Сёлета на Брагіншчыне са школьным жыццём развіталіся 116 юнакоў і дзяўчат. 10 чэрвеня для іх прайшлі ўрачыстыя мерапрыемствы. Сярод выпускнікоў – двое медалістаў. Гэта вучні Малажынскай школы Іван Харко і Валерыя Харко.
Выпускны вечар стаў важнай падзеяй не толькі для вучняў, іх бацькоў і настаўнікаў, але і для ўсіх жыхароў Малажына, якія ў сераду прыйшлі ў мясцовую ўстанову культуры, каб павіншаваць сваіх юных землякоў з заканчэннем школы. Афіцыйную частку мерапрыемства адкрыла дырэктар школы Надзея Лявоненка, якая ўручыла выпускнікам атэстаты аб сярэдняй адукацыі.
Дакументы асобага ўзору з рук намесніка старшыні райвыканкама Іны Міхаленкі атрымалі Іван Харко, які ўзнагароджаны залатым медалём, і Валерыя Харко – сярэбраным. Іна Анатольеўна выказала ўпэўненасць, што талент і працавітасць сённяшніх выпускнікоў абавязкова прынясуць карысць роднаму краю.
Поспехаў у дасягненні пастаўленых мэт учарашнім школьнікам пажадалі таксама ўпаўнаважаны прадстаўнік галоўнага ўпраўлення адукацыі Гомельскага аблвыканкама Алег Макушкін і начальнік аддзела адукацыі, спорту і турызму райвыканкама Галіна Васяновіч.
Шмат цёплых слоў сказалі настаўнікам і бацькам галоўныя героі ўрачыстасці, якія з нецярпеннем чакалі гэтае свята і старанна да яго рыхтаваліся. Вечар пакінуў незабыўныя ўражанні ў душы кожнага выпускніка, і даў магутны штуршок для пачатку паспяховага дарослага жыцця.
Фота Вольгі ПАЛЯШЧУК
