26 красавіка 2006 года. Кіраўская ферма КСУП “Камарынскі”. На падрыхтаваную непадалёку ад яе пляцоўку апускаецца верталёт кіраўніка дзяржавы. Чаму менавіта гэтую гаспадарку наведаў Прэзідэнт, чым яна зацікавіла?
Справа ў тым, што тут праз дзесяць гадоў пасля сумна-трагічных чарнобыльскіх падзей заняліся мясной жывёлагадоўляй. З вытворчасці малака пераключыліся на адкорм буйной рагатай жывёлы. Дапушчальны ўзровень утрымання цэзія-137 у малацэ – 100 Бк/л, стронцыю-90 – 3,7 Бк/л. У норме яно, як і іншы прадукт, не павінна змяшчаць радыенукліды, а гэта пасля радыяцыйнай забруджанасці тэрыторыі стала праблемай. Выхад быў знойдзены: прайшлі пераспецыялізацыю, пачалі разводзіць “лімузінаў”.
Рыгор АНАПРЭЕНКА, дырэктар ААТ “Камарынскі” (так зараз называецца сельгаспрадпрыемства):
– Першых бычкоў лімузінскай і сіментальскай пароды нам перадалі з падсобнай гаспадаркі інстытута радыялогіі, які знаходзіўся ў Савічах. З гэтага ўсё і пачалося. Потым самі закуплялі жывёлу ў племянных гаспадарках нашай рэспублікі, у Белгарадскай вобласці Расіі. Ездзілі нават у Венгрыю, адкуль прывезлі 150 бычкоў-вытворцаў. “Лімузіны” прыжыліся. Паступова нарасцілі пагалоўе, рэалізоўвалі не толькі мяса, але і жывёлу. Справа аказалася прыбытковая. Аб гэтым я расказваў кіраўніку дзяржавы ў час яго візіту ў наш раён. Мы паказалі Аляксандру Рыгоравічу і чыстапародную жывёлу, і змешаную.
Зараз на чатырох фермах утрымліваецца 3065 галоў мясной жывёлы, у тым ліку 1340 – кароў. З 1 мая да сярэдзіны кастрычніка, у залежнасці ад надвор’я, пагалоўе знаходзіцца на адгоннай пашы. Да сямі месяцаў цяля ўтрымліваецца разам з каровай на падсосе. Мы навучыліся атрымліваць танную ялавічыну, хаця зараз так званае мармуровае мяса “лімузінаў” камбінаты прымаюць па той жа цане, што і чорна-пярэстай пароды.
Ніна СІНІЛАВА
Фота Вольгі ПАЛЯШЧУК