Спрыяла гэтаму цёплае і сонечнае надвор’е, выхадны дзень, падрыхтоўчая работа. Можна было зрабіць запасы раслінаводчай прадукцыі на зіму, прычым па даступных цэнах, купіць па зніжках харчовыя бакалейныя тавары, пасядзець з сябрамі за кубкам чаю, паслухаць песні ў выкананні самадзейных артыстаў. Проста прагуляцца, падыхаць свежым паветрам у цудоўную пару бабінага лета (пры ўмове, што ўсё неабходнае ўжо набыта, упакавана).
Па словах намесніка старшыні раённага спажывецкага таварыства Аксаны Раманюк, у Камарын аўтамашыны з прадуктамі прыехалі рана. У 7.00 гадзін людзі ўжо былі на плошчы і чакалі, калі пачнецца гандаль. Асаблівым попытам карысталася бульба. Прадстаўнікі “Брагінкі” прадалі яе ў імгненне вока па 25 капеек за кілаграм, як і цыбулю па 48 капеек. І тое, і другое людзі бралі мяхамі.
Адборныя клубні з адкрытага акцыянернага таварыства “Імя Жукава” купілі оптам. Тым, хто цікавіўся, які гэта сорт, тлумачылі: “Уся бульба прададзена, засталося толькі тры мяшкі зерня”. Не абнадзеілі жадаючых прыехаць у гаспадарку і набыць другі беларускі хлеб на месцы. “Пакуль нічога не прадаём,” – пачулі пакупнікі ў адказ на свой запыт.
ААТ “Брагінскі” прапанавала камарынцам зерне. Нягледзячы на статус гарадскога пасёлка, які мае гэты прыгожы населены пункт над Дняпром, тут многія трымаюць птушку і свіней.
У восеньскім кірмашы прымала ўдзел фермерская гаспадарка з Хойніцкага раёна. Кошт бульбы ў прыватніка залежаў ад сорту і смакавых якасцяў клубняў.
Вялікія чэргі выстраіліся за садавіной, гароднінай. На прылаўку – апетытныя яблыкі, журавіны, таматы, салодкі перац, салёныя агуркі, сталовыя буракі і інш. Аматары свежамарожанай рыбы маглі выбраць дары мора па сваім гусце і прымальным кошце. Попытам карысталіся кулінарныя вырабы, смак якіх жыхары раёна паспелі ўжо ацаніць.
Да месца на восеньскім кірмашы былі паліцы са спецыяльнай літаратурай “Калейдоскоп хозяйственных премудростей”, адрасаваныя дбайным людзям, уладальнікам асабістых падсобных гаспадарак, садаводам і гароднінаводам. Прываблівалі выставы дэкаратыўна-прыкладнога мастацтва Камарынскага цэнтра культуры і вольнага часу, Брагінскага і Камарынскага цэнтраў творчасці дзяцей і моладзі. Сваю прадукцыю прапанавалі ДЛГУ “Камарынскі лясгас”, ААТ “Брагінскі камбінат бытавога абслугоўвання”.
Як станоўчы момант неабходна адзначыць добрую арганізацыю кірмашу. Раённае спажывецкае таварыства дапамагло людзям з дастаўкай адборных клубняў (за імі ездзіла ў Альшаны). Не патрэбна было турбавацца, чым завезці сеткі з бульбай да двара. Бралі ж не па адной.
Аналагічныя мерапрыемствы становяцца ўсё больш папулярнымі. Насельніцтва старэе, у вёсках застаецца ўсё менш людзей, якія вырошчваюць на сваіх сотках традыцыйную беларускую культуру. Ды і не кожны год яна родзіць. Надзея ўся на восеньскія кірмашы. Таму і спяшаюцца на іх жыхары пасёлкаў, каб паспець купіць другі хлеб. Ён у народзе ў пашане, мы, беларусы, вельмі любім бульбу і стравы з яе.
Сельгаспрадпрыемствам давядзецца забяспечваць не толькі бальніцы, школьныя і дашкольныя ўстановы, але і грамадзян.
Ніна СІНІЛАВА
Фота Ірыны СТЫЧЫНСКАЙ
