Тэма тыдня: Лукашэнка патрабуе няўхільнага выканання яго даручэнняў

Тема недели

belta

Прэзідэнт Беларусі Аляксандр Лукашэнка зрабіў рабочую паездку ў Аршанскі раён Віцебскай вобласці. Асноўная ўвага кіраўніка дзяржавы была ўдзелена развіццю вытворчай сферы, у тым ліку рабоце праблемных прадпрыемстваў. Падагульняючая размова аб развіцці сацыяльнай і вытворчай сферы рэгіёна адбылася 14 жніўня на выязной нарадзе.

«Двойка з мінусам» — Лукашэнка строга раскрытыкаваў якасць работы па развіцці Аршанскага інструментальнага завода

Адпаведную заяву кіраўнік дзяржавы зрабіў 13 жніўня, наведваючы гэта прадпрыемства.

Тое, што пастаўленыя задачы не выконваюцца належным чынам, Прэзідэнт убачыў, яшчэ толькі пад’язджаючы да завода. Ён звярнуў увагу, што нават спробы навесці парадак на тэрыторыі не прынеслі належнага выніку. Усё было зроблена ў спешцы і няякасна. «Не любіце вы людзей, не любіце вы завод. Калі ўжо робіце тут нейкую паказуху, зрабіце бардзюр, навошта ў траву класці асфальт. Гэта што, культура? Вось за гэта чыноўнікаў і ненавідзіць часам народ — за вашыя бязладнасць і непарадак», — сказаў кіраўнік дзяржавы.

У гэтым жа ключы размова ішла і пасля наведвання прадпрыемства. Прэзідэнт застаўся вельмі незадаволены ўбачаным. «Хутчэй за ўсё, міністра (міністра прамысловасці Віталя Воўка. — Заўвага БЕЛТА) сюды накіруем да цябе працаваць. У яго выбар адзін: або турма, або сюды, — публічна аб гэтым кажу. Пакуль двойка з мінусам і да цябе прэтэнзій шмат. Ніколі не займайся ашуканствам. Ты — малады кіраўнік. Ты тут галоўны. Не дай бог, я перад новым годам прыеду, і маё вока зачэпіцца за што-небудзь. Ты ведаеш, што будзе», — папярэдзіў Прэзідэнт, звяртаючыся да дырэктара завода Уладзіслава Бардзюкова.

Кіраўнік дзяржавы растлумачыў, чаму так важна аднавіць эфектыўную работу прадпрыемства. Гэта звязана з тым, што ў эканоміцы краіны шмат прадпрыемстваў апрацоўчай і перапрацоўчай накіраванасці, і на кожным ёсць патрэбнасць у тых ці іншых інструментах, пачынаючы ад буйных вытворчасцей, накшталт «Гомсельмаша», і заканчваючы невялікімі сельгаспрадпрыемствамі. «Я за яго не чапляўся б, калі б нам гэты прадукт не быў патрэбны, — падкрэсліў беларускі лідар. — Таму інструментальны завод трэба аднавіць на самым высокім узроўні, каб «Гомсельмаш», МТЗ, МАЗ і ўсе іншыя прадпрыемствы, нават перапрацоўкі і сельскай гаспадаркі, атрымалі добры інструмент. Вось чаму я чапляюся за гэты завод».

«Пакуль гэта ідыёцкае стаўленне да майго даручэння. Але я ведаю, што рабіць. Улады ў мяне хопіць. А міністра прамысловасці з заўтрашняга дня сюды, і няхай пачынае працаваць. На якой пасадзе — вызначы», — заявіў Прэзідэнт.

Аляксандру Лукашэнку ў час наведвання прадпрыемства далажылі аб фінансава-эканамічным стане завода, перспектывах развіцця і прымаемых мерах па вывядзенні на ўстойлівую работу. Пэўныя намаганні ў гэтым напрамку прыкладзены і ёсць пазітыўныя зрухі.

Аднак Аляксандр Лукашэнка выказаў строгую крытыку наконт таго, што ўсё робіцца вельмі марудна, з парушэннем абазначаных тэрмінаў і без гаспадарчага падыходу пры выкарыстанні маёмасці прадпрыемства і вытворчых памяшканняў.

Большая частка з іх утрымліваецца ў абсалютна непрыглядным выглядзе, месцамі працякае дах. «Хіба гэта рабочыя месцы?! Турма нейкая! Катаржныя людзі працуюць за 200 долараў у месяц!» — абурыўся кіраўнік дзяржавы ўмовамі працы рабочых.

Незадаволены Прэзідэнт і аператыўнасцю вырашэння пытанняў па закупцы новага абсталявання. Яно вельмі неабходна для выканання прадпрыемствам больш складаных, а адпаведна і больш прыбытковых заказаў, у той час як цяпер даводзіцца працаваць на станках, якім не адзін дзясятак гадоў.

 Кіраўніцтва прадпрыемства правяло шэраг працэдур па арганізацыі закупкі, аднак практычных вынікаў пакуль няма. У той жа час Аляксандр Лукашэнка звярнуў увагу, што тут жа ў Аршанскім раёне ёсць станказавод «Чырвоны барацьбіт», кіраўнік якога Аляксандр Шульгін таксама прысутнічаў на мерапрыемстве. Ён пацвердзіў здольнасць свайго прадпрыемства аператыўна паставіць большасць неабходнага абсталявання. «Вы ведалі строгае патрабаванне Прэзідэнта. Чаму не сказалі, што не патрэбны ніякі імпарт, ніякія конкурсы, у нас «Чырвоны барацьбіт» тут робіць», — адрасаваў Аляксандр Лукашэнка пытанне адказным чыноўнікам.

Ён даручыў арганізаваць прамыя закупкі неабходнага абсталявання як у названага прадпрыемства, так і іншых айчынных вытворцаў, а закупіць па імпарце толькі тое, што яны не змогуць паставіць. «З сённяшняга дня пачынай сюды пастаўку станкоў. Пад тую рэнтабельнасць, якая ў цябе ёсць. Забірайце гэтыя лоты і заказы і пачынайце па існуючых цэнах пастаўляць станкі», — распарадзіўся беларускі лідар, звяртаючыся да дырэктара «Чырвонага барацьбіта».

Прэзідэнт таксама запатрабаваў у сціслыя тэрміны навесці парадак як унутры невыкарыстоўваемых цэхаў, так і на тэрыторыі завода, адрамантаваць дах, падумаць, як эфектыўна выкарыстоўваць пакуль не задзейнічаныя ў вытворчасці памяшканні.

Аляксандр Лукашэнка неаднаразова падкрэсліваў, што ўсё гэта неабходна рабіць якасна і па-гаспадарску, арыентуючыся на перспектыву і не займаючыся паказухай.

Лукашэнка папракае чыноўнікаў у спробе не затрачваць шмат сіл пры выкананні яго даручэнняў

Прэзідэнт Беларусі Аляксандр Лукашэнка выказаў крытыку ў адрас шэрага кіраўнікоў высокага ўзроўню за недастатковыя намаганні па рэалізацыі дадзеных раней даручэнняў, накіраваных на развіццё прамысловай сферы ў Аршанскім раёне.

Кіраўнік дзяржавы наведаў у раёне шэраг прадпрыемстваў, адным з якіх стала ААТ «Тэхніка сувязі» ў горадзе Барань. Прадпрыемства «Тэхніка сувязі» знаходзіцца ў веданні Дзяржкамваенпрама і ўваходзіць у склад холдынга «Геаінфармацыйныя сістэмы кіравання». Ставілася задача развіваць вытворчасць на існуючых плошчах, пашыраючы выпуск і наменклатуру запатрабаванай на рынку прадукцыі.

Аднак па факце многія будынкі і памяшканні або не выкарыстоўваюцца, або выстаўлены на продаж, або плануюцца пад знос. Кіраўніку дзяржавы ў цэлым далажылі аб планах па развіцці прадпрыемства, дадатнай дынаміцы — растуць аб’ёмы выпускаемай прадукцыі, ствараюцца новыя рабочыя месцы.

Тым не менш Аляксандр Лукашэнка звярнуў увагу кіраўніцтва галіны, што яго даручэнні выконваюцца далёка не ў поўным аб’ёме, а заява аб тым, што астатніх вытворчых плошчаў дастаткова, — толькі тлумачэнне недастаткова эфектыўнай работы.

 «Калі нічога не рабіць, то дастаткова. А калі паставіць перад сабой мэту… бо першапачаткова задача ставілася, каб гэта ўсё было вамі асвоена і там вырабляўся прадукт, патрэбны для рынку, — сказаў Прэзідэнт. — А вы легкадумна  падышлі: гэта, гэта і гэта пад бульдозер. А гэта — прададзім. Ну, што за завод будзе?! Я і без вас гэта зрабіў бы. Я бачу, вы наогул не думалі над вырашэннем той задачы, якая была пастаўлена».

«Навошта мне міністэрства і міністр такі (размова пра Дзяржкамваенпрам. — Заўвага БЕЛТА), які пад бульдозер будзе пускаць тое, што я яму сказаў асвоіць», — падкрэсліў беларускі лідар.

Аляксандр Лукашэнка змяніў першапачаткова прапанаваны маршрут наведвання і асабіста агледзеў вытворчую тэрыторыю прадпрыемства. На паверку высветлілася, што ў многіх месцах не тое што не арганізавана вытворчасць, а нават не наведзены элементарны парадак. «Вось ваш твар, калі ўжо вы сюды прывялі паказаць нешта і паказалі… Ну так, вы не планавалі, што я зайду ў ваш «туалет». Вы ператварылі праз паверх гэта памяшканне ў туалет, дзе ніхто ніколі не прыбіраў. Мы сёння пакажам усяму народу, як вы працуеце», — заявіў кіраўнік дзяржавы.

«Вы вырашылі са мной абысціся, не затрачваючы шмат сіл і сродкаў. Вось, цяпер пакажам: увайшлі, на ліфце падняліся, там нейкія платы стругаюць… У нас усё добра, — адзначыў Прэзідэнт. Гэта ж трэба дадумацца… Два гады аб адным і тым жа гавару. Прыехаў — «цуды». Пачынаючы ад дзяржсакратара, кіраўніка Адміністрацыі і прэм’ер-міністра, вы так працуеце».

Лукашэнка: добраўпарадкаванне — гэта паўсправы, галоўнае — заняць людзей

На гэтым Прэзідэнт Беларусі Аляксандр Лукашэнка акцэнтаваў увагу 13 жніўня ў час рабочай паездкі ў Аршанскі раён.

Прэзідэнт пацікавіўся ў губернатара Віцебскай вобласці Мікалая Шарстнёва, як плануецца развіваць вытворчую сферу. «Тое, што мы вуліцы падрамантуем і па прынцыпе Копысі ажыццявім добраўпарадкаванне, — гэта паўсправы. Галоўнае — заняць людзей, каб людзі там працавалі і заставаліся ў гэтых цудоўных мясцінах», — падкрэсліў беларускі лідар.

Губернатар далажыў аб размеркаванні прадукцыйных сіл, структуры і развіцці галін Віцебскай вобласці. Адзначана, што за многія гады па аб’ектыўных і суб’ектыўных прычынах у рэгіёне знізілася колькасць насельніцтва, адпаведна зменшылася і колькасць занятых у эканоміцы. Таму асноўны акцэнт у развіцці будзе рабіцца на тыя раёны, якія маюць асноўную працоўную сілу, сярод іх і Аршанскі.

«Развіццё Аршанскага раёна сёння найбольш актуальнае пытанне не толькі для занятасці, але і напаўняльнасці бюджэту. Калі нам удасца, каб бюджэт Аршанскага раёна быў недатацыйным (а сума датацый дзесяці раёнаў складае суму датацый Аршанскага), то ў нас з’явяцца сродкі для развіцця іншых рэгіёнаў», — адзначыў кіраўнік вобласці.

У Віцебскай вобласці падрыхтавана спецыяльная праграма, якая прадугледжвае рэалізацыю інвестыцыйных праектаў у кожным раёне на агульную суму каля Br6,5 млрд.

Як запэўніў губернатар, гэта не проста планы, па шэрагу інвестпраектаў пачалася ўжо работа. «У вобласці каля 21 тыс. не занятых у эканоміцы людзей. Прыкладна палавіну — 10 тыс. — мы зможам працаўладкаваць пры рэалізацыі гэтых праектаў. Мы вызначылі для сябе цэнтры эканамічнага росту», — расказаў Мікалай Шарстнёў.

Паводле яго слоў, прадугледжваецца развіццё сферы турызму, стварэнне новых прадпрыемстваў і вытворчасцей, развіццё перапрацоўкі мясцовых відаў сыравіны, а таксама сфер лесанарыхтоўкі і дрэваапрацоўкі, будаўніцтва транспартна-лагістычных цэнтраў. Будуць стварацца дадатковыя прывабныя ўмовы, каб моладзь не імкнулася выехаць з малых населеных пунктаў і раённых цэнтраў.

Гаворачы аб пытаннях занятасці, Аляксандр Лукашэнка звярнуў увагу на неабходнасць бачыць рэальную сітуацыю, у тым ліку з беспрацоўем, а не арыентавацца толькі на лічбы афіцыйна зарэгістраванага.

Прэзідэнт патрабуе ад мясцовых улад не замоўчваць праблемы, а вырашаць іх.

«А калі палічыць, дзе вы трымаеце людзей, а ў поўную нагрузку яны не працуюць. Калі рэальнае беспрацоўе паглядзець…», — заўважыў ён.

Лукашэнка: недапушчальна, каб работа на месцах скочвалася да фармалізму і валакіты

Прэзідэнт Беларусі Аляксандр Лукашэнка 14 жніўня на нарадзе аб ходзе выканання даручэнняў па комплексным развіцці Аршанскага раёна падкрэсліў недапушчальнасць таго, каб работа на месцах скочвалася да фармалізму і валакіты.

Прэзідэнт нагадаў, што ў Пасланні беларускаму народу і Нацыянальнаму сходу ў 2017 годзе даручаў ураду сумесна з Віцебскім аблвыканкамам забяспечыць комплекснае развіццё Аршанскага раёна, каб яго тэмпы росту былі як мінімум вышэйшыя за сярэднеабласныя.

«Недапушчальна, каб работа на месцах скочвалася да фармалізму і валакіты», — падкрэсліў Аляксандр Лукашэнка.

Кіраўнік дзяржавы неаднаразова адзначаў, што выкананне даручэнняў па развіцці рэгіёна — паказчык эфектыўнасці работы ўрада і мясцовай улады. Патрабавалася наладзіць сістэмную работу, якая стала б прыкладам для іншых сярэдніх гарадоў краіны.

«Гэта пытанне не толькі Оршы. Як я ўжо гаварыў, гэта пытанне раўнамернага размеркавання прадукцыйных сіл па ўсёй краіне. Мы не можам дапусціць, каб дзесяцімільённая краіна напалавіну размясцілася ў Мінску і яго наваколлі. На нашых вачах прыкладаў нямала: напэўна, усе вы бывалі ў Маскве, праязджалі праз Маскоўскую вобласць і бачылі наступствы такога размяшчэння насельніцтва і прадукцыйных сіл. Гэтага дапусціць нельга», — звярнуў увагу Прэзідэнт.

Абмяжоўваючы будаўніцтва ў Мінску і абласных цэнтрах, трэба развіваць раённыя цэнтры, гарадскія пасёлкі і сярэднія гарады, упэўнены Аляксандр Лукашэнка.

«Улічваючы, што ў сельскай гаспадарцы мы намацалі шлях, па якім трэба ісці, — гэта стварэнне аграгарадкоў, — дадаў кіраўнік дзяржавы. — Такіх сярэдніх гарадоў у нас адзінаццаць, і пражывае там нямала — 15 працэнтаў насельніцтва. Урад на прыкладзе Оршы павінен быў паказаць сістэмную работу з такімі рэгіёнамі. У тым ліку вызначыць эфектыўныя рашэнні па апераджальным развіцці і распаўсюдзіць іх у далейшым на ўсю краіну. Гэтага не зроблена».

Калі нейкія з пастаўленых мэт і дасягаюцца, то толькі ў ручным рэжыме, адзначыў Прэзідэнт. А сістэмныя кропкі росту, якія дадуць магчымасць рэгіёнам развівацца без умяшання зверху, не вызначаны альбо неэфектыўныя.

«Больш таго, не вырашаны ключавыя задачы па развіцці праблемных арганізацый раёна. А да праблемных можна аднесці практычна ўсе прадпрыемствы, якія тут існуюць. Яны маюць патрэбу ў сур’ёзным падыходзе ў плане мадэрнізацыі і прывядзення іх у належны выгляд. Зыходзячы з учарашняга дня, можна зрабіць выснову, што ўсе члены ўрада, якія былі тут, навучыліся даваць тлумачэнні, але не выконваць. Таму тэма сённяшняй размовы — вынік», — сказаў Аляксандр Лукашэнка.

Паводле яго слоў, арыенцірам перш за ўсё павінен з’яўляцца ўзровень заработнай платы. Сёння ў Аршанскім раёне гэта Br770, а ў сярэднім у Віцебскай вобласці — Br820. «І наогул, Мікалай Мікалаевіч (старшыня Віцебскага аблвыканкама Мікалай Шарстнёў. — Заўвага БЕЛТА), Віцебшчына па ўзроўні дабрабыту насельніцтва пляцецца ў хвасце. А на асобных прадпрыемствах зарплата выплачваецца яшчэ і з затрымкамі. Тую мізэрную заработную плату, якую вы налічаеце, не можаце выплаціць людзям. І як у такім выпадку людзям жыць? Зразумела, вы страчваеце насельніцтва, людзі выязджаюць. Кожны чацвёрты беларус, які паехаў за мяжу на заработкі, з вашай Віцебскай вобласці», — канстатаваў кіраўнік дзяржавы.

Пры гэтым усе ўносімыя на разгляд Прэзідэнта прапановы па выдзяленні фінансавання, рашэнні арганізацыйных пытанняў падтрымліваліся неадкладна.

Аляксандр Лукашэнка пацікавіўся, якая рэальная сітуацыя на базавых прамысловых і сельскагаспадарчых прадпрыемствах і што перашкаджае ўраду і мясцовай вертыкалі ўлады безумоўна выконваць пастаўленыя задачы.

«Былі розныя пункты гледжання, але мы прынялі ўзгодненыя рашэнні. Ніхто не пярэчыў паўтара-два гады таму. Вось чаму тым больш патрабую адказу на пытанне, чаму ўзгодненыя рашэнні, фармалізаваныя кіраўніком дзяржавы, не былі выкананы? Ад удзельнікаў нарады патрэбны аб’ектыўныя ацэнкі і канкрэтныя прапановы па пытаннях, якія патрабуюць вырашэння, — адзначыў беларускі лідар. — Чаму правалены і не выкананы даручэнні Прэзідэнта? Іншых пытанняў я перад вамі не стаўлю. Не спрабуйце мне намаляваць радасную карціну да 2025 і 2035 гадоў».

«Не зроблена практычна нічога» — Лукашэнка на нарадзе ў Оршы ўказаў на сістэмныя недапрацоўкі па развіцці раёна

Як адзначыў кіраўнік дзяржавы, сацыяльную сферу ў Оршы ў цэлым прывялі да ладу, горад добраўпарадкаваны, і яго неабходна і далей утрымліваць у належным стане. «Да гэтага патрэбна вытворчая база. Людзі, акрамя таго, каб жыць у прыгожым горадзе, павінны працаваць, гадаваць дзяцей, утрымліваць сям’ю», — заявіў ён.

Паводле слоў Аляксандра Лукашэнкі, менавіта таму галоўны ўпор быў зроблены на прамысловую базу, прадукцыя якой запатрабавана ў краіне. «Па ўсіх напрамках былі прыняты мною рашэнні. Яны сістэматызаваны, даведзены да выканаўцаў. Не зроблена практычна нічога, нягледзячы на нагадванне мною і папярэджанні на самых высокіх узроўнях, пачынаючы ад Паслання беларускаму народу і парламенту», — адзначыў беларускі лідар.

У якасці прыкладу ён прывёў развіццё льнаводства, дзе было дадзена шмат даручэнняў — ад вырошчвання лёну да вытворчасці льняных тканін і шыцця адзення. «Быў дадзены шэраг даручэнняў, і гэта цэлая выбудаваная сістэма. Гэтак жа па ўсіх іншых пытаннях, што датычыцца Барані — развіцця гэтага гарадка, што датычыцца Балбасава, Оршы», — звярнуў увагу Аляксандр Лукашэнка.

На нарадзе старшыня Камітэта дзяржаўнага кантролю Леанід Анфімаў далажыў аб асноўных недапрацоўках і хібах. Ён падкрэсліў, што стратэгічная мэта, пастаўленая кіраўніком дзяржавы, — істотна палепшыць сітуацыю ў Оршы ўжо ў 2017 годзе, забяспечыць нармальнае функцыянаванне эканомікі раёна — не дасягнута. У цэлым работу трэба прызнаць вельмі нездавальняючай. «Урад выбраў для сябе ролю наглядчыка, а не непасрэднага выканаўцы», — канстатаваў ён.

Шэраг паказчыкаў у Аршанскім раёне, нягледзячы на існуючы патэнцыял, нават ніжэйшы, чым сярэднеабласныя, у тым ліку па індэксе прамысловай вытворчасці, экспарце тавараў і іншых напрамках. Прымаецца недастаткова мер па ўключэнні ў гаспадарчы абарот невыкарыстоўваемых аб’ектаў і зямельных участкаў, шмат праблемных пытанняў на прадпрыемствах. Пакуль не вырашаны асноўныя сацыяльна-эканамічныя пытанні занятасці і заработнай платы.

Леанід Анфімаў таксама адзначыў, што нават тое, што не патрабуе вялікіх матэрыяльных і фінансавых укладанняў, як навядзенне парадку на тэрыторыях прадпрыемстваў, не выканана. Работу нельга назваць сістэмнай, і яна мае ў многім касметычны характар.

Лукашэнка патрабуе ўнесці прапановы па заменах у кіраўніцтве ўрада

Паводле слоў кіраўніка дзяржавы, адзіная прычына невыканання яго даручэнняў заключаецца ў «пафігічным стаўленні ўрада да даручэнняў Прэзідэнта».

«Таму на гэтым тыдні ўнесці прапановы па замене ўсяго кіраўніцтва ўрада, усіх вярхоў з рэзерву кадраў, які мною сфарміраваны, — запатрабаваў Прэзідэнт. — Хопіць глядзець ім у рот, і яны будуць нам расказваць, як ім складана, як ім цяжка!»

Аляксандр Лукашэнка даручыў унесці прапановы па міністрах прамысловасці і будаўніцтва. «Ён сядзеў, не мог адрамантаваць дах — выканаць даручэнне Прэзідэнта. Хто меў права адмяняць мае рашэнні? А чаму не выканалі, чаму не зрабілі, як я сказаў? Чаму будтрэст куляецца?» — спытаў кіраўнік дзяржавы.

«Пазняка (старшыню Аршанскага райвыканкама. — Заўвага БЕЛТА) — адправіць у адстаўку і знайсці яму іншую работу», — запатрабаваў кіраўнік дзяржавы.

«І не дай бог тут не будзе зроблена тое, што вы намецілі (учора вы нам гэту праграму разгарнулі), і тое, што я вам даручыў, — папярэдзіў Аляксандр Лукашэнка. — Як варыянт, накіруйце Воўка (міністр прамысловасці Віталь Воўк. — Заўвага БЕЛТА) сюды — будзе выцягваць усю гэту прамысловасць. На якой пасадзе, я ўчора Шарстнёву сказаў: няхай вызначаюцца. Не зробіць — пойдзе туды, куды я ўчора сказаў».

Аляксандр Лукашэнка раскрытыкаваў віцэ-прэм’ера Васіля Жарко за недапрацоўкі ў развіцці сферы аховы здароўя. «Чаму не прыйшлі да мяне, не сказалі. Чаму ў вас карупцыянер на карупцыянеры сядзіць і карупцыянерам паганяе, а тут вы не паспелі. У Гомелі вы не паспелі, тут вы не паспелі», — сказаў кіраўнік дзяржавы.

«Вы мне будзеце расказваць пра гераізм? Прэзідэнт паставіў публічна перад народам жалезабетонна задачу. Вырашыць і кропка. А вы заняліся сабатажам», — ахарактарызаваў сітуацыю ў цэлым Аляксандр Лукашэнка.

«Учора са мной у дэлегацыі былі звычайныя простыя людзі. І потым мне кажуць: Аляксандр Рыгоравіч, што вы нервы рвяце на гэтым інструментальным заводзе? Там жа трэба было сабрацца інструментальнаму заводу, на чале з Пазняком усяму райвыканкаму (паўтары сотні чалавек працуе), і ўсё гэта на суботніку. Два суботнікі — і прывесці ўсё ў парадак. Вы што, гэта не маглі зрабіць? І прайсціся гэтак па ўсіх заводах», — адзначыў беларускі лідар.

«Строгая вымова Шарстнёву за абуральнае безадказнае стаўленне да даручанай справы. Наконт кіраўніцтва ўрада я сказаў. Воўка, Чорнага (міністр архітэктуры і будаўніцтва. — Заўвага БЕЛТА) неадкладна адправіць у адстаўку. Двігалеву і Засю (старшыня Дзяржкамваенпрама і дзяржаўны сакратар Савета бяспекі. — Заўвага БЕЛТА) — поўная службовая неадпаведнасць. Не паправяць да восені справу, не даложаць мне па кожным прадпрыемстве, пойдуць туды ж. Усіх астатніх адказных і іншых я проста папярэджваю».

«Прадстаўце новага старшыню райвыканкама (на гэту пасаду вылучаны старшыня камітэта па архітэктуры і будаўніцтве Віцебскага аблвыканкама Ігар Ісачанка. — Заўвага БЕЛТА ) сёння і пастаўце кожнаму задачу па ўсіх прадпрыемствах. Каб гэта было рэалізавана. Паспрабуем без урада рэалізаваць. У нас ёсць некаторыя рэзервы ў бюджэце і банкі, — даручыў кіраўнік дзяржавы. — І не дай бог да 7 лістапада не будзе тут зрухаў. Я прыеду пагляджу. Будзем па льнаводстве яшчэ нараду праводзіць. Не дай бог маё вока зачэпіцца, недзе будзе не так».

На нарадзе Аляксандр Лукашэнка працытаваў і пракаменціраваў некаторыя вынікі работы і «дасягненні», аб якіх зрабілі справаздачу службовыя асобы. «Сфарміраваны пералікі невыкарыстоўваемай або неэфектыўна выкарыстоўваемай маёмасці» — пералікі сфарміраваны! Гэта значыць на лісце начарцілі, напісалі, што пад бульдозер, а што прададзім. Тыдзень работы! І ці трэба гэта наогул было рабіць? — спытаў ён. — «Вызначаны для рэалізацыі канкрэтныя інвестпраекты». Мы ў яго былі, у яе былі — уяўлення не маюць, што рабіць заўтра. Якія канкрэтныя праекты? «Вызначаны напрамкі работы па павышэнні эфектыўнасці льногаліны». Я даўно вызначыў і паставіў задачы. Якія вы яшчэ там вызначалі напрамкі работы? Тут работа цалкам правалена, але гэта мы разгледзім у верасні-кастрычніку».

belta4

 



Добавить комментарий

Ваш e-mail не будет опубликован. Обязательные поля помечены *