11 кастрычніка Прэзідэнт Беларусі Аляксандр Лукашэнка ў Сочы прыняў удзел у пасяджэннях Савета кіраўнікоў дзяржаў СНД і Вышэйшага Еўразійскага эканамічнага савета.
На саміце Садружнасці кіраўнікі дзяржаў СНД падрабязна разгледзелі далейшае развіццё супрацоўніцтва ў палітычнай, эканамічнай, культурна-гуманітарнай і іншых ключавых сферах дзейнасці Садружнасці. Прэзідэнты прынялі заяву аб падтрымцы інстытута сям’і і традыцыйных сямейных каштоўнасцей, канвенцыі аб супрацоўніцтве ў галіне даследавання і выкарыстання касмічнай прасторы ў мірных мэтах.
У гуманітарнай сферы прыняты рашэнні аб аб’яўленні ў СНД 2019 года Годам кнігі, 2020 года — Годам 75-годдзя Перамогі ў Вялікай Айчыннай вайне, аб рэалізацыі міждзяржаўнай праграмы «Культурныя сталіцы Садружнасці» ў 2018 годзе ў Арменіі, у 2019 годзе — у Беларусі, у 2020 годзе — у Казахстане.
Традыцыйна ў парадак дня была ўключана тэматыка забеспячэння бяспекі і процідзеяння новым выклікам і пагрозам у рэгіёне і свеце ў цэлым. Лідары краін разгледзелі шляхі ўдасканалення дзейнасці Міжпарламенцкай асамблеі дзяржаў СНД і яе адаптацыю да сучасных рэалій. Рашэнні па разгледжаных пытаннях кіраўнікі дзяржаў замацавалі ў падпісаных па выніках сустрэчы дакументах.
У час пасяджэння Вышэйшага Еўразійскага эканамічнага саюза разгледжаны пытанні ў сферы інфарматызацыі, мытнага рэгулявання, канкурэнцыі, натуральных манаполій, прамысловага супрацоўніцтва і міжнароднай дзейнасці.
Заявы аб запатрабаванасці СНД трэба падмацоўваць канкрэтнымі крокамі ў эканамічнай сферы — Лукашэнка
Аб гэтым Прэзідэнт Беларусі Аляксандр Лукашэнка заявіў на пасяджэнні Савета кіраўнікоў дзяржаў СНД у Сочы ў вузкім складзе.
Аляксандр Лукашэнка нагадаў, што мінуў год з дня прыняцця ў Бішкеку рашэння Савета кіраўнікоў дзяржаў аб адаптацыі СНД да сучасных рэалій. Дакумент змяшчае дакладныя ўстаноўкі па развіцці і ўмацаванні Садружнасці. Лідары ўсіх краін пагадзіліся з неабходнасцю захавання арганізацыі. «Але мы па-ранейшаму топчамся на месцы. Заяву аб запатрабаванасці Садружнасці трэба падмацаваць канкрэтнымі дзеяннямі», — заклікаў Прэзідэнт.
Ён звярнуў увагу, што мэта практычна кожнага рэгіянальнага аб’яднання — узаемная адкрытасць рынкаў і роўныя ўмовы гаспадарання.
«Мы маем для гэтага добрую аснову — дагавор аб зоне свабоднага гандлю. Ён прадугледжвае, што адным з наступных крокаў павінна стаць забеспячэнне роўных умоў доступу да дзяржзакупак. У мінулым годзе пяццю дзяржавамі падпісаны пратакол аб правілах і працэдурах рэгулявання дзяржзакупак. Ідзе работа па яго рэалізацыі. Пад гэтым дакументам няма подпісаў асобных кіраўнікоў дзяржаў: Казахстана, Малдовы і Украіны. А гэта значыць, што мы зноў будзем мець выключэнні, — канстатаваў Аляксандр Лукашэнка. — З аднаго боку, заяўляем аб адкрытасці ў гандлі, з іншага — не дапускаем адзін аднаго да закупак у дзяржсектары, які фарміруе значную долю рынку».
Асобнае пытанне — стварэнне зоны свабоднага гандлю паслугамі. «Усе добра ведаюць, як ідзе работа над адпаведным пагадненнем. Збіраюцца эксперты, бяруць стары тэкст, мяняюць месцамі абзацы і накіроўваюць дакумент на разгляд. Праз два-тры месяцы сітуацыя паўтараецца. І так гадамі. У праекта каардынатара няма, а Выканкам, шчыра кажучы, з гэтай роляй не справіўся», — падкрэсліў беларускі лідар.
Кіраўнік дзяржавы заклікаў звярнуць асаблівую ўвагу на гэтыя праблемы, паколькі менавіта гандаль і эканоміка з’яўляюцца фундаментам любых адносін.
«Рэальны рух па двух напрамках, якія я абазначыў, удыхне ў арганізацыю жыццё. У адваротным выпадку СНД так і будзе заставацца ў сферы добрых намераў. Трэба даць неабходныя даручэнні нашым кабінетам міністраў, каб узнятыя тэмы былі разгледжаны», — сказаў Прэзідэнт Беларусі.
«Трэба да прытомнасці прыводзіць нашы структуры» — Лукашэнка раскрытыкаваў дзейнасць МПА СНД
Аляксандр Лукашэнка расказаў, што паспеў ужо абмяняцца з Прэзідэнтам Казахстана Нурсултанам Назарбаевым меркаваннем аб рабоце асобных структур СНД, у прыватнасці, Міжпарламенцкай асамблеі. Яны лічаць, што дзейнасць гэтага органа не дае належнай аддачы, але ж на яе ўтрыманне выдзяляюцца немалыя грошы.
«Калі гэта структура не працуе, можа, і адмовіцца ад яе? Хоць мы прапаноўвалі надзяліць яе пэўнымі, канкрэтнымі паўнамоцтвамі. Мы там нейкія мадэльныя законы прымаем, але ніводны з іх, напрыклад, у Беларусі не быў пакладзены ў аснову прыняцця нацыянальнага заканадаўства. Такога ў прынцыпе ніколі не было», — звярнуў увагу беларускі лідар.
«Атрымліваецца, што дэпутаты збіраюцца ў Піцеры, нібыта нешта абмяркоўваюць, гавораць. Але нават мы аб гэтым нічога не ведаем, таму што гэта не запатрабавана, — адзначыў Аляксандр Лукашэнка. — Чыноўнікаў плодзім незлічоную колькасць, а толку мала».
Прэзідэнт падкрэсліў, што да гэтых пытанняў неабходна падысці грунтоўна. Паколькі нават на ўзроўні кіраўнікоў дзяржаў разглядаюцца не самыя актуальныя і надзённыя праблемы. «Шчыра кажучы, мы і самі тут на высокім узроўні прымаем рашэнні і не заўсёды рэалізоўваем іх. Ды і рашэнні, паглядзіце, не нашага ўзроўню: нейкія заявы і іншае», — сказаў Аляксандр Лукашэнка.
На яго думку, больш важная тэматыка гандлёва-эканамічнага ўзаемадзеяння, якую беларускі бок узнімаў не раз, і бяспекі.
«Пытанні бяспекі — яны ўжо не стукаюць у дзверы, яны ўжо ў наш дом уварваліся. Мы іх абыходзім сарамліва: ці то мы баімся паставіць гэтыя пытанні, ці то разумеем, што не можам іх вырашыць», — канстатаваў беларускі лідар.
«Робім выгляд, што ўсё ў нас добра, збіраемся, заявы робім, а па сутнасці эфектыўнасць вельмі нізкая. Можа, нам неяк вызначыць кола спецыялістаў, якія аб’ектыўна нам прапанавалі б сур’ёзную рэформу або структурызацыю ў нашай дзейнасці?» — спытаў кіраўнік дзяржавы.
Такія праблемы існуюць і ў ЕАЭС, адзначыў ён. Але там больш канкрэтны парадак дня і больш канкрэтныя рашэнні, паколькі значнасць саюза вельмі высокая. «Я згадзіўся б з тым, каб у ЕАЭС было і парламенцкае вымярэнне, таму што ёсць што там абмяркоўваць. Трэба да прытомнасці прыводзіць нашы постсавецкія структуры», — заявіў Аляксандр Лукашэнка. Ён выказаў упэўненасць, што яго пазіцыю падтрымліваюць кіраўнікі іншых краін.
Прэзідэнты краін СНД прынялі заяву аб падтрымцы інстытута сям’і
Кіраўнікі дзяржаў — удзельніц СНД у час пасяджэння ў Сочы прынялі заяву аб падтрымцы інстытута сям’і і традыцыйных сямейных каштоўнасцей.
Лідары краін Садружнасці адзначылі важнасць выпрацоўкі сацыяльна-эканамічных мер, накіраваных на фарміраванне спрыяльных умоў для стварэння сям’і, аховы здароўя маці і дзіцяці, развіцця інстытута ўсынаўлення, падтрымкі маладых бацькоў, клопату аб старэйшых пакаленнях.
Прэзідэнты падкрэслілі ў заяве неабходнасць узаемадзеяння ў вырашэнні праблем, звязаных з парушэннем правоў дзіцяці, а таксама злачынствамі ў адносінах да дзяцей. У дакуменце таксама гаворыцца аб падтрымцы міжнароднай супольнасці ў забеспячэнні гендарнай роўнасці, захаванні балансу паміж работай і сям’ёй.
Краіны СНД паглыбляюць супрацоўніцтва ў барацьбе з тэрарызмам і карупцыяй
Адпаведныя рашэнні прыняты на пасяджэнні Савета кіраўнікоў дзяржаў Садружнасці ў Сочы.
Прэзідэнты адобрылі Канцэпцыю супрацоўніцтва ў сферы процідзеяння легалізацыі (адмыванню) даходаў, атрыманых злачынным шляхам, фінансаванню тэрарызму і распаўсюджвання зброі масавага знішчэння. Яна вызначае прынцыпы і задачы, асноўныя напрамкі і формы, інфармацыйнае і навуковае забеспячэнне ўзаемадзеяння ў гэтых галінах.
Лідарамі краін таксама ўзгоднена Канцэпцыя супрацоўніцтва ў процідзеянні карупцыі, якая была распрацавана ў мэтах выканання Міждзяржаўнай праграмы сумесных мер барацьбы са злачыннасцю на 2014-2018 гады. Дакумент прыняты для далейшага сістэмнага развіцця ўзаемадзеяння і забеспячэння скаардынаваных дзеянняў у гэтай сферы і накіраваны на развіццё прававых і арганізацыйных асноў узаемадзеяння, а таксама вызначае прынцыпы, мэты і задачы, асноўныя напрамкі і формы супрацоўніцтва, інфармацыйнае і навуковае забеспячэнне сумеснай работы.
У час пасяджэння Савета кіраўнікоў дзяржаў СНД таксама былі ўзгоднены і іншыя дакументы праваахоўнай тэматыкі. У прыватнасці, адобраны пагадненне аб размяшчэнні ў Расіі Бюро па каардынацыі барацьбы з арганізаванай злачыннасцю і іншымі небяспечнымі відамі злачынстваў на тэрыторыі Садружнасці, пратакол аб парадку перадачы наркатычных сродкаў, псіхатропных рэчываў і іх прэкурсораў, агнястрэльнай зброі, яе асноўных частак, боепрыпасаў, выбуховых рэчываў і ўзрыўных устройстваў, якія з’яўляюцца рэчавымі доказамі па крымінальных справах.
Аб’яднаную сістэму паветрана-касмічнай абароны створаць у СНД да 2025 года
Работа ў гэтым напрамку будзе будавацца ў адпаведнасці з зацверджанымі прэзідэнтамі асноўнымі напрамкамі адаптацыі аб’яднанай сістэмы проціпаветранай абароны дзяржаў — удзельніц СНД да вырашэння задач паветрана-касмічнай абароны.
Беларусь гатова максімальна хутка развіваць адносіны з Узбекістанам — Лукашэнка
Аб гэтым Прэзідэнт Беларусі Аляксандр Лукашэнка заявіў у час сустрэчы з Прэзідэнтам Узбекістана Шаўкатам Мірзіёевым у Сочы.
Кіраўнік дзяржавы адзначыў намеры Беларусі паглыбляць узаемадзеянне з Узбекістанам па ўсіх напрамках, у якіх зацікаўлены абедзве краіны. «Вы можаце быць упэўнены, што мы гэта зробім хутка. Настолькі хутка, наколькі партнёры ва Узбекістане разгорнуцца», — запэўніў Аляксандр Лукашэнка.
Прэзідэнт растлумачыў, што Беларусь гатова да актыўных дзеянняў у гандлёва-эканамічнай сферы. Разам з тым ён заўважыў: «Калі дзяржава не будзе падштурхоўваць, калі мы з вамі не будзем кантраляваць гэтыя працэсы, не будуць вырашацца пытанні».
Аляксандр Лукашэнка ў якасці перспектыўнага напрамку прывёў у прыклад тэкстыльную прамысловасць. «У вас ёсць бавоўна, у нас — тэхналогіі. І рынкі побач. Я за СП (сумесныя прадпрыемствы. — Заўвага БЕЛТА), мы проста зможам дамовіцца», — сказаў Прэзідэнт.
Паводле слоў кіраўніка дзяржавы, раней беларуска-ўзбекскія адносіны развіваліся павольнымі тэмпамі. Усё змяніла праведзеная год таму яго сустрэча з Шаўкатам Мірзіёевым у Самаркандзе, у час якой было прынята рашэнне прыкласці максімум намаганняў для развіцця двухбаковага супрацоўніцтва. «Гэта была імгненная сустрэча, але яна стала гістарычнай. Мы з вамі дамовіліся, не падпісваючы ніякіх дакументаў, назначылі адказных — і ўсё пайшло», — канстатаваў Аляксандр Лукашэнка.
Ён таксама звярнуў увагу, што Беларусь па многіх напрамках была самай развітой рэспублікай у Савецкім Саюзе. Краіне ўдалося захаваць і развіць усе неабходныя вытворчасці, якія ствараліся дзесяцігоддзямі, арыентаваць іх на экспарт.
«Мы прадаём цяпер і тэхналогіі, і тавары. Па цане і якасці яны пераўзыходзяць замежныя. Вось у чым сакрэт таго, што мы можам і ў Венесуэле працаваць, і ў Егіпце, і ў Судане — усюды», — адзначыў беларускі лідар.
Бюджэт ЕАЭС у 2018 годзе складзе больш за 8,1 млрд расійскіх рублёў
Адпаведнае рашэнне аб зацвярджэнні бюджэту прынята на пасяджэнні Вышэйшага Еўразійскага эканамічнага савета.
Пры гэтым на расходы Еўразійскай эканамічнай камісіі выдзелена звыш 7,7 млрд расійскіх рублёў, Суда ЕАЭС — каля 362 млн. Долевы ўзнос Беларусі ў бюджэт саюза складзе амаль 370 млн расійскіх рублёў. У бягучым годзе рэспубліка ўнесла 347 млн расійскіх рублёў.
Краіны ЕАЭС плануюць распрацаваць і запусціць уласны малы спадарожнік
Гэта пытанне абмяркоўвалася кіраўнікамі дзяржаў на пасяджэнні Вышэйшага Еўразійскага эканамічнага савета. Пытанні супрацоўніцтва краін ЕАЭС у сферы прадастаўлення касмічных і геаінфармацыйных паслуг на аснове нацыянальных крыніц даных дыстанцыйнага зандзіравання Зямлі былі першапачаткова ўключаны ў парадак дня. Краіны маюць намер распрацаваць адпаведную міждзяржаўную праграму.
У перспектыве ў Еўразійскім эканамічным саюзе плануюць пачаць кааперацыйную вытворчасць і запуск першага ўзору малога касмічнага апарата. Серыйны выпуск і разгортванне сумеснай арбітальнай групоўкі такіх спадарожнікаў запланавана да 2023 года.
Кіраўнікі дзяржаў — членаў ЕАЭС падпісалі па выніках пасяджэння распараджэнне, якім прапануецца падрыхтаваць прапановы па міждзяржаўнай праграме і да лістапада 2018 года прадставіць іх на разгляд.
Прэзідэнты краін ЕАЭС вызначылі асноўныя напрамкі лічбавага парадку дня да 2025 года
Дакумент прадугледжвае паскораны запуск ініцыятыў і праектны падыход да рэалізацыі лічбавага парадку дня па трансфармацыі галін эканомікі, рынкаў тавараў і паслуг, капіталу і працы. Асаблівая ўвага ў ім удзелена развіццю лічбавай інфраструктуры.
У дадатку да дакумента зацверджаны прыярытэты прапрацоўкі ініцыятывы, у іх ліку лічбавая прасочвальнасць перамяшчэння прадукцыі і паслуг, лічбавыя гандаль, транспартныя калідоры і прамысловая кааперацыя.
БелТА
