У наступным годзе мы адзначым юбілей – 100-годдзе з дня ўтварэння Беларускай Савецкай Сацыялістычнай Рэспублікі

Важное Главное

Гэтая падзея адыграла важную ролю ў зараджэнні беларускай дзяржаўнасці.

Глыбей пранікнуць у гістарычную эпоху і зразумець падзеі, якія адбываліся ў краіне ў тыя далёкія часы, дапаможа кніжная выстава, яку падрыхтавалі супрацоўнікі дзяржаўнай установы культуры “Брагінская цэнтральная бібліятэка”. У выданні Пятра Чыгрынава “Гісторыя Беларусі” ўзнімаюцца праблемы, якія па прычыне шэрагу абставін раней не раскрываліся з аб’ектыўна-навуковых пазіцый.

Пасля вызвалення тэрыторыі Беларусі ад нямецкіх акупантаў у 1918 годзе савецкая ўлада актывізавала работу па стварэнні беларускай нацыянальнай дзяржаўнасці. У канцы снежня ЦК РКП(б) прыняў рашэнне аб утварэнні БССР.
У снежні 1918 – студзені 1919 г. у Беларусі была створана адзіная сістэма дзяржаўнай улады: камбеды былі зліты з Саветамі. 2-3 лютага 1919 года ў Мінску адбыўся І Усебеларускі з’езд Саветаў рабочых, сялянскіх і чырвонаармейскіх дэпутатаў, на якім была абвешчана пастанова УЦВКа “Аб прызнанні незалежнасці БССР”. Першы Усебеларускі з’езд прыняў Канстытуцыю БССР.

Беларусы могуць ганарыцца як сваім мінулым, так і дасягнутым узроўнем развіцця культуры, мастацтва і навукі, дэмакратычнымі прынцыпамі грамадскага і дзяржаўнага ўстройства. Любоў да Радзімы грунтуецца на веданні гісторыі свайго народа, на жаданні раскрыць і асэнсаваць ва ўсёй паўнаце жыццё сваіх продкаў. Векавы шлях рэспублікі быў няпростым, на долю беларусаў выпала шмат выпрабаванняў, але ж у крывавых змаганнях за свабоду і незалежнасць яны адваявалі права людзьмі звацца. Нямала зрабілі для гэтага і жыхары Брагіншчыны.

Паважаныя чытачы! У многіх з вас захаваліся фотаздымкі родных і блізкіх, якія стваралі летапіс раёна, будавалі мірнае і шчаслівае жыццё, пакінулі аб сабе добрую памяць. Вельмі хацелася б атрымаць ад вас звесткі пра іх. Калі ласка, напішыце або патэлефануйце, каб мы маглі расказаць пра слаўных землякоў на старонках мясцовага выдання.

Ніна СІНІЛАВА
Фота Вольгі ПАЛЯШЧУК



Пакінуць адказ

Ваш адрас электроннай пошты не будзе апублікаваны. Неабходныя палі пазначаны як *