Ёсць беларускія гарады, добра вядомыя не толькі ў краіне, але і за яе межамі. Нясвіж – адзін з такіх. І, магчыма, вам будуць цікавыя некаторыя факты з гісторыі яго славутага замка.
- Першапачаткова Нясвіжскі замак быў драўляны. Узнікненне мураванага звязана з дзейнасцю Мікалая Крыштафа Радзівіла Сіроткі. Ён вырашыў, што княжацкая рэзідэнцыя павінна вызначацца магутнасцю, адпавядаць тагачасным патрабаванням фартыфікацыі і наглядна дэманстраваць веліч радзівілаўскага роду. Таму замест перабудовы старога драўлянага замка князь пачаў узводзіць новы на паўвостраве, утвораным двума штучнымі азёрамі на р. Уша. Работы пачаліся ў 1582–1583 гг. і ў асноўным былі завершаны да 1600 г. Замак лічыўся адным з найлепшых абарончых збудаванняў ВКЛ.
- У час Паўночнай вайны ў 1706 годзе шведскае войска на чале з Карлам ХІІ разрабавала замак і знішчыла яго ўмацаванні. Аднаўленне пачалося ў 1720-х, у часы Міхала Казіміра Радзівіла Рыбанькі. Замак стаў цэнтрам культурнага жыцця, а абарончая функцыя адышла на другі план. У палацы была абсталявана тэатральная зала, знаходзіліся капліца, багатая бібліятэка, партрэтная галерэя, калекцыі зброі і даспехаў, манет і медалёў.
Радзівілы былі ўладальнікамі гэтага замка каля чатырох вякоў.
- У гады Першай сусветнай вайны і наступных рэвалюцыйных падзей замак істотна не пацярпеў. З усталяваннем савецкай улады яго лёс доўгі час не быў вызначаны. Тут планавалі адкрыць музей, аўтадарожны тэхнікум, дом адпачынку. Калекцыі, бібліятэка, архіў былі перададзены розным установам, а значная іх частка ўвогуле страчана. Падчас нямецкай акупацыі ў замку дзейнічаў ваенны шпіталь. Пасля вызвалення ў 1944 г. прынята рашэнне аб арганізацыі тут санаторыя, які дзейнічаў да 2001 г.
- У 1993 г. урад Рэспублікі Беларусь прыняў пастанову аб стварэнні музея-запаведніка «Нясвіж», быў распрацаваны і зацверджаны план рэстаўрацыі палаца. 15 ліпеня 2005 г. архітэктурны, жылы і культурны комплекс Радзівілаў быў уключаны ў Спіс аб’ектаў Сусветнай спадчыны ЮНЕСКА як «выдатны прыклад архітэктурнага ансамбля, які ілюструе значны перыяд чалавечай гісторыі». Пасля завяршэння рэстаўрацыйных работ у ліпені 2012 г. экспазіцыя цалкам адкрылася для наведвальнікаў.
- Нясвіжскі замак прыцягвае ўвагу адразу, паколькі выглядае вельмі рамантычна: вялікая пабудова ў гарманічным спалучэнні з вежамі розных памераў і дэкаратыўнымі аздабленнямі. У час росквіту ў палацы было 12 залаў і 365 пакояў у адпаведнасці з колькасцю месяцаў і днямі года. Увогуле, у комплексе вы можаце назіраць сіметрыю, якая надае замку асаблівы шык. Цэнтральная пабудова мае пірсы, рэльефныя дэкарацыі, скульптурныя кампазіцыі і разьбяныя аздабленні. Збоку – тэраса з дзвюма вежамі. Усходняя мае капліцу князя.
Штогод славутасць наведвае каля 400 тысяч турыстаў з усяго свету.
Самыя цікавыя і важныя навіны шукайце ў нашых сацыяльных сетках: TikTok, Instagram, VK, Одноклассники, Telegram, Facebook.
