Перад пачаткам жніва работнікі культуры прывіталі хлебаробаў у полі і пажадалі важкага коласа, добрага надвор’я, удачы і аптымізму.
Камбайнераў і іх памочнікаў, вадзіцеляў чакаюць напружаныя будні. Лёс ураджаю – у іх руках, таму і добрае слова, і лірычная песня былі да месца, спрыялі добраму настрою. Як і гарачае ліпеньскае сонца, што ў такі час садзейнічае выспяванню збажыны.
Па традыцыі па-святочнаму апранутыя жанчыны выходзяць у поле з сярпамі, зажынаюць першы сноп, які будзе захоўвацца на ганаровым месцы да наступнага года.
Працаўнікоў ААТ “Пераможнік” прывітаў старшыня раённага аб’яднання прафсаюзаў Раман Цеслянок. Яго пажаданне – каб плён быў у працы, завяршылі ўборку зерневых і зернебабовых у сціслыя тэрміны, без паломак тэхнікі і страт ураджаю.
Самой прыродай абумоўлена пачынаць жніво ў нашым паўднёвым раёне раней, чым у іншых. Няхай пройдзе яно на высокім арганізацыйным узроўні.
Ніна СІНІЛАВА