У аўторак, 12 лютага, як і было запланавана, мы накіраваліся ў ААТ “Малажынскі”.
Спачатку пабывалі на Дублінскай ферме, дзе пазнаёміліся з умовамі працы людзей, высветлілі, што іх хвалюе.
Галоўны спецыяліст аддзела ідэалагічнай работы, культуры і па справах моладзі Дзмітрый Тамко тут бывае часта, таму ў яго склалася сваё ўражанне пра гэтае вытворчае падраздзяленне і калектыў. Дысцыпліна тут не на вышыні. Усё малако, якое надойваюць, рэалізоўваюць не гатункам экстра ці вышэйшым, а толькі першым, што адбіваецца на заробках. Іх не назавеш нізкімі, бо лепшы аператар машыннага даення атрымлівае ў месяц, па словах загадчыцы МТФ, па 700 рублёў, а ў каго ёсць прагулы, на такую суму можа не разлічваць. Хаця ўсе працуюць у аднолькавых умовах, кармоў хапае, сілас, які раздалі дойнаму статку, якасны. Гэта пацвердзілі і самі жывёлаводы. Тады што перашкаджае асобным сумленна выконваць свае абавязкі і выйсці калі не ў лідары, дык быць не ў накладзе матэрыяльна? Толькі свая абыякавасць і недысцыплінаванасць.
Васіль Піляк
Шкада, што людзям няма дзе сабрацца разам, памяшканне, якое традыцыйна называлі “ленкомнатой”, патрабуе рамонту. Таму лісты з падзякай і падарункі старшыня райкама прафсаюза работнікаў АПК Віктар Балобан уручыў аператару машыннага даення Святлане Галавачовай і слесару даільных установак Васілю Піляку на вуліцы. Затое спецвопраткай забяспечылі ўсіх. Мужчынам выдалі плашчы, касцюмы і гумавыя боты, жанчынам – па два халаты і боты.
Уладзімір Прышчэпаў
На Юркавіцкай ферме ўтрымліваецца 160 галоў дойнага статка, як высветлілася, прадуктыўнасць іх невысокая, калі параўноўваць з надоямі па іншых фермах і гаспадарках. Трэці год невялікі калектыў узначальвае Святлана Ефіменка, ветэран працы, якая перажывае і за вытворчыя паказчыкі, і за парадак, дысцыпліну. На гэтым вытворчым падраздзяленні, як і на суседнім у Пераносах і Аляксееўцы, пакоі для адпачынку ёсць. Дырэктар адкрытага акцыянернага таварыства Міхаіл Пінжакоў на ферме бывае і раніцай, і ў абед, і вечарам, рэгулярна наведваюцца старшыня прафкама Паліна Пімянёнкава, спецыялісты гаспадаркі. Аб гэтым расказвалі вяскоўцы, якім такая ўвага імпануе.
Ганна Гарэлянкова і Наталля Ефіменка
Галоўны заатэхнік Тамара Чарнянок у інтарэсах вытворчасці зрабіла ў Пераносах кадравую перастаноўку. У снежні 2018-га на пасаду загадчыцы МТФ перавяла Наталлю Ефіменку, якая выпайвала цялят. Зараз гэтым займаецца Ганна Гарэлянкова, паколькі адказны ўчастак работы не ўсім пад сілу ды і не кожны з ім справіцца. А што такое рашэнне заатэхніка было правільнае, пацвердзіў Віктар Іванавіч: у памяшканнях стала чыста, не валяюцца акуркі. Спадзяёмся, і вынікі працы палепшацца.
Аляксееўскую ферму без загадчыка Уладзіміра Прышчэпава (стаж – 31 год) уявіць цяжка. Яму прафсаюзны лідар і адрасаваў словы падзякі за вернасць прафесіі, стараннасць, да якіх дадаў ліст з падзякай і падарунак.
Ніна СІНІЛАВА
Фота Вольгі ПАЛЯШЧУК