Сучасны брэнд Беларусі – слуцкія паясы – можна набыць у Брагінскім гістарычным музеі

Общество Праздники и будни

Muzeuv_001

У гэтыя восеньскія дні, калі ўсе мы ўжо ў прадчуванні свята пасёлка, мясцовы гістарычны музей з карціннай галерэяй запрашае і жыхароў, і гасцей райцэнтра перанесціся ў эпоху, калі на беларускія землі прыйшла мода на доўгія, шырокія, шаўковыя ўзорыста-тканыя паясы.

Цяпер цудоўны ўзор дэкаратыўна-прыкладнога мастацтва, які стаў і гістарычным культурным сімвалам, і сучасным брэндам Беларусі, можна не толькі ўбачыць, але і купіць у Брагіне. Тры слуцкія паясы, прывезеныя з аднайменнага горада, занялі ганаровае месца ў нашым музеі.

Надзвычай прыгожы, сімвалічны і дарагі прадмет мужчынскага гардэроба, даступны толькі выхадцам з вышэйшых саслоўяў, ткалі ў Беларусі яшчэ ў XVIII стагоддзі. У адзенні магнатаў ён быў сімвалам прыналежнасці да эліты, шматвяковых сямейных традыцый і, вядома ж, заможнасці.

Сёння старадаўнія слуцкія паясы – рарытэт: у нашай краіне захоўваюцца адзінкавыя экзэмпляры і фрагменты, а большая частка твораў нацыянальнага дэкаратыўна-прыкладнога мастацтва знаходзіцца ў музейных і прыватных калекцыях свету.

Тым не менш, у старадаўнім Слуцку, на адным з найбуйнейшых прадпрыемстваў мастацкіх промыслаў Беларусі, адроджаны ўнікальныя традыцыі вырабу слуцкіх паясоў. Сучасныя майстры робяць іх дакладныя копіі, аналагі і мастацкія стылізацыі, якія могуць стаць эксклюзіўным сувенірам з Беларусі. У стварэнні задзейнічаны станок нямецкай фірмы, зроблены па адмысловай замове… Зрэшты, не будзем раскрываць усе таямніцы ўнікальнай тэхналогіі і паглыбляцца ў гісторыю нацыянальнага сімвала. Дадзім магчымаць пазнаёміць з усім гэтым самім супрацоўнікам музею. Тым больш што в.а. дырэктара ўстановы Надзея Мялешка, якая даўно цікавіцца данай тэмай, выкарыстала магчымасць пабываць на вышэйназваным прадпрыемстве, каб наглядна пазнаёміцца з вытворчым працэсам і ўнікнуць у мастацкія асаблівасці аўтэнтычных шэдэўраў – у гэтым дапамог створаны там музей гісторыі слуцкіх паясоў.

Muzeuv_002

І яшчэ адзін сюрпрыз, які падрыхтаваў для брагінчан да юбілейнай даты калектыў музея, – сувенірная прадукцыя з сімваламі пасёлка і мясцовым каларытам, што можа стаць найлепшым падарункам для блізкіх, знаёмых ці замежных сяброў.

Іншымі словамі, прыходзьце, цікаўцеся, купляйце!

Валянціна БЕЛЬЧАНКА



Пакінуць адказ

Ваш адрас электроннай пошты не будзе апублікаваны. Неабходныя палі пазначаны як *