Кожны аўтар можа выказаць любоў да Бацькаўшчыны, мясцін, дзе нарадзіўся, зрабіў першы крок, дзе прайшлі дзяцінства і юнацтва, дзе зведаў шчаслівыя імгненні свайго жыцця. І тое блізкае кожнай паэтычнай душы нашага сучасніка, пра што некалі пісалі паэты-землякі Сяргей Палуян, Уладзімір Верамейчык, Мікола Ракітны, Уладзімір Чапега і іншыя, паўтарыць у сваіх творах. Каб тыя, хто сёння жыве на гэтай зямлі, ганарыліся яе гістарычным мінулым і сучасным.
Аб умовах раённага конкурсу мы папрасілі расказаць загадчыцу аддзела арганізацыйна-метадычнай работы ДУ “Брагінскі раённы дом культуры” Любоў ДУБАТДЗЕЛ.
– Конкурс аўтарскіх твораў “Малая радзіма, ты сонцам і песняй сагрэтая” праводзіцца дыстанцыйна (па аўдыя- і відэазапісах) у наступных намінацыях: верш, песня, легенда. Фінал адбудзецца 28 жніўня ў рамках святочных мерапрыемстваў, прымеркаваных да заснавання Брагінскага раёна, – паведаміла Любоў Аляксандраўна. – Удзел у ім могуць прыняць усе, хто пажадае (салісты, чытальнікі, творчыя аўтарскія калектывы). Тэмы, якія прапануем: “Малая радзіма, ты сонцам і песняй сагрэтая”, “Мае землякі, нізка вам пакланюся”, “І дзякуй вам, што мы не ведалі вайны”.
Для ўдзелу ў мерапрыемстве неабходна прадаставіць заяву, аўдыя- і відэазапісы сваіх твораў на носьбітах (пры жаданні запіс можна зрабіць у раённым доме культуры). Матэрыялы прымаюцца да 15 жніўня. Іх можна даслаць на электронны адрас: rdk-bragin@mail.ru. Даведкі па тэлефоне 8(029) 394-51-66. Удзельнікі нясуць адказнасць за захаванне Закона Рэспублікі Беларусь ад 17 мая 2011 года №262-3 “Аб аўтарскім праве і сумежных правах”.
Падрыхтавала Ніна СІНІЛАВА