З конкурсу дзіцячай творчасці “Маленькі прынц” юныя брагінчане вярнуліся з узнагародамі

Общество

Харэаграфічны калектыў Брагінскай дзіцячай школы мастацтваў.

Адразу некалькімі поспехамі ўвянчаўся ўдзел вучняў Брагінскай дзіцячай школы мастацтваў у VIII адкрытым рэгіянальным конкурсе дзіцячай творчасці “Маленькі прынц–2019”.

Ён сабраў 27 і 28 сакавіка ў Светлагорску больш за 500 юных талентаў, якія праяўлялі сябе ў розных намінацыях і ўражвалі гледачоў сваімі здольнасцямі. А аўтарытэтнае журы тым часам ацэньвала ўзровень іх выканаўчага майстэрства, сцэнічнай культуры, артыстызм, раскрыццё мастацкага вобраза.

Узорны харэаграфічны калектыў “Брагінка” нашай школы, якім кіруе Таццяна Чырык, а харэографам з’яўляецца Алена Цярэшчанка, прадставіў танцавальную кампазіцыю “Каралі”. І вярнуўся з творчага спаборніцтва з кубкам і дыпломам другой ступені – стаў сярэбраным прызёрам у намінацыі “Эстрадны танец” (сярэдняя група). Віншуем!

Дастойным выступленнем парадавалі таксама вучні, якія аддалі перавагу інструментальнаму напрамку. Алена Раманюк і Яўген Шкурко, дарэчы, спасцігаюць ігру на баяне пад кіраўніцтвам Аляксандра Пяхоты ў Бурках, дзе працуюць класы школы мастацтваў. А з Яўгенам Манжосам у Брагіне трэці год займаецца Валянціна Жорава.

Усе тры юныя інструменалісты па выніках конкурсу заахвочаны граматамі за паспяховае выступленне (малодшая група).

Валянціна БЕЛЬЧАНКА



Пакінуць адказ

Ваш адрас электроннай пошты не будзе апублікаваны. Неабходныя палі пазначаны як *