У беларускай кухні знойдзецца нямала страў, здольных здзівіць сваім густам і прастатой прыгатавання. Адна з іх – зуцы, грыбныя катлеты, рэцэпт якіх беражліва перадаецца з пакалення ў пакаленне. Першапачаткова гэта была ежа сялян, якая дазваляла сытна накарміць сям’ю дарамі лесу, сёння зуцы – жаданы госць на любым стале.
Сутнасць стравы простая: грыбы, сабраныя ў лесе (чырвонагаловікі, падбярозавікі, шампіньёны і іншыя), перамолваюцца ў фарш, змешваюцца з салам, цыбуляй, яйкам і спецыямі, а затым смажацца да залацістай скарыначкі. Сакрэт непаўторнага густу – у спалучэнні розных відаў грыбоў.
Зрэшты, не абавязкова адпраўляцца ў лес за грыбамі. Сёння зуцы рыхтуюць і з шампіньёнаў, якія даступныя круглы год. Галоўнае – не забыцца пра сакрэтны інгрэдыент, які ўзмацняе «грыбны дух».
Інгрэдыенты:
- шампіньёны або лясныя грыбы – 300 г
- белыя сушаныя грыбы – 1–2 шт.
- курынае яйка – 0,5 шт.
- рэпчаты лук – 1 шт.
- сала салёнае – 40 г
- перац чорны молаты – 1–2 шчэп.
- соль – 2 шчэп.
- чабор – 1–2 шчэп.
- паніровачныя сухары – 3–4 ст. л.
- раслінны алей – для смажання
- смятана – для падачы
Прыгатаванне:
Шампіньёны памыць, абнавіць месца зрэзу на ножцы.
Белыя сушаныя грыбы расцерці ў ступцы ў парашок.
Перамалоць грыбы праз мясарубку. Следам таксама прапусціць праз мясарубку кавалачак сала (без скуркі) і цыбуліну. Сала дадасць сакавітасці нашай стравы, а цыбуля – водару. Дарэчы, яе можна нацерці на дробнай тарцы, тады зуцы будуць яшчэ далікатней.
У фарш дадаць парашок з белых грыбоў, соль, перац, чабор. Для злепвання таксама спатрэбіцца палова курынага яйкі. Больш на такі аб’ём класці не варта, інакш катлеты будуць расцякацца. Як аддзяліць палову? Асобна ў піалу разбіце яйка, размяшайце відэльцам і ўліце ў міску з фаршам прыкладна 1/2 частку.
Каб фарш стаў шчыльней, у яго трэба дадаць пару лыжак сухароў. Падсыпаць паступова, старанна змешвайце. Кансістэнцыя павінна атрымацца такая, як быццам бы вы рыхтуеце самы звычайны мясной катлетны фарш. Гэта значыць не занадта шчыльны, але і такі, які не расцякаецца.
Сфарміраваць катлеты (або біточкі), абваляць у сухарах. Разагрэць алей і абсмажыць зуцы на патэльні да залацістай скарыначкі з двух бакоў.
Агонь ўмераны.
Смажаныя грыбныя катлеты давесці да гатоўнасці ў духоўцы – 180 градусаў 8–10 хвілін.
Падаюць зуцы звычайна са смятанай і свежай зелянінай. У якасці гарніру ідэальна падыдзе бульбяное пюрэ або грачаная каша.
Гэта страва – яшчэ адзін спосаб разнастаіць свой рацыён і адчуць смак беларускай кухні.
