У мінулы чацвер у Камарынскай школе адбыліся спаборніцтвы па валейболе. Спачатку на спартыўную пляцоўку планавалі выйсці каманды супрацоўнікаў міліцыі і падлеткаў, якія знаходзяцца на ўліку ў інспекцыі па справах непаўналетніх РАУС. Потым да іх далучылася зборная вёскі Краснае, таму гульня атрымалася больш займальная, але і напружаная.
Як адзначыла старшы інспектар ІСН Алена Катлабай, нішто так не дысцыплінуе і не выклікае прыхільнасці да здаровага ладу жыцця, як спорт. Прыцягнуўшы моладзь у спартзалы, супрацоўнікі міліцыі на ўласным прыкладзе імкнуцца паказаць падлеткам, што жыццё можа быць цікавейшым, калі займаешся любімай справай, удзельнічаеш у разнастайных мерапрыемствах і спаборніцтвах, маеш магчымасць сустракацца са сваімі аднагодкамі з іншых населеных пунктаў, раёнаў, абласцей.
Перамогу ў турніры святкавала каманда з Краснага – валейбалісты са стажам. Прадстаўнікі РАУС занялі другое месца, школьнікі – трэцяе. Паражэнне ад больш вопытных “калег” па спартыўнай пляцоўцы не сапсавала настрою юным спартсменам. Іх галоўныя перамогі наперадзе, і ім ёсць да чаго імкнуцца. А для гэтага трэба шмат трэніравацца, і калі спорт захопіць цалкам, нават думкі пра супрацьпраўныя ўчынкі не ўзнікне. Таму такія спаборніцтвы ў раённым аддзеле ўнутраных спраў плануюць праводзіць і далей. Арганізатары спадзяюцца, што падобныя мерапрыемствы дапамогуць так званым цяжкім падлеткам змяніць свае паводзіны, прымусяць задумацца над далейшым жыццём, вызначыць арыенціры. Фото здесь.
