На мінулым тыдні наш раён наведаў начальнік упраўлення ДАІ ўпраўлення ўнутраных спраў Гомельскага аблвыканкама Андрэй Гаркуша. Ён сустрэўся з калектывам ААТ “Брагінаграсэрвіс”, каб пагутарыць аб бяспецы дарожнага руху і адказаць на пытанні работнікаў прадпрыемства.
Найперш Андрэй Мікалаевіч звярнуў увагу на рост дарожна-транспартных здарэнняў па віне вадзіцеляў у стане алкагольнага ап’янення. Нецвярозы чалавек вельмі небяспечны на дарозе, і гэта пацвярджае сумная статыстыка ДТЗ. Начальнік абласной Дзяржаўтаінспекцыі заклікаў брагінчан не быць абыякавымі, не заставацца ў баку, калі яны бачаць, што за руль садзіцца нехта на падпітку. Паведаміўшы аб сітуацыі ў ДАІ, можна выратаваць не адно жыццё.
Па словах Андрэя Гаркушы, сёлета павялічылася і колькасць наездаў на пешаходаў, у тым ліку і на “зебры”. Часта ахвярамі становяцца маладыя людзі, якія пераходзяць вуліцу ў капюшоне, што закрывае ім агляд, слухаюць гучную музыку ў навушніках ці адцягваюць сваю ўвагу на смартфон. Дарэчы, зараз разглядаюцца дапаўненні ў правілы дарожнага руху, паводле якіх пешаходам плануецца забараніць карыстацца гаджэтамі пры перасячэнні праезнай часткі.
Выказванне аб тым, што пешаход заўсёды мае рацыю, нам даводзіцца чуць часта, але ж не трэба пры гэтым забываць і аб бяспецы. Вядома, калі чалавек нечакана з’явіцца на дарозе, вадзіцель не зможа тут жа спыніць аўтамабіль, тым больш зімой. Аб гэтым патрэбна памятаць. Між тым здараецца, што і некаторыя вадзіцелі, парушаючы правілы, не прапускаюць пешаходаў.
Начальнік ДАІ вобласці таксама парэка-мендаваў не эканоміць на зімовых шынах, нагадаў аб правілах перавозкі дзяцей і адказаў на шматлікія пытанні брагінчан.
Вольга ПАЛЯШЧУК
Фота аўтара
