Прафесія гэта не надта папулярная, але ад яе прадстаўнікоў залежыць многае. Кожны раз, калі размова заходзіць пра спецыялістаў па штучным асемяненні буйной рагатай жывёлы, я ўзгадваю расказ аднаго з дырэктараў гаспадарак, якая з ліку перадавых трапіла ў адстаючыя. А прычына ў тым, што на гэтай пасадзе апынуўся чалавек, які быццам і работу сваю сумленна выконваў, і перажываў за яе, ды вось вынікі аказаліся плачэўныя, таму не дачакаліся на лепшай ферме ні ацёлаў, ні прыплоду. Рэзка ўпала вытворчасць малака, і каб выйсці на ранейшыя пазіцыі, спатрэбіцца шмат часу.
Лічу, што ААТ “Брагінка” ў гэтым плане пашанцавала: асемяненнем жывёлы тут займаецца Вольга Міроненка, якая ўсведамляе сваю адказнасць за высокія надоі. Шлях у прафесію гады чатыры таму пачынаўся на старой ферме, прычым паспяхова. Разам з загадчыкам МТФ пераносіла з радзільнага аддзялення ў суседняе памяшканне па 100 цялят. Прыплоду было шмат, вынікамі работы былі задаволены ўсе, у тым ліку і сама Вольга.
Тры гады маладая жанчына расціла дачушку, а калі ўладкавала яе ў садзік, вярнулася на ранейшае месца і ўзялася за справу з яшчэ большым стараннем. Яе тут чакалі, а для новага заатэхніка Алены Кацубы Вольга стала першай дарадчыцай.
У апошні час “Брагінка” рэалізуе малако элітнага гатунку, і на пытанне, што гэтаму паспрыяла, Алена Васільеўна адказала коратка: “Працуем, стараемся, падтрымліваем чысціню, сочым за парадкам. Кантралюем санітарны стан даільнага абсталявання і посуду”.
Галоўны ветэрынарны ўрач Уладзімір Зубар дапоўніў: “Каб не было саматычных клетак у малацэ, неабходна своечасова праводзіць прафілактычныя мерапрыемствы і не дапускаць захворвання жывёлы”.
У даільнай зале комплексу ў абедзенны час гаспадарыла Валянціна Варужэнка і яе памочніцы. Яна аператар машыннага даення са стажам, таму і надзеі на яе ўскладваюць немалыя.
На комплексе ўтрымліваецца 539 кароў, 285 галоў маладняку ад шасці месяцаў і да года, звыш года – 692 галавы і 263 цяляці. Лічбы гэтыя прывяла невыпадкова: стан здароўя ўсіх кантралюе адзін ветэрынарны ўрач. А яшчэ ездзіць у суседнюю вёску Новы Пуць, дзе сканцэнтравана пагалоўе адкорму. Дапамагаюць яму практыканты, спецыялісты з раённага цэнтра, але ж усё роўна нагрузка немалая.
Задачы перад працаўнікамі фермы стаяць адказныя. Яны не выйшлі на ўзровень мінулага года па вытворчасці жывёлагадоўчай прадукцыі за студзень – верасень, таму стараюцца накіраваць свае намаганні на ліквідацыю мінусаў і паспяхова правесці зімова-стойлавы перыяд.
Ніна СІНІЛАВА