Неспрыяльныя ўмовы надвор’я, уключаючы багатыя снегапады і ўзмацненне маразоў, прывялі да шэрагу сур’ёзных праблем на большай частцы тэрыторыі Беларусі. У апошнія дні пачасціліся выпадкі адключэнняў электразабеспячэння, што, у сваю чаргу, выклікала збоі ў працы водазабораў і кацельняў. Акрамя таго, непагадзь стала прычынай абвальвання дахаў сельскагаспадарчых будынкаў.
Па словах інспектара сектара прапаганды і ўзаемадзеяння з грамадскасцю Брагінскага РАНС Анастасіі Ветравай, неабходна прыняць усе меры для забеспячэння бяспекі ў гэты няпросты перыяд:
– Грамадзянам рэкамендуецца пазбягаць праходу пад карнізамі і бакамі дахаў. З-за рэзкіх перападаў тэмператур на будынках утвараюцца ледзяшы, падзенне якіх можа прывесці да сур’ёзных траўмаў. Нават невялікі лядзяш можа нанесці чалавеку сур’ёзную траўму – кожны павінен паклапаціцца пра сваё жыццё і здароўе.
Ва ўмовах моцнага марозу варта скараціць час знаходжання на адкрытым паветры. Абавязковым з’яўляецца абарона ўсіх частак цела ад холаду.
