У Малажынскай СШ прайшоў конкурс чытальнікаў вершаў

Общество

rodnaa-mowa

Родная мова. Матчына… Наша, беларуская! Шмат аб ёй выказалі шчырых слоў пісьменнікі і паэты, шмат напісалі твораў, прасякнутых любоўю, заклапочанасцю пра яе лёс.

У мэтах папулярызацыі гэтага духоўнага скарбу народа, выхавання ў падрастаючага пакалення павагі і любові да яго, цікавасці да твораў айчынных майстроў слова ў Малажынскай сярэдняй школе адбыўся конкурс чытальнікаў вершаў на тэму “Залатая восень”. Прыемна, што спрыялі літаратурнаму святу і сонечнае надвор’е, і добры настрой вучняў. Кожны з іх меў магчымасць самастойна выбраць твор на прапанаваную тэматыку. А ў час мерапрыемства дзеці не толькі выразна чыталі вершы, але і разгадвалі загадкі, тлумачылі значэнне прымавак і прыказак.

Зачараваў журы меладычны голас Людмілы Масанавец, якая ў выніку стала пераможцай сярод вучняў сярэдняга звяна. Другое месца заняла Ксенія Малочка, трэцяе – Міхаіл Рагоўскі. Месцы сярод малодшых школьнікаў размеркаваны наступным чынам: першае – Віялета Харко, другое – Сцяпан Харко, а трэцяе дасталася Вікторыі Калясан.
Радасна, што мерапрыемства, прысвечанае роднай мове, пакінула светлы след у дзіцячых душах. Шанаваць гэты духоўны скарб, бараніць яго пяшчотную чысціню, паважаць гістарычную спадчыну народа, працягваць культурныя традыцыі продкаў – абавязак кожнага, хто нарадзіўся, вырас і жыве на беларускай зямлі.

Ларыса ГУЗ,
настаўніца беларускай мовы і літаратуры Малажынскай СШ



Добавить комментарий

Ваш e-mail не будет опубликован. Обязательные поля помечены *