У вёсцы Хракавічы жыве Міхаіл Шупан – чалавек з абмежаванымі магчымасцямі, але з вялікім жаданнем дасягаць поспехаў у шахматным спорце.
Нарадзіўся Міхаіл ва ўкраінскім горадзе Чаркасы. У дзяцінстве ўрачы паставілі яму цяжкі дыягназ, з якім, здавалася б, немагчыма патрапіць у спорт. Але, дзякуючы сваёй сіле волі і падтрымцы маці, гэты чалавек дабіўся свайго, бо ведаў: нельга апускаць рукі.
Цікавасць да шахмат у Міхаіла з’явілася ў 2018 годзе, падчас абвастрэння хваробы. На той момант ён не мог у другі раз самастойна хадзіць. Таму падчас лячэння і рэабілітацыі было вырашана набыць яму ноўтбук. Так і пазнаёміўся бліжэй з шахматным спортам. Пачаў самастойна вывучаць правілы і практыкавацца на анлайн-турнірах. Праз пэўны час у Міхаіла з’явіліся першыя перамогі і разуменне, што ён знайшоў сябе. Як толькі маладому чалавеку ўдалося ўстаць на ногі, ён пачаў ездзіць на турніры ў іншыя гарады Беларусі, адкуль вяртаўся з узнагародамі.
Міхаіл нават знайшоў асабістага трэнера па шахматах у Мінску, які дапамагае яму развівацца і ўдасканальваць свае навыкі. Больш за тое, сёлета ён збіраецца спаборнічаць за I разрад. Калі ўсё пойдзе так, як плануецца, можа ўвайсці ў склад паралімпійскай нацыянальнай зборнай Беларусі па шахматах. Барацьба і імкненне да поспеху сталі неад’емнай часткай жыцця Міхаіла.
Больш за дзесяць год маладога чалавека наведваюць работнікі аддзялення сацыяльнай рэабілітацыі і абілітацыі інвалідаў ТЦСАН. І за гэты час ён зрабіў значныя поспехі. Міхаіл ужо мае больш за 20 дыпломаў розных ступеняў. А нядаўна ён выйграў Кубак СНД па шахматах сярод інвалідаў, спаборніцтвы праходзілі анлайн, – гэта значнае дасягненне, якое пацвярджае яго выдатныя навыкі.
Такія поспехі не былі б магчымыя без падтрымкі самага важнага чалавека ў жыцці – маці Алены Леанідаўны. Яна з’яўляецца для сына прыкладам. А для ўсіх нас гэта яшчэ адно пацверджанне таго, што сапраўдная сіла заключаецца ў рашучасці, мэтанакіраванасці і настойлівасці.
