Брагіншчына… Ёй прысвячалі свае пранікнёныя радкі паэты, яе надзвычайную прыгажосць захавалі на шматлікіх палотнах мастакі, многія яе ўраджэнцы сталі славутымі людзьмі…
А наколькі добра ведае падрастаючае пакаленне аб звязаных з родным краем падзеях і фактах, паказалі вынікі вясновых гульняў раённага чэмпіянату па геаграфіі “Беларусь – краіна маёй будучыні!”, які прайшоў сярод вучняў 6-9 класаў 28 сакавіка і быў прымеркаваны да Года малой радзімы.
Як паведаміла метадыст вучэбна-метадычнага кабінета аддзела адукацыі, спорту і турызму райвыканкама Ірына КОЗЫРАВА, інтэлектуальныя спаборніцтвы, у якіх за аснову ўзята папулярная тэлегульня “Брэйн-рынг”, праходзяць у раёне другі год запар. Гэта была чацвёртая гульня з удзелам дзевяці каманд, якія ў выніку жараб’ёўкі падзяліліся на тры групы.
Чэмпіянат праходзіў у два этапы. І ў першым інтэлектуалы адказвалі на пытанні, якія датычыліся нашага краю. Напрыклад, у якім годзе і ў якім дакуменце ўпершыню быў згаданы Брагін? Вядома ж, у 1147-м у Іпацьеўскім летапісе. Было прапанавана назваць імя ўраджэнца раёна, мастака, апазнавальным знакам работ якога з’яўляецца бусел. У гонар гэтага чалавека, дарэчы, у Гомелі адкрыта мастацкая галерэя. Гэта Гаўрыіл Вашчанка.
А ці ведаеце вы, у склад якой вобласці ўваходзіў Брагінскі раён з 1938-га па 1954 год? Так, Палескай. А дзе знаходзіцца помнік садова-паркавага мастацтва? У Тэльмане. Плошча нашага раёна – 1960 км2. Якая дзяржава можа змясціцца на яго тэрыторыі амаль 5000 разоў? Гэта – Ватыкан.
Дзе знаходзіцца выток Брагінкі? На якой тэктанічнай структуры размешчаны раён? Як называецца запаведнік, частка якога займае значную тэрыторыю Брагіншчыны?
Падобных пытанняў, звязаных з гісторыяй і геаграфіяй раёна, было шмат, і радуе, што ўсе вучні, адказваючы на іх, паказалі добрыя веды. Па словах Ірыны Леанідаўны і членаў журы, пераможцаў ад астатніх удзельнікаў аддзялялі літаральна адзін-два балы.
У фінал выйшлі каманды, якія набралі ў сваіх групах найбольшую колькасць балаў. А тут, змагаючыся за прызавыя месцы, ім давялося працаваць з контурнымі картамі Гомельскай вобласці.
У выніку ў вясновых гульнях раённага чэмпіянату па геаграфіі “Беларусь – краіна маёй будучыні!” чарговую, ужо трэцюю перамогу святкавала каманда Чамярыскага дзіцячага сада – сярэдняй школы (трэнер – Андрэй Смалянчук). На ўсіх этапах інтэлектуальных спаборніцтваў упэўнена трымаліся вучні гімназіі г.п. Брагіна, заваяваўшы другое месца (трэнер – Крысціна Такун). Трэцяе месца заняла каманда Іялчанскай СШ (трэнер – Ганна Бельчанка).
Метадыст Ірына Козырава, павіншаваўшы пераможцаў і прызёраў, адзначыла высокую цікавасць вучняў да прадмета, іх мэтанакіраванасць, пажадала не спыняцца на дасягнутым, а ўпэўнена ісці да новых вышынь.
