ўсе разам стварылі лепшы фестываль у Еўропе. Усе разам: вы, мы, наша дзяржава і, вядома ж, Аляксандр Рыгоравіч Лукашэнка, які нас вельмі сур’ёзна падтрымаў, калі ў нас былі пэўныя цяжкасці. У нас хацелі гэты фестываль проста адабраць, але мы яго трымаем, любім і будзем рабіць усё, што зможам, каб ён быў самым лепшым», — сказаў лаўрэат.

Паводле слоў Прэзідэнта, 25-годдзе фестывалю — гэта цудоўная магчымасць выказаць удзячнасць і шчырую любоў людзям, якія ствараюць гэтаму форуму добрую славу і папулярнасць.

Заслужаныя ўзнагароды атрымалі майстры мастацтваў, якія ўнеслі вялікі асабісты ўклад у станаўленне і развіццё фестывалю. Ордэны Францыска Скарыны Прэзідэнт уручыў рэжысёру, сцэнарысту і прадзюсару Сяргею Пятрову, рэжысёру-пастаноўшчыку, вядучай канцэртных і фестывальных праграм Заслужанага акадэмічнага ансамбля песні і танца Узброеных Сіл Украіны Аксане Антанюк. Гэтай жа ўзнагароды ўдастоена спецыяльны карэспандэнт аддзела рэдактараў галоўнай дырэкцыі падрыхтоўкі тэлепраграм генеральнага прадзюсарскага цэнтра Нацыянальнай дзяржаўнай тэлерадыёкампаніі Алена Спірыдовіч.

Аляксандр Лукашэнка нагадаў, што два дзесяцігоддзі таму фестываль «Славянскі базар» «хацелі адправіць у падарожжа па ўсім свеце», што магло прывесці да страты аўтэнтычнасці гэтага форуму мастацтваў. «Тады мне давялося сур’ёзна заняцца «Славянскім базарам» і дабавіць слова «ў Віцебску», таму што вялікія разумнікі хацелі яго прысвоіць, зрабіць чыста камерцыйным. Усе хацелі зарабляць грошы. А фестывалю не было б. Таму гэтыя трое (вядучыя «Славянскага базару» Алена Спірыдовіч, Уладзімір Бярэзін і Аксана Антанюк. — Заўвага БЕЛТА), колькі іх помню, з’яўляюцца душой нашага фестывалю».

Уладзімір Бярэзін у сваю чаргу адзначыў, што заслужаныя артысткі, цудоўныя дамы сёння ўдастоены ордэна Францыска Скарыны. «Я падумаў, трэба загадваць жаданне. Аб чым Бога прасіць і лёс!? Каб, прынамсі, яшчэ 25 гадоў усё было так, як сёння тут. Каб фестываль быў сусветнага маштабу, якім ён і з’яўляецца, але пры гэтым быў дамашнім, душэўным і цёплым. Другое — каб краіна, якая як зрэнку вока беражэ гэты фестываль, любіць яго, развівае, клапоціцца, жыла шчасліва, і каб бліжэйшыя 25 гадоў мы маглі ехаць у Беларусь, як едзем апошнія 25 гадоў — з хваляваннем, але пры гэтым як дадому», — сказаў Уладзімір Бярэзін.

Кіраўнік дзяржавы падзякаваў артыстам, рэжысёрам, работнікам тэлебачання, дырэкцыі фестывалю і ўсім, хто на працягу чвэрці стагоддзя аддана служыць «Славянскаму базару», а таксама гледачам і адданым паклоннікам фестывалю.

На адкрыцці форуму мастацтваў пераможцы міжнароднага конкурсу выканаўцаў эстраднай песні «Віцебск» розных гадоў уручылі Аляксандру Лукашэнку памятны знак «Славянскі базар у Віцебску. 25».

Памятны знак уяўляе сабой аб’ёмную кампазіцыю, якая ўвасабляе ўнікальнасць і своеасаблівасць гэтага форуму мастацтваў. У аснове кампазіцыі — галоўны сімвал фестывалю — васілёк. Побач з ім размешчаны расток з бутонам будучай кветкі. Гэта сімвалізуе яднанне ў праграме фестывалю прызнаных артыстаў і пачынаючых выканаўцаў, якія ў сольных праграмах і міжнародных конкурсах выступаюць на адных сцэнічных пляцоўках. Абвівае васількі нотны стан з ноткамі фестывальных фанфар.

«Славянскі базар» садзейнічае ўмацаванню даверу паміж народамі — Пуцін

Міжнародны фестываль мастацтваў «Славянскі базар у Віцебску» садзейнічае ўмацаванню даверу і ўзаемаразумення паміж славянскімі народамі. Аб гэтым гаворыцца ў прывітанні гасцям і ўдзельнікам XXV Міжнароднага фестывалю мастацтваў «Славянскі базар у Віцебску» Прэзідэнта Расіі Уладзіміра Пуціна.

Прывітанне Прэзідэнта на адкрыцці форуму зачытаў міністр культуры Расіі Уладзімір Мядзінскі. «Сардэчна вітаю вас з нагоды адкрыцця фестывалю мастацтваў «Славянскі базар у Віцебску». Вось ужо 25-ы раз Віцебск гасцінна сустракае таленавітых артыстаў, музыкантаў і выканаўцаў з розных краін, становіцца цэнтрам творчасці і дружалюбных стасункаў. Па традыцыі праграма «Славянскага базару» вельмі насычаная і разнастайная, яна ўключае канцэрты і конкурсы, выстаўкі і тэатральныя паказы, святочныя гулянні.

Такое маштабнае культурнае мерапрыемства, несумненна, садзейнічае духоўнаму яднанню славянскіх народаў, умацаванню даверу і ўзаемаразумення паміж імі.

Яго значэнне для развіцця міжнароднага гуманітарнага супрацоўніцтва складана пераацаніць, і, вядома, асаблівую каштоўнасць маюць намаганні арганізатараў па падтрымцы таленавітай моладзі, якая робіць першыя крокі ў свет вялікага мастацтва. Упэўнены, што цяперашні фестываль пройдзе ярка, відовішчна, падорыць удзельнікам і гледачам самыя пазітыўныя, незабыўныя ўражанні. Жадаю вам поспехаў і ўсяго найлепшага!», — падкрэслена ў віншаванні Уладзіміра Пуціна.

Прэміі Саюзнай дзяржавы ў галіне літаратуры і мастацтва за 2015-2016 гады ўручаны на адкрыцці «Славянскага базару»

Прэзідэнт Беларусі Аляксандр Лукашэнка 14 ліпеня на ўрачыстым адкрыцці XXV Міжнароднага фестывалю мастацтваў «Славянскі базар у Віцебску» уручыў прэміі Саюзнай дзяржавы ў галіне літаратуры і мастацтва за 2015-2016 гады.

Лаўрэатам прэміі стаў народны артыст СССР, мастацкі кіраўнік і галоўны дырыжор Дзяржаўнага акадэмічнага Вялікага сімфанічнага аркестра імя П.І.Чайкоўскага Уладзімір Федасееў.

Прэмія таксама прысуджана аўтарскаму калектыву ў складзе аўтара ідэі, архітэктара, протаіерэя, настаяцеля Усіхсвяцкага прыхода Мінска Фёдара Поўнага; скульптара, заслужанага дзеяча мастацтваў Беларусі Уладзіміра Слабодчыкава; архітэктара, лаўрэата Дзяржаўнай прэміі Беларусі Ігара Марозава.

Прэміі Саюзнай дзяржавы ўдастоены яшчэ адзін аўтарскі калектыў у складзе народнага артыста Беларусі і мастацкага кіраўніка ансамбля «Сябры» Анатоля Ярмоленкі; кампазітара, заслужанага дзеяча мастацтваў Беларусі Алега Елісеенкава; паэта, уладальніка літаратурнай прэміі «Залаты купідон» Івана Юркіна.

Прэміі прысуджаны за творы літаратуры і мастацтва, якія ўносяць вялікі ўклад ва ўмацаванне адносін братэрства, дружбы і ўсебаковага супрацоўніцтва паміж Беларуссю і Расіяй.

БелТА