Рэалізаваць сябе ў складзе экалагічных і сельскагаспадарчых атрадаў змогуць больш за 100 падлеткаў і маладых людзей Брагіншчыны

Важное Общество

На календары – пачатак чэрвеня. З чаго пачаліся ў вучняў канікулы? Адны накіраваліся да сваіх бабуль і дзядуль, другія наведваюць прышкольныя лагеры ці плануюць паездку ў санаторый, трэцім не сумна ў кампаніі сяброў… А хтосьці не супраць і папрацаваць.

Сёлета, па словах першага сакратара РК ГА “БРСМ” Юліі Сапегі, рэалізаваць сябе ў складзе экалагічных і сельскагаспадарчых атрадаў змогуць больш за 100 падлеткаў і маладых людзей Брагіншчыны. Пераважная большасць з іх – старшакласнікі. А працоўныя месцы для юнакоў і дзяўчат прадугледжаны ў КЖУП “Брагінскае” і адкрытых акцыянерных таварыствах.

Работа ў вольны ад вучобы час, як сведчыць практыка, становіцца ўсё больш папулярнай. Пацвярджэнне таму – колькасць жадаючых праводзіць канікулы не за камп’ютарам, а з капаніцай, венікам ці рыдлёўкай у руках, з кожным годам узрастае. І прычын, відаць, тут некалькі. Па-першае, прываблівае магчымасць атрымаць заробак і стаць хоць на нейкі час фінансава незалежным ад бацькоў. Па-другое, гэта выдатны спосаб самасцвердзіцца сярод аднагодкаў: сябраваць са шкоднымі звычкамі не модна, а вось зарабіць на ўласныя патрэбы – крута. І, па-трэцяе, такая занятасць дазваляе падлеткам павысіць уласную самаацэнку, адчуць сябе больш самастойнымі, пранікнуцца адказнасцю за вынікі сваёй працы. У рэшце рэшт, зведаць сапраўдны кошт хлеба.

Гімназісткі Аляксандра Цеснавец і Рэгіна Хісамава, напрыклад, аддаюць перавагу працы ў складзе экалагічнага атрада ўжо другі летні сезон. Лічаць, што правесці канікулы з карысцю ды яшчэ атрымаць за гэта фінансавае ўзнагароджанне – прыемны бонус. І без пачуцця сяброўства, калектывізму тут – ніяк.

Працоўны дзень, як і належыць ва ўзросце 14–16 гадоў, доўжыцца ў студатрадаўцаў чатыры гадзіны: з 8.30 да 12.30. Падлеткі, а гэта дзесяць вучняў гімназіі і Брагінскай школы, задзейнічаны ў навядзенні чысціні на нашых вуліцах і ў месцах адпачынку, паліве пасаджаных дрэў і кветак, праполцы клумб, іншых справах па добраўпарадкаванні райцэнтра. Іх працоўныя будні пачаліся з панядзелка і працягнуцца да 28 чэрвеня.

Куды плануюць накіраваць заробленыя грошы? Большасць, як выявілася, на школьныя абноўкі, так што для бацькоў гэта таксама добрае падспор’е – сямейны бюджэт падрасце.

Калектыўная праца аб’ядноўвае, вынік натхняе, даручанае выхоўвае адказнасць. Вось яны, плюсы лета працоўнага.

Валянціна БЕЛЬЧАНКА
Фота Ірыны СТЫЧЫНСКАЙ



Пакінуць адказ